¹ Iblahimu guhumine ubo nugya sii gya uboo uachi, gushamine hawingi ha Kadeshi na Shuli, nage gugyatile m Gelali. ² Iblahimu guganine Sala mmachage, Gugu ii kachanyi. Haho Abimeleki oolo lya Gelali guhilile batu gumguhile Sala . ³ Bibyo Abetcha amchwilile Abimeleki u malo ma busugu , gumsambile, usili mmu gogwe yulu ya gugu mmachana gwawaguha, yulu ii mmachi gwa mtu. ⁴ Haho Abimeleki gubele gushinamyila, guganine, Ee MLUME, Wi wii! Wihaga ata na mmoga gwina kiine? ⁵ Wi wii! Gusasambila gee mine ugana gugu ii kachanyi? Na mmachana nage gugana, Gugu ii nyumyanyi. Wa yulu ya iwilila wa mtima gwanyi, Na wa yulu ya maboo manyi mahaha, nagila bino. ⁶ Abetcha amsambile u malo, Na nene namana ugana wa uwilila wa mtima gobe wagila bibyo, noo yulu nene nuuchibila ushingila buube, wa bibyo nisuuleya umude. ⁷ Bino, hano, umgiwiche gugu mmachana wa guno mtu, yulu gee iyi ibuli, nage gwiusabila, ube na mwego. Nambo ushimgiwicha, umane ugana wa chigilwe wiiwa gogwe na batu bose boli nabo. ⁸ Abimeleki gubyuwile halwelo pee, gubagitile bacha bage bose, gubasambile binywa bibyo byose mmatu mabo, na babo batu bamonine booba abisa. ⁹ Hanyuma Abimeleki gumgitile Ablahamu, gumsambile, Watuita ii? Nulubila ii, na ulusha yulu yanyi na yulu ya buoolo bwanyi buube bwata? Wangilila bigilanywa bishinagiliya. ¹⁰ Abimeleki gumsambile Ablahamu,Wamona ii ata uhishe ino ihisho? ¹¹ Iblahimu guganine, bululi nimonine, ugana ha ino ihana ,nabo bipaga yulu ya mmachanyi. hashi booba bwa Abetcha. ¹² Nage chigilwe ii kachanyi, msiha gwa seto, ila gushi mwaana gwa mago, haho gee nuba mmachanyi. ¹³ Mndi haya helipilile Abetcha uhuma mndu gya tata, nimsambile, ino noo yano, yolingitila. Ihana yose yatwigingila, ugane,Gugu ii mmachanyi. ¹⁴ Bibyo abimelekiguguhile mmoo, na ng'ombe, na baacha na bagichi, nuuma Ablahamu, gumgiwidiche sala mmachage. ¹⁵ Abimeleki guganine, Loola, Sii gyanyi gili umbele wa meeso mobe, shama oli hubenja. ¹⁶ Abimeleki gumsambile Sala, Loola! Namma mshiwenyu bumona uki, bube bwa uwila meeso oli umbele wa bose bali hamwechi nobe, na gogwe ubi na kiine umbele wa batu bose. ¹⁷ Iblahimu gumsabile Abetcha, Abetcha noo ummonya Abimeleki, na mmachage, na bagichi bage, nabo nuubuta baana. ¹⁸ Bululi MLUME gubele mmambe magumo ma batu ba mndu mwa Abimeleki, bashibute, wa yulu ya Sala mmachi gwa Iblahimu.