¹ Iblahimu gugondile gunge mmachi china lyage gugitilwe Ketula. ² Gum'butile Zimlani, na Yokshani, na Medani, na Midiani, na Ishbaki, na Sua. ³ Yokshani gubushile Sheba, na Dedani; na baana ba Dedani babele Baashuli na Baletushi, na Baleumi. ⁴ Na baana ba Midiani babele , Efa, na Efeli, na Hanoki, na Abida, na Eldaa. Babo bose babele ii baana ba Ketula. ⁵ Iblahimu gummele Isaka byose byelibele nabyo. ⁶ Haho baana ba basei nage belibele nabo Iblahimu, Iblahimu gubahele tulambwe, nage gubahuminye ha iya ihana yine ibele ishamr Isaka mwanage, mengo melibele na mwego, bagye luubi lwa mmugulu, ndaa na sii gya Kedemu. ⁷ Mano noo masugu ma myaa gya mwego gwa Iblahimugyelishamine, myaa sambi, na maumi njwii na gitano. ⁸ Iblahimu nuuwagee nuuwa, nage nuuwa u buungu busoga, mmungu abisa, gwa masugu meengi, gusumbile u batu bage. ⁹ Isaka na Ishimaeli baana bage bamchiile mnda mgumbo gwa Makpela, mnda lubala lwa Efloni mwaana gwa Sohali Mhiti, luli luubi lwa Mamle, ¹⁰ Mnda luya lubala luguli Iblahimu u baana ba Hethi, uya noo uchiilwe Iblahimu na mmachage Sala. ¹¹ Habele hanyuma ha uwa wa Iblahimu, Abetcha ahalile Isaka mihaa mwanage. Nage Isaka gushamine alibu na Beel-lahai-loi. ¹² Ino noo ibushi ya Ishimaeli, mwaana gwa Iblahimu, guya Hajili, Mmisili mgichi gwa Sala gwelibutile Iblahimu. ¹³ Na mano noo machina ma baama ba Ishimaeli, wa machina mabo na bibushi byabo. Bubele bwa Ishimaeli, noo Nebayothi, na Kedali, na Abdeeli, na Mibsamu. ¹⁴ na Mishma, na Duma, na Masa, ¹⁵ na Hadadi, na Tema, na Yetuli, na Nafishi, na Kedema. ¹⁶ Babo noo baana ba Ishimaeli, na mamo noo machina mabo, na mnda bushamo bwabo, baana ba maoolo umi na bopi ulamana na milongo gyabo. ¹⁷ Na gino noo myaa gya mwego gwa Ishimaeli, myaa sambi na maumi matatu na njwii. Nuala mtimo, genuuwa, gusumbile u batu bage. ¹⁸ Bashamine uhuma Havila ndaa na Shuli, ugya luubi lwa Misili, u ndila gyugya Ashulu. Gushamine hawingi ha bashiwabo bose ¹⁹ Na bino noo bibushi bya Isaka mwaana gwa Iblahimu. Iblahimu gubushile Isaka. ²⁰ Isaka gusibele na myaa maumi mana heliguhile Lebeka msiha gwa Bethueli, Mshami, gwa Padan-alamu, kachage gwa Labani, Mshami,uba mmachage. ²¹ Isaka gusabile MLUME wa yulu ya mmachage, bululi gubele igumba. Nage MLUME gumtabuwe, na Lebeka mmachage guswalile gumo. ²² Baana bahimene nda mwage. Lebeka guganine uba m'bino, yulu yai nabe na mwego? Gugile um'bucha MLUME. ²³ MLUME gumsambile Lebeka, mioga gibili gili mnda mwobe, Na bilongo bibili byigumana utulila mnda mwobe, Ilongo imwechi ibi na uoma uhima ya bubili. Na mulwabatu gwigilila mnuna. ²⁴ Masugu mage ma ubuta hamawilile, loola! Mahasa mabele mnda gumo lyage. ²⁵ Gwa mtangi nuutobowa, nage gubele mgachichu m'bili gose nahi ichwlaganywa ya njuli. Bamgitile china lyage Esau. ²⁶ Hanyuma mnunage nage nuutobowa, na uboo wage uli uwate Esau ashindagulu. Gugishilwe china lyage Yakobo. Isaka gubele na myaa maumi mtuba mmachage halibushile. ²⁷ Baana baomine, Esau gubele mtu gugidi uhibanyama, mtu gwa mgala tu, na Yakobo gubele mtu mmochu gwa usahama mnda itula. ²⁸ Bibyo Isaba gubele huunda Esau, bululi gulile buhibi bwage, na Lebeka guundilw Yakobo. ²⁹ Yakobo guhiile iliwa ya kunde. Esau guchwile uhuma mgala, nage gubele mmimu abisa. ³⁰ Esau gumsambile Yakobo, Ibumbu ino, upe iyo iliwa ya igachichu naye, Yulu nagwa baga nene. Yulu ya bibyo bamgitile china lyage Edomu. ³¹ Yakobo gumsambile, Lutangi unguche lino kiine gyobe gya bubele bobe. ³² Esau guganine, Loola, nene nisili alibi na uwa, bwingita ii kiine gya ubuswa? ³³ Yakobo gumsambile, Undahile kwanja. Nage gumlahile, gumgudiche Yakobo kiine gyage gya bubele. ³⁴ Yakobo gummele Esau mkati na iliwa ya kunde, nage nuuya, nuunywa, hanyuma guchuwile, na uligila lwage, Bibyo Esau gulengiche kiine gyage gya bubele.