¹ Habele hanyuma ha bibyo bihisho Abetcha amtondile Iblahimu, gumsambile, Ee Iblahimu! nage gugaile, Nene nili hano. ² Abetcha guganine,Umguhe mwanobe, ihene yobe, gosuunda, Isaka, wagye lobe mnda sii gya Moliya, wamtambikile lutangi lwa uchigyauya hegulu ha lumwe loono lwandusambila. ³ Iblahimu guchuwile umayaya, guganjile punda gyage, guguhile bawalubaga babili hamwechi nage na Isaka mwanage, gunogile kunyi cha yulu ya lulo lutangi lwa uchigya, guchuwile, gugile ndaa na ihana yine yelisambilwe na abetcha. ⁴ Lusugu lwa matatu Iblahimu guginune meesi mage, guimonine iya ihana wa koo . ⁵ Iblahimu gusambile baya bawalubaga bage, Shamwe benywe hano hamwechi na punda, na nene na mmwalubaga twigya uya, twatangile, na twabegiwila wamli. ⁶ bibyo Iblahimu guchiguhile kunyi na lulo lutangi, gumswiiche Isaka mwanage; guguhile ahyaa na aele mmuboo mwage, bagile bose babili hamwechi. ⁷ Isaka gudogomine na Iblahimu sage,guganine, Tata! Nage gugaile Nene guno, mwananyi. Guganine, Loola! Ahyaa noo haali, na kunyi chili hoo, guli uhi mwana mmoo gwa lutangi lwa uchigya? ⁸ Iblahimu gugaile, Abetcha iliha oo ene mwana mmoo gwa lulo lutangi, mwananyi. Haho bagililile bose babili hamwechi. ⁹ Bahiile iya ihana yelisambilwe na Abetcha, Iblahimu gulongiche butambikilo uya, gubiile kunyi tayali, hanyuma gummambile Isaka mwanage,gum'biile hegulu ha butambikilo, hegulu ha chiya kunyi. ¹⁰ Iblahimu gugolele uboo wage, gughile aele yulu gamshinje mwanage. ¹¹ Haho malaika ma MLUME gumgitile uhuma hegulu, guganine, Iblahimu! Iblahimu! Nage gugitabuwile, Nene guno. ¹² Malaika guganine, Ushimgolwele mmwalubaga uboo obe, na ushimgilile atu; bululi bino nahumana ugana ulihumnyemya Abetcha, byosangima mwanobe, ihene yobe. ¹³ Iblahimu guginune meeso mage , gulolile, na umuna, mlume gwa mmoo guli hanyuma hage, gwahambwa meega mage u tabi lya mti. Haho Iblahimu gugile uguha gugo mmoo, gugutangile guba lutangi lwa uchigya na ugalula yulu ya mwanage. Iblahimu gugitile iya ihana Yehova-yile, nahi biya batu byabalihugana ata na lino, U luya loono lwa MLUME gupatigene. ¹⁵ Malaika ma MLUME mamgitile Iblahimu lwendo lwa bubili uhuma hegulu ¹⁶ guganine, Nahala wa ichuli-chuli yanyi ya mwego gwagana MLUME, bululu wagina ino igisho, na usangima mwanobe, ihene yobe, ¹⁷ wa yulu ya uhalila mihaa niuhalila mihaa, na wa yulu ya uubucha niibucha ilongo yobe nahi tumbalambala twa hegulu, na nahi isee ili wibwga; na ibushi yobe yitabala mchango gwa tumangu twabo; ¹⁸ Na uhitila ibushi yobe mioga gyose gya ibaloo gyilihalila mihaa; na yulu wawasha lidi lyanyi. ¹⁹ Haho noo Iblahimu gubagiwilile baya bawalubaga bage, bachuwile , bagile bose hamwechi ndaa na Beel-sheba; Iblahimu gushamine uya Beel-sheba. ²⁰ Hanyuma ha bibyo bihisho, Iblahimu gusambilwe ugana, Loola, Milka nage gwam'butula Naholi mshiwenyu mwaana; ²¹ Usi, bubele mbuswa gwage mtangi, na Buzi mshiwabo, na Kemueli, sage gwa Alamu,; ²² na Kesedi, na Hazo, na Pildashi, na Yidlafu, na Bethueli. ²³ Bethueli gubutile Lebeka; babo inana Milka belibutile Naholi mshiwabo na Iblahimu. ²⁴ Na msei nage Leuma nage gubushile Teba na Gahamu na Tahashi na Maaka.