¹ MLUME gumchwilile sala nahi byeliganine, na MLUME bumgilile nahi byeliganine. ² Sala guswalile gumo gumbutile Iblahimu mwaana gwa mlumyana u buungu bwage, u mwngo melisambilwe na Abetcha ³ Iblahimu gumgitile china lyage Isaka, guya mwaana gubushilwe, mine Sala gwelim'butile. ⁴ Iblahimu gumgishiche Isaka mwanage kumbi, helisibele ma masugu inana, nahi bimsambile AbetchA. ⁵ Nage Iblahimu gubele mtu gwamyaa sambi, halibitile mwanage Isaka. ⁶ Sala guganine, Abetcha angita nene useya; gegese gwihulicha gwiseya hamwechi nanyi. ⁷ Guganine, Mnanyi gwabasambila Iblahimu, Sala gwikokya mwaana? Bululi nam'butila mwaana u buungu bwage. ⁸ Mwaana guulile, guleichiwe ukoka; Iblahimu guhyiche biliwa bya saso luya lusugu luleichwe Isaka ukoka. ⁹ Sala gommonine guya mwaana gwa Hajili Mmisili, gwelibutile Iblahimu, gulihuita msebululo. ¹⁰ Wa bibyo gumsambile Iblahimu, Mchinge mgichi hamwechi na gugu mwanage, bululi mwana gwa mgichi gushihyana hamwechi na mwananyi, Isaka. ¹¹ Na iyo inywa ibele isone abisa u meeso ma Iblahimu, wa yulu ya mwanage. ¹² Abetcha amsambile Iblahimu, ino inywa isibe isone u meeso mobe, wa yulu ya gugo mwaana, na gugo mgichi gobe. Yoyose yine yiusambila Sala, hulicha lidi lyage, Bululi uhitila Isaka ibushi yobe yigiswa. ¹³ Nage mwaana gwa mgichi nimita uba mmoga, yulu gugu nage ii ibushi yobe. ¹⁴ Iblahimu gubyuwile lwelo pee guguhile mkati ma ibila ya madi, gummele Hajili na umswiya uombe lyage, na mmwalubaga, gumsambile; nage guchuwile, guchinine mnda mlele lya Beel-sheba. ¹⁵ Maya madi mahwile mmibila, gumlachiche mwaana hasi ha imwe ihuhu. ¹⁶ Hajili gugile ushama mbalamwa, koo na mwanage nahi ulaha wa utele mgwii; bululi guganine, Nashimone wiwila mmwalubaga; nahe gushamine gulihulingamina, wa lidi lyage lyata, gulilile. ¹⁷ Abetcha ahuliche lidi lya mmwalubaga. Malaika ma MLUME mamgitile Hajili uhumina hegulu, mamsambile, Wina ii, Hajili? Nangu uwa booba, bululi Abetcha ahulicha lidi lya mmwalubaga uya weli. ¹⁸ Gimana, uginune mmwalubaga, na um'bwate mmaboo mobe,yulu nimmita uba ilongo yata. ¹⁹ Abetcha am'bulule meeso,nage nuumona ishima ya madi; gugile na uigilucha ibila na madi, na uunywisha mmwalubaga. ²⁰ Abetcha oo nuuba hamwechi na gugo mmwalubaga, nage nuula, gushamine mlele, nuuba mshi gwa buta. ²¹ Gushamine mnda lele lya Palani; mnage gumguhile mmachi mnda sii gya Bamisili. ²² Habele maya mengo Abimeleki, na Fikoli mmata gwa bilume pambwa byage, bamsambile Iblahimu, baganine, Abetcha ali nobe mnda byose byolihugila. ²³ Bino hano undahile uli Abetcha, ugana ushigilila bya buyanja, ata na mwananyi, ata na midulwanyi, mndi ulamana na yano yandiugilile wangilile na nene, na gino sii gyine gyawagyata mwaili. ²⁴ Iblahimu guganine, nilaha. ²⁵ Hanyuma Iblahimu gummambile Abimeleki wa yulu ya ishima ya madi yine isapilwe na macha ba Abimeleki. ²⁶ Abimeleki gudogomine, Nene nishigidi mnanyi mine gwagila iyo ihisho, na usbisambile ata, na nishihuliche gugo mwano, uhulicha mlino kaa. ²⁷ Iblahimu guguhile mmoo na ng'ombe nuuma Abimeleki na babo babili babiile malagano. ²⁸ Iblahimu gubiile baana ba miyoo njwii ba maota gee buchima. ²⁹ Abimeleki gumsambile Iblahimu, Bano baana ba miyoo njwii, bawabiya boo buchima noo ugana wii? ³⁰ Guganine, Bano baana ba miyoo njwii ba maota wibaguha mmaboo manyi, babe ubangisiya wa umonya ugana mnene nidabile ino ishima. ³¹ Wa bibyo guigitile iya ihana Beel-sheba, bululi balahile uya bose babili. ³² Haho baitile malagano uya Beel-sheba. Abimeleki, na Fikoli mmata gwa bilime pambwa byage, bachuwile bagiwile mnda sii gya Baflisti. ³³ Iblahimu guunine mti gusuha biguma bilahu uya Beel-sheba, Guligishile china lya MLUME Abetcha a milumbu. ³⁴ Iblahimu gushamine nahi mgenyi mnda sii gya Bafilisti masugu meengi.