¹ Memgo masibele Isaka mmosu, na meeso mage gushihumona yulu ya buhobu, gumgitile Esau, mwanage gwa mmusobu, gumsambile Mwananyi. Nage gugitabwile, Nene nili hano, ² Guganine, Loola, bino nene nisili mmote, na nishigidi lusugu lwanyi lwa uwa. ³ Bino, nilihuusaba, uguhe migwi gyobe, luuku lobe, na buta bobe, ugye mgala upibile buhibi; ⁴ Wanongeche ililwa ibenju nahi iya yandisubenja, na wape, yulu naiye; na mtima gwanyi guhalile mihaa, hambele ha uwa wanyi. ⁵ Na Lebeke guhuliche, Isakahelibele hudogoma na Esau mwanage. haho Esau gugile mgala gahibe buhibi, gachwe nabo. ⁶ Lebeka gumsambile Yakobo mwanage, guganine, loola, nammulicha sobe guluhudogoma na Esau, mshiwenyu,gulihugana. ⁷ Upe buhibi, ungitile iliwa ibenju yulu naiye, na uhalila mihaa umbele wa MLUME hambele ha uwa wanyi. ⁸ Bino, mwananyi, hulicha lidi lyanyi nahi byandiulaga. ⁹ Ugye abilo u mgoma unguhile baana ba mbuchi babili babanonyu, na nene nihiya iliwa ya ibenju ya sobe, iya yine yesubenja. ¹⁰ Hanyuma wagye umma sobe, gaye, yulu guhale mihaa hambele ha uwa wage. ¹¹ Yakobo gumsambile Lebeka mnage, Esau mmulwanyi ii mtu gwa isada ingi ha m'bili, na nene nili mtu gwa m'bili gubongu. ¹² Hange tata gwimbabata, na nene nimoneya u meeso mage gwa lulimi; nilichwishicha buloga na ushi uhalilwa mihaa. ¹³ Mnage gumsambile, Ulogwa obe na ube hegulu hanyi, mwananyi, uhuliche lidi lyanyi tu, ugye uchupa baana ba mbuchi. ¹⁴ Gugile, gubaguhile, na nuuma mnage. Mnage guhiile iliwa ibenju, nahi iya yine isubenja sage. ¹⁵ Hanyuma Lebeka guguhile bichwalaganywa bibenju bya Esau mwanage gwa mmosobu, byelibele nabyo mndu, nuuchwiya Yakobo mnunage. ¹⁶ Na ibambi ya mwana mbuchi nuuchwiya umaboo, na mioshi mwage. ¹⁷ Nage nuuma Yakobo mwanage mmaboo mage iya iliwa ibenju, na mkati gwelichelile. ¹⁸ Gugile uli sage, guganine, Tata. Sage gugaile, Nene nili hano. Gogwe uli nanyi, mwananyi? ¹⁹ Yakobo gumsambile sage, Nene nili Esau, bubele bobe, naita nahi byolinganine. Ibumbu ino, Ubyuwe, ushame dinga, uye buhibi bwanyi, yulu mtima gobe gupalile mihaa. ²⁰ Isaka gum'budiche mwanage, Byaba wii wahaga abisa abilo lino, mwananyi? Gumgaile, Wa yulu ya MLUME, Abetcha obe, gwangabila. ²¹ Isaka gumsambile Yakobo, Buuchwa, ibumbu ino, yulu nubabate, mwananyi Esau, nambo nangu. ²² Bibyo Yakobo gumshenene Isaka, sage, nage num'babata, guganine, Lidi ii lidi lya Yakobo, na maboo ii maboo ma Esau. ²³ Na gushimmanine, bululi maboo mage mabele nahi maboo ma Esau, mmulwage, mali na isada; haho gee noo umalila mihaa. ²⁴ Gum'budiche, winene noo gogwe mwananyi Esau? Guagnine, Noo nene, ²⁵ Guganile, Ubepyicha alibu naya buhibi bwa mwananyi, bululi mtima gwanyi guhalile mihaa. Gushenenye alibu, nage nuuya; hanyuma gee nuuma na byunywa, genuunywa. ²⁶ Isaka, sabe, gumsambile, Sheena alibu abisa, ukumbatile, mwananyi. ²⁷ Gumshenene gumumbatile. Nage guhuliche chumba lya bichwalaganywa byage, gummalile mihaa guganine,Loola chumba lya mwananyi lili nahi chumba lya lubala lwelihalile mihaa MLUME. ²⁸ Abetcha na auhe bya imee ya gulu, na bya unaga wa sii, na bwingi bwa biliwa na byunywa. ²⁹ Mioga na giugilile na bilongo biuginamine, Ube mlume gwa bashiwenyu, Nabaana ba mnobe buginamine. Gwiuloga galogwe, Na gwihalila mihaa gahalilwe mihaa. ³⁰ Haho Isaka helihwile umalila Yakobo mihaa, na Yakobo helihwile uhuma umbele wa Isaka, sage, haho Esau mshiwabo guchwile uhuma u buhibi bwage. ³¹ Nage byoka biya gwahiya iliwa ibenju gummele sage, gumsambile, sage, Tata, na gabyuwe , gaye buhibi bwa mwanage, yulu mtima gobe gupalile mihaa. ³² Isaka sage, gum'budiche, Gogwe uli nanyi? Guganine, Nene noo mwanobe, Esau bubele bobe. ³³ Isaka gudandile ludando lwata abisa, guganine, M nanyi guya gwaguha buhibi nuchupa? Nene nahuhwa uya hambele gogwe ushinachwa, nammalila mihaa ehe, nage gwihalwa mihaa. ³⁴ Esau helihulicha binywa bya sage, gulilile lilo lyata lya usumya mtima, gusambile sage, Palile na nene mihaa, na nene, Ee tata. ³⁵ Isaka guganine, mshiwenyu gwachwa wa buyanja, gwaguha mihaa gyobe. ³⁶ Esau guganine, Wi wii! Gushigisilwe Yakobo wa chigilwe, bululi gwalibiya ha ihana yanyi nyendi chopi chino? Guguhile u bubele bwanyi, hano gwahuguha iyaka mihaa gyanyi. Gubudiche, Wi wii! Tata usambiila na nene gyanyi mihaa. ³⁷ Isaka gugaile, gumsambile Esau, Loola, nam'biya gabe mlume gobe, na bashiwenyu bobe bose namma babe bagichi bage; wa bililwa na wa byunywa namma byo, na gogwe nuitile ii bino, mwananyi? ³⁸ Esau gumsambile sage, wina mihaa gumwechi kaa, tata,? Upalile mihaa nene, na nene, Ee tata, Esau gusediche lidi, gee nuulila. ³⁹ Isaka, sage, gumgaile, gumsambile, Lingamina, hene hali unaga wa sii noo habi ha bushamo bobe, Na hene hali imee ya gulu ilihuhuma hegulu. ⁴⁰ Wa ahilu obe gogwe ubi poo, na gogwe wimgilila mshiwenyu; Na bibi holihogonowa, Winoga uhambwa obe uoshi lyobe. ⁴¹ Esau gummonywine Yakobo yulu ya giya mihaa gimmalile sage. Esau guganine, mnda mtima gwage, Masugu ma ulilile tata mahuhiya, haho noo handimmaga mnunanyi Yakobo. ⁴² Lebeka gusambilwe bibywa bya Esau, mwanage gwa mmela. Guhilikle mtu umgita Yakobo, mwanage gwiisula, Gumsambile, Loola, mwano gwa Esau, msiwenyu, gwalihungya mtima gwage, bululi gulihuulangala uuhaga. ⁴³ Mndi bino, mwananyi, hulicha lidi lyanyi, uchuwe usinine wa Labani nyumyanyiuya Halani; ⁴⁴ washame masugu macho ata bishigililwa bya mshiwenyu habyihunguwa. ⁴⁵ ata byihwa bishigililwa bya mshiwenyu, heligibilila byolimgilile. Haho noo handihila batu uchwa uuguha uhuma uya. Yulu yai nawilwe na benywe bose babili lusugu lumwechi? ⁴⁶ Lebeka gumsambile Isaki, Mnda mtima gwanyi nishi na laha yulu ya babo misiha gya Hethi, nahi bano misiha gya gono sii, mwego gwanyi gwipa alambwe nai?