¹ MLUME gumchwilile Iblahimu alibu na miamba gya Mamle, helibele mashame ha mchango gwa itula yage mchuba mango ma yuda iingi. ² Guginuine meeso mage gumonine, na loola, batu batatu bagimanyu umbele wage. Nage helibamonine guhingile abilo ugya ubagaa uhuma ha mchango gwa itula, guginamine ndaa na hasi, ³ guganine, MLUME gwanyi, nambo ninamona yano u meeso mobe nilihusaba ushipita abilo nene mcha gobe. ⁴ Na mahilwe madi macho muligoge umagulu, mulihoche nahi ha guno mti. ⁵ Nene namme iliwa icho, mulitoleleche mitima, hanyuma mwabegya, nambo mwamchwila mcha gwenyu. Baganine, Ai lugu, gilaga nahi byawadogoma. ⁶ Bibyo Iblahimu gudambuile na ugya witula uli Sala, guganine, dambuwa na ulingilile tubada tutatu twa busu bwa lebelebe, usupaganye, uchele mikati. ⁷ Iblahimu guhingile abilo ugya u mgoma, guleshile mwana ng'ombe gwa mmochu, na msoga, gummele mgichi, nage guhiile abilo. ⁸ Guguhile buleba na mabele, na mwana ng'ombe gwelihiile, gubabiile umbele wa meeso mabo, gulimene alibu nabo hasi ha mti, nabo balile. ⁹ Bamsambile, Guli uhi Sala mmachobe? Gugaile, guli nda itula. ¹⁰ Gumsambile, chigilwe niugiwilila moka mano mengo mwaa gwichwa, na loola, Salammachobe gwipata mwaana gwa mlumyana. Sala guhuliche haya ha mchango gwa itula yine ibele hanyuma hage. ¹¹ Haho Iblahimu na Sala basibele miungu, na myaa gyabo giingi, na Sala gusibele gwahuhwa umona bya baachana. ¹² Wa bibyo Sala guseile mnda mtima gwage, guganine, nisile mmungu, nimona saso, na mlumyanyi mmote? ¹³ MLUME gumsambile Iblahimu, Yulu yai Sala gwaseya na gwagana, Winene Nene nibuta mwaana, na nene nahuota? ¹⁴ Hali inywa nai ya igumu umima MLUME? Wa mengo mage nimchwila, moka mano mengi ma mwaa, Sala gubi na mwaana gwa mlumyana. ¹⁵ Sala guhaninye, ugana Nisaseya, bululi gumonine booba. Nage guganine, MLUME guganine iyaka waseya. ¹⁶ Hanyuma babo batu bachuwile na haya na uhugulula byenyi byabo lubi lwa Sodoma. Iblahimu gugile hamwechi nabo gabashindiche. ¹⁷ MLUME guganine, Wi wii! Nam'bise Iblahimu ihisho yandihugila, ¹⁸ Iblahimu gabeba ilongo yata, yinauoma, na ihitila gee mioga gyose gya ibaloo bilihalila mihaa? ¹⁹ Bululi nigidi gwibasambila baana bage, na ndu gyage hanyuma hage bawashi ndila gya MLUME, bagile kiine na uonona, yulu MLUME nage gam'bwilidiche Iblahimu malagano mage. ²⁰ MLUME guganine, Bululu lilo lya Sodoma na Gomola yachili, na bubii bwabo bwabula abisa, ²¹ mndi, nisala na namone byabalihugila bili nahi lilo linjwilile; na nambo bishibyo niimana. ²² Bibyo baya batu bahumine uya bagile luubi lwa Sodoma; hahoIblahimu gwilibele mgimanyu umbele wa MLUME. ²³ Iblahimu gummyile , gumganine, Wi wii! wihyagila bene bina kiine hamwechi na basone? ²⁴ Nambo habeba bene bina kiine maumi matano mnda mbuga wibahyagila, na ushinashiga mbuga yulu ya baya maumi matano bina kiine balimo? ²⁵ Nangu ushigile bibyo, ummaga mine gwina kiine hamwechi na msone, gwa kiine gabe nahi mtu msone. Nangu! Mmononyi gwa ibaloo yose gashigile kiine? ²⁶ MLUME guganine, Nabemona mnda Sodoma beene bina kiine maumi matano mmbuga, nigileya bihana byose wa yulu yabo. ²⁷ Iblahimu guganine, Bino naosha udogoma na MLUME, na nene nili ihwili na mto kaa. ²⁸ Hange banahunguwa batano u baya maumi matano beene bali na kiine, wii! wihaga mbuga gyose wa uhungula batu batano? Gunanine, nishihaga inangwa balimo batu maumi nana na batano. ²⁹ Iblahimu gugililile udogoma nage, guganine, Hange banamoneya mmo batu maumi mana? Guganine, nishigila yulu ya babo maumu mana. ³⁰ Guganine, MLUME gashibe na sungu, nene nadogome, Hange banamoneya batu maumi matatu? Guganine nishigila nambo nabemona mmo batu maumi matatu. Guganine, Loola, nilihugililila udogoma na MLUME, hange banamoneya ubo batu maumi mopi? Gumgaile, Nishidogya wa yulu ya babo maumi mopi. ³² Guganine, MLUME gashibe na sungu, nene nidogoma luno lwendo lumwechi kaa, Hange unamoneya uya batu umi? Gumganine, Nishihaga wa yulu ya batu babo umi. ³³ Haho MLUME halihwile udogoma na Iblahimu guligile lwage; Iblahimu nage gugiwile wesushama