¹ Haho Iblahimu gubele na myaa giingi, na MLUME gubele gwahuummalila Iblahimu mihaa u bitu byose. ² Iblahimu gusambile mgichi gwage, mmungu gwandu gyage, gubele hulola bibya byage byose, Ibumbu ino, uubiye uboo obe hasi ha ilimbago yanyi, ³ na nene niulahila wa MLUME, Abetcha a gulu, na Abetcha a sii, ugana ushimguhila mwananyi mmachi hawingi ha misiha gya Bakanaani bano bandimshame hawingi habo. ⁴ mndi ugye mnda sii gyanyi, na u mmoga gwanyi, wamguhile mwananyi Isaka mmachi. ⁵ Guya mgichi gumsambile, Hange guya mmachana gushioleya uchwa nanyi ndaa na gino sii, wi wii! Namgiwiche mwanobe mpaga sii gyolihumine? ⁶ Iblahimu gumganine, Ube lwenge lululme, ushimgiwiche mwananyi ubo. ⁷ MLUME, Abetcha a gulu, apuminye mnda ndu gya tata, na udogoma nanyi mnda sii gyandibushilwe, gundahile nuugana, Nibaha ba ibushi yobe gino sii; gee gwimmila malaika mage hambele hobe, na gogwe wimguhila mwananyi mmachi uhuma uya. ⁸ na guya mmachana gusahuuswa uchwa nobe, bibyo, wisulwa mnda ilaha wanyi uno; mndi ushimgiwiche mwananyi uya. ⁹ Guya mgichi genuubiya uboo wage hasi ha ilimbago ya Iblahimu mlumyage, gumlahile wa iyo inywa. ¹⁰ hanyuma gugo mgichi guguhile ngamiya cha mlumyage gee nuugya, bululi bibya byose bya mlumyage bibele mmaboo mage, genuugya ndaa na Mesopotamiya, ndaa na mbuga gya Naholi. ¹¹ Guchibungiche ngamiya machwii hambuga ha mbuga alibu na ishima ya madi mengo ma igolo, mengo masugya baachana utaha madi. ¹² Nage guganine, Ee MLUME, Abetcha a mlumyanyi Iblahimu, nihusaba bino bihisho byanyi ubihe luhanga lusoga lino, umme yano yobe mlumyanyi Iblahimu. ¹³ Loola! Nagimana alibu na ishima ya madi, na bawamisiha gya batu na mbuga bahuhuma utaha madi, ¹⁴ mndi na bebi bino; guya msiha gwandisambila, Sula mtondo gobe, nusaba, nanywe madi, gabegana, ubenywa, na nene ninywisha na ngamiya chobe nacho,; bibyo noo guya golisobolelemgichi gobe Isaka; mndi wa bibyo noo handimana ugana wamonya yano yobe uli mlumyanyi. ¹⁵ Haho, gushinahwa udogoma, loola, Lebeka gwahuchwa, msiha gwa Bethueli mwaaana gwa Milka, mmachi gwa Naholi, mshiwabo gwa Iblahimu, nage gwina mtondoha ombe lyage. ¹⁶ Nago guya msiha gubele hungwe abisa u yenyi yage, inyundu, na ata balumyana bashinammana; gusalile mmishima, gugiluche mtondo gwage, gee nuusele. ¹⁷ Haho guya mgichi guhingile abilo ugya umgaa, guganine, Ibumbu ino upe madi macho mnda mtondo gobe nanywe. ¹⁸ Nage guganine, unywe, mlumyanyi, guitile abila, gusulile mtondo gwage mmaboo mage, gee nuunywisha. ¹⁹ Na ata helihwile uunywisha guganine, Na ngamiya chobe nichitahila, na ata byachihwa unywa. ²⁰ Guitile abilo, gugesile madi na mtondo gwage mnda isengo, gugile abilo mmisima utaha,guchitahile ngamiya chage chose. ²¹ Haho gugo mtu gumlolile na meeso ma chunguchungu, gushamine pii, bululi gamane nambo MLUME gwawasha lwendo lwage nambo nangu, ²² Haya ngamiya hachihwile unywa, guya mtu guguhile lupete lwa nolo, bushito bwage bubele ibaa ya shekeli, na suu chibili u maboo mage, bushito bwage bubele shekeli umi cha nolo, ²³ guganine, Uli msuha gwa nanyi gogwe? Ibumbu ino usambile. Wi wii! Uli ihana u ndu gya sobe tuoshe ushama imwe ihindi? ²⁴ Guganine, Nene nili msiha gwa Bethueli mwaana gwa Milka, gwelibutile Naholi. ²⁵ Gumsambile iyaka, Wetu uli byanyi biingi bya ulisha, na ihana ya ushamya bagenyi. ²⁶ Guya mtu guginamine na umginuna MLUME, ²⁷ Guganine, Na gaginunywe MLUME, Abetcha a mlume a mlumyanyi Iblahimu, guya mine gusaleya keene chagena kiine gyage wa mlumyanyi. MLUME gwangolwela nene na nene umona ndila gya uhiya undu gya mashiwabo na mlumyanyi. ²⁸ Haho gugo msiha gugile abilo, gubasambile batu ba ndu gya mmage bibyo bihisho. ²⁹ Na Lebeka gubele na nyumyage, china lyage Labani guchuwile abilo umgile guya mtu wishima. ³⁰ Bibyo , helimonine luya lupete, na lusuu u maboo ma kachage, guhuliche binywa bya kachage Lebeka, gulihugana, Bibyo noo byasambila gugo mtu, haho gumgilile guya mtu, na loola, gulimgimanyu alibu na ngamiya haya hishima. ³¹ Guganine, Alibu, gugwe ulimmalwe mihaa na MLUME, yulu yai wagimana hambuga? Bululi nahuubiya ndu yulu yobe, na ihana ya ngamiya. ³² Na guya mtu gugingile mnda ndu, guchihambile ngamiya, nage guchihele byanyi na byuya bya ngamiya, na madi na usuwa magulu mage, na magulu ma baya batu beligila nabo. ³³ Bahiile biliwa, haho guganione, Nishiya nambo nishi nalisamba binywa byanyi. Bibyo Labani guganine, ehe, Ubedogoma. ³⁴ Guganine, Nene nili mcha gwa Iblahimu, na MLUME gwammalila mihaa mlumyanyi, gusili mtu mmata; Abetcha amma miyoo na ng'ombe, na bumona, na nolo, na bacha, na bagichi, na ngamiya, na punda. ³⁶ Na Sala, mmachi gwa mlumyanyi, gum'butuli mlumyanyi mwaana gwa mlumyana, u buungu bwage; nage gummele byose byeli nabyo. ³⁷ Hanyuma mlumyanyi gwadahicha guganine, ushimguhile mwananyi u misiha gya Bakanaani, bene bandimshame mmibaloo yabo. ³⁸ Bino, ugye ndaa na undu gya tata, na wibushi yanyi, wamguhile mwananyi mmachi. ³⁹ Nimsambile, mlumyanyi, Hange gugo mmachana gushibenja uchwa nanyi. ⁴⁰ Gusambile, MLUME, mine gwandihugyata u meeso mage, gwihila malaika mage ugyata hamwechi nobe, gwigolola ndila gyobe; na gowe wamguhile mwamanyi mmachi mnda ibushi yanyi, na gwa ndu gya tata. ⁴¹ Haho wisulwa ulaha wanyi holihyila ibushi yanyi, nabo basahuha gugo msiha, wisulwa ulaha wanyi. ⁴² Na nene nahiya lino wishima, nagana, Ee MLUME, Abetcha a mlumyanyi Iblahimu, wahingolwela ndila gyandi hugya. ⁴³ loola, Nagimana alibu na ishima ya madi; mndi na bibe bino, msiha gyine gwichwa utaha madi, nabamsambila, Upe, nuusaba, madi machoo mnda mtondo gobe nanywe, ⁴⁴ nage gusambile, gogwe ubenywa, na ngamiya chobe nichitahila, gugo noo gabe mmachi mine MLUME gwelibiile mwaana gwa mlumyanyi, ⁴⁵ Haho habele nishinahwa udogoma mnda mtima gwanyi, loola! Lebeka guchwile, na mtondo haombe. Gusalile mmishima gutahile,. Nene nimsambile, Ibumbu ino upe madi nanywe. ⁴⁶ Guitile abilo gusulile mtondo gwage hasi, guganine, Unywe, na ngamiya chobe nichinywisha nacho. ⁴⁷ Hanyuma nim'budiche, nigsnine, Uli msiha gwa nanyi gogwe? Nage gugaile, Nene nili msiha gwa Bethueli, mwaana gwa Naholi, Milka gwelim'butile. Na nene nim'biile lupete lwa umyembe gwage na lusuu u maboo mage. ⁴⁸ Niginamine, nimsalile MLUME hasi, nimtonine MLUME, Abetcha a mlumyanyi Iblahimu, angolwele mndila, namguhile mwaana gwa mlumyanyi msiha gwa mshiwabo. ⁴⁹ Bino, nambo mulihubenja umgilile keene na chigilwe mlumyanyi, sambilwe nanbo bishi byo, sambilwe yulu nagaluwe luubilwa uboo wa ulume ao lwa uboo wa uachi. ⁵⁰ Haho Labani na Bethueli mamgaile baganine, Ino inywa yahumawa MLUME, na ata beswe tushinaosha uusambila inywa isoga na ata isone. ⁵¹ Loola gugo Lebeka gulu umbele ubo, ubemguha, ugye nage gabe mmachi gwa mwaana gwa mlumyobe, nahi biganine MLUME. ⁵² Haho mgichi gwa Iblahimu helihuliche binywa byabo, guginamine ndaa nahasi umbele wa MLUME. ⁵³ Hanyuma gugo mgichi gubahele byombo bya bumona na bya nolo na bichwalaganywa gummele Lebeka; na biyu bya bumona bwingi guhele nyumyage na mmage byoka biya. ⁵⁴ Balile na banywine, gee na batu babele hamwechi nage, nabo bashamine m'busugu. bachuwile halwelo, nage guganine m'bendeya nagye wa mlumyanyi. ⁵⁵ Myumyage na mmage baganine, msiha gushame watuli mashihunguwe masugu umi, hanyuma gabegya. ⁵⁶ Nage gubasambile, mushisingye, ubenda ii biya MLUME gwanglila bisoga mndila gyanyi; ndewe nagye wa mlumyanyi. ⁵⁷ Baganine, lewe tumgite gugo msiha, tum'buche gee mine. ⁵⁸ Bamgitile Lebeka bam'budiche, Wi wii! Wigya na guno mtu? Gugaile, Niigya. ⁵⁹ Haho bammilile Lebeka kachabo, na mgichi gwage, na mgichi gwa Iblahimu na batu bage, ⁶⁰ Bammalile Lebeka mihaa, bamsambile, Kachetu, ube gogwe mmabo gwa uki umi, nyendo uki chingi, na ibushi yobe bahyaane mchango gwa babo bali hubaonywa. ⁶¹ Lebeka Guchuwile hamwechi na bagichi bage, nabo bachinine hegulu ha ngamiya, balamene na guya mtu, Na guya mgichi gumguhile Lebeka na uligila lwage. ⁶² Haya Isaka gubele hugya mndila gya Beel-lahai-loi, yulu gushamine m sii gya uboo uachi. ⁶³ Isaka gugile yulu ya uengelecha wibetabeta mengo ma igolo; guginunine meeso mage, gumonine,uli ngamiya chili huchwa. ⁶⁴ Lebeka guginunine meeso, nage helimonine Isaka, gusalile hegulu ha ngamiya, ⁶⁵ Gum'budiche mgichi, Mnanyi gugu mtu gulihuchwa mmibetabeta utugaa? Mgichi gugaile, Gugo noo mlumyanyi. Haho guguhile lushungi lwage na ulihupa. ⁶⁶ Guya mgichi gumsambile Isaka bigilanywa byose byeligilile. ⁶⁷ Isaka gumgingiche Lebaka mnda itula ya mnage. Sala, gumguhile Lebeka , gee nuba mmachage, gummundile; Isaka guhungiwe wa yulu ya lubu lwa mnage.