¹ Bibyo, baya bamalaika babili bagile Sodoma mengo na igolo; na Luti gubele mshame ha mchango gwa Sodoma, Luti gubamonine guchuwile na ugya ubagaa, guginamine ndaa na hasi. ² Guganine, BALUME banyi, alibu namtongelela gingilwe mnda nduu gya mcha gwenyu, na lwelo pee mwachuwe mwabeligila lwenyu. Baganine bishi bibyo, mndi twishama mmibanja na uyesha busugu bose. ³ Gubabongele ibumbu abisa, nabo bachwile naq ugingila mnda nduu gyage. Gubahiile biliwa na ubaha mikati gishi gibiye mshimi boo nuya. ⁴ Mndi hambele bashi na lala, batu ba mmbuga, bashami ba Sodoma, bachunguluwile ndu, bawalubaga na baulu, batu bose bachwile uhuma ngubi chose. ⁵ Bamgitile Luti, bamsambile, Bali uhi baya batu bene bachwa oli buno busugu? Utuhe boo, yulu tubamane, ⁶ Luti guhumine ha mchango, na uhamba mchango inyumanyuma. ⁷ Guganine, Bino, nilihumtendelela, bashiwetu, mushigile bubo bubii. ⁸ Loolwe, ninabo bawamisiha bopi bashinamana balumyana, ibumbu ino nimma boo mubagilile bili bisoga u meeso menyu, yulu bano batu mushibagile atu, bululi bali bashame hasi ha butato bwanyi. ⁹ Bamganine, Huma hano! hanyuma baganine, Mtu guno gumwechi guchwile ushama uno wetu u bugenyi; nage mndi gulihubenja uonona! Bino twiugilila gogwe bibee uhima babo. Bamtagiye abisa gugo mtu, gugo Luti, bashenine bagubele mchango. ¹⁰ Mndi babo batu bagulole maboo mabo , bamgingiche Luti babali mndu, bahambile mchango. ¹¹ Hanyuma babatele babo batu bali ha mchango buhobu, bawalubaga wa miungu, na baimine na uenga mchango. ¹² Bibyo babo batu bamsambile Luti, Wi wii! wina gunge mtu hano iyaka? Sobe buo, baanaq bobe, na bawamisuha gyobe, na ata gegese guli nage mgino mbuge, ubahimye ha ino ihana; ¹³ bululi beswqe twachwa udogya iona ihana yose, yulu lilo lyage lili lingi u meeso na MLUME; nage MLUME gwatulihila tuhadigye. ¹⁴ Luti gutobowile na usambila basage buo; beligondiche misiha gyage, guganine humwe muhume ino ihana bululi MLUME gwidigya gino mbuga.Bibyo gubele nahi guli huina u meeso ma masage buo. ¹⁵ Haluhiile lwelo noo malaika nuutundumuna Luti, baganine, Chuwa, uguhe mmachobe na bawamisiha bobe babili bali hano, ushichimine mnda usona wa gino mbuga. ¹⁶ Gisingile singile; nabo babo batu bambwatile uboo, na uboo wa mmachage na uboo wa bawamisiha gyage,babili, nahi biya bimmonene MLUME keene, batobwele na ubiya hambuga ha mbuga. ¹⁷ Haho habamtobolile hambuga, gomwe guganine, Ulihonye ichili-chuli yobe ya mwego ushilochi unyuma, na ushigimane mmiiyo ibetabeta hohose; usinine uloono, ushichwe uchimina. ¹⁸ Luti gubasambile, bishi bibyo balume banyi! ¹⁹ Loola, mcha gobe gwahewa misa u meeso mobe, na Gogwe wagililila umonya uleelela obe byawangilila wa uhonya ichuli-chuli yanyi ya mwego, na nene nishiosha usinina uloono bululi nashibangwe na uya usona, niiwa. ²⁰ Bino gino mbuga gili hoka, nagisinine, ati gili gicho gino?Na ichili-chuli yanyi ya mwego ibi poo. ²¹ Gumsambile, Loola, nuugitabicha ata wa ino inywa, ugana nishidogya gino mbuga gyolihugana. ²² Abilo, ubesinina ubo,yulu nishigila inywa yoyose ndaa na byoligingila moo. Wa biyo china lya giya mbuga gigisilwe Soali. ²³ Chuba libele lya hutobowa hegulu ha sii Luti haligingile Soali. ²⁴ Haho noo MLUME helinyeshiche hegulu ha Sodoma na Gomola abigo na ahyaauhuma hegulu ha MLUME. ²⁵ Gugwishiche mamo mabuga na Ibetabeta yose, na bose bene bashamine mmamo mabuga, na byose bimenine mnda giya sii. ²⁶ Haho mmachi gwa Luti gulingamine unyuma wage, gugaliwile uba ihanda ya miinyu. ²⁷ Iblahimu guchuwile halwelo ugya ugimana haya halibele mgimanyu na MLUME, ²⁸ nage gulingamine ubii lwa Sodoma na Gomola na sii gyose gya iya Ibetabeta, gumonine, na loola ,mii gwa ibaloo gwasela, nahi mii gwa lwenge. ²⁹ Bibyo Abetcha halidogiche mamo mabuga ma Ibetabeta, Abetcha aengeleche Iblahimu, gummuminye Luti mnda usona byelidogiche maya mabuga melishamine Luti. ³⁰ Luti guchuwile uhuma Soali gushamina uloono, na bawamisiha bage bopi hamwechi nage, yulu gusinine ushama Soali. Gushamine mnda miao, gee na bawamisiha bage. ³¹ Guya mmosobu gumsambile mnunage, Setu gusili mmungu, na hashi ata mlumyana mnda gino sii gatugingilile nahimishaminyi gya ibaloo yose. ³² Biyo, na tumnywishe setu malwa, tulale nage.yulu tumusile setu ibushi yage. ³³ Banywishiche sabo malwa buya busugu, guchiwile guya mmosobu nulala nage, na Luti gushibele na mwano helilalile na heligile. ³⁴ Haho lusugu lwa mabili mmusobu gumsambile mnunage,Loola, nalala mnakeshi na tata, tumnywishe iyaka malwa buno busugu, wagingile na walale nage. ³⁵ Banywishiche iyaka sabo malwa buya busugu, guchuwile mnuna batu gulalile nage,na Luti gushi na mwano helilalile na helihumine. ³⁶ Haho babo bawamisuiha ba Luti baswalile magumo ma sabo. ³⁷ Guya mmosobu gubushile mwaana, gumgishile china lyage Moabu, ata na lino. ³⁸ Na guya mnuna batu nage gubushile mwaana gumgishile china lyage Benami; gugo noo sabo na Baamoni ata na lino.