¹ Ablamu halihyile mtu gwa myaa maumi yahabuna na yahabula, MLUME gumchilile Ablamu, gumsambile, Nene noo Abetcha Dambe, ugyate umbelewanyi, ube gwam'bwilile. ² Na nene nibiya malagano manyi hawingi hanyi na gogwe, na nene niubicha abisa abisa ³ Ablamu gumginamine ndaa na hasi. Abetcha ammsambile, aganine, ⁴ Nene, malagano manyi mandabiye nobe, na gogwe ubi babo gwa mioga giingi, ⁵ ata china lyobe ushigiswa iyaka Ablamu, mndi china lyobe lisibi Iblahimu, yulu nuubiya uba babo gwa mioga giingi. ⁶ Niuita ube na milongo giingi abisa, na nene niuita ube mioga, na maoolo mihuma oli. ⁷ Malagano manyi nimaita uba masugu mose hawingi hanyi na gogwe, na ilongo yobe hanyuma hobe, na bibushi byobe, una malagano ma milumbu, ugana nibi Abetcha oli ba wa ibushi yobe hanyuma hobe. ⁸ Na Nene niuha gogwe na ibushi yobe hanyuma haobe gino sii gyolimshame gya bugenyi, sii gyose gya Kanaani, uba buhyana bwa milumbu; na nene nibi Abetcha obe. ⁹ Abetcha amsambile Iblahimu, Gogwe uwashe malagano manyi, gogwe na ilongoyobe wa bibushi byabo hanyuma hobe. ¹⁰ Mano noo malagano manyi moli washa, hawingi nahi nobe, na ibushi yobe hanyuma hobe, Mlumyana gegese gwenyu gwigya kumbi. ¹¹ Mwigya kumbi, ugechwa afili a nyama chenyu, na iyo ibi isagaya malagano hawingi hanyi nenyu. ¹² Mwaana gwenyu gwa masugu njwii gwigechwa kumbi, mlumyana gegese mnda bibushi byenyu, m'buswa gwa mndu, gwamgulwe na bumona bobe, mgenyi gegese gushi gwa ibushi yobe. ¹³ m'buswa gwa mndu mobe, na gugulilwe wa bumona bobe, utaga na ushutaga gagye kumbi; na malagano manyi mabi hamibili gyenyu, uba malagano ma milumbu. ¹⁴ Na mlumyana gegese gushimgibe kumbi afili a nyama gyage, gugo mtu gwibagulwa na batu bage; gwabele malagano manyi. ¹⁵ Abetcha amsambile Iblahimu, Salai mmachobe, gushigiswa china lyage Salai iyaka, wa bibyo china lyage gwigiswa Sala. ¹⁶ Nene nimmala mihaa, na iyaka niuha mwaana weli, ehe, nimmala mihaa, nage gubi mmabaana ba mioga, na maoolo ma milongo gya batu bihuma weli. ¹⁷ Haho Iblahimu gumginamine ndaa ha hasi gee nuuseya, gudogomine mnda mtima, Wi wii! Mtu gwa myaa sambi, wage unabuswa mwaana? Nage Sala gwina myaa maumi yahabula? ¹⁸ Iblahimu gumsambile Abetcha, Nambo ii Ishimaeli gwisuba na mwego umbele obe. ¹⁹ abetcha aganine, Bishi bibyo, chigilwe ii Sala mmachobe noo gwiubutila mwaana gwa mlumyana, na gogwe wimgita china lyage Isaka. Na nene nibiya malagano manyi masugu mose weli uba malagano ma milumbu wa yulu ya ibushi yage hanyuma hage. ²⁰ Na wa mwano gwa Ishimaeli niuhuliche, nimmalile mihaa, nim'bucha, na nene nimlibiya abisa abisa,Gwibuta baana ba maoolo umi na babili, na nene nimita gabe mmoga gwata. ²¹ Bibyo malagano manyi nimabiya magimanyu masugu mose uli Isaka, guya mine Sala gwiubutila mengo nahi mano mwaa gwichwa. ²² Abetcha aleile udogoma nage, Abetcha agile uhuma uli Iblahimu. ²³ Iblahimu gumguhile Ishimaeli mwanage, na bose beene babushilwe mndu mwage, na bose bene bagulilwe wa bumona bwage, balumyana bose ba mndu gya Iblahimu, gubagishiche kumbi gya tufili twa nyama chabo loka luya lusugu, nahi bimsambile Abetcha. ²⁴ Nage Iblahimu gubele na myaa maumi yahabula na yahabula heligile kumbi cha afili age. ²⁵ Na Ishimaeli mwanage gubele mtu gwa myaa umi na gitatu, heligile kumbi gya afili a nyama chage. ²⁶ Loka luya lusugu Iblahimu gugile kumbi hamwechi na mwanage Ishimaeli. ²⁷ Na batu bose ba mndu gyage, babushilwe mndu gyage, na beligulile na bumona u mmuboo ma mginyi, bagile kumbi hamwechi nage.