¹ Bibyo Salai mmachi gwa Ablamu gushim'butile mwaana, nage gubele na mtu gwa mgilo, Mmisili, china lyage Hajili. ² Salai gumsambile Ablamu, Bino hano, MLUME gupambile gumo nashibute; mndi ugingile uli mgichi gwanyi hange mnapata ibushi weli. Ablamu guhuliche lidi lya Salai. ³ Salai mmachi gwa Ablamu nuguha Hajili Mmisili mgichi gwage, hanyuma ha Ablamu ushama mnda sii gya Bakanaani myaa umi, gummele Ablamu mlumyage, gabe mmachage. ⁴ Haho Ablamu gumngilile Hajili, nage guswalile gumo. nage helimonine gwaswala gumo, mnwge gwa mgilo, gubele gwa hasi u meeso mage. ⁵ Salai gumsambile Ablamu, Bubii bwapata buli yulu yobe; niuhele mgichi gwanyi myaali mobe; nage helimonine gwaswala gumo, nene nisili gwa hasi u meeso mage. MLUME gaonone hawingi hanyi na gogwe. ⁶ Nage Ablamu gumsambile Salai, Loola, mgichi gobe guli mmuboo obe, umgilile yoyose ili isoga u meeso mobe. Salai gumsusule, Hajili gusinine uhuma u meeso mage. ⁷ Malaika ma MLUME mammonine Hajili ha msula gwa madi mlwanaganywa, msula guli mndila gya ugya Shuni. ⁸ Gumsambile Hajili, gogwe mgichi gwa Salai, ulihuhuma uhi, na gogwe ulihugya uhi?guganine, Nene nasina uhuma uli mago gwa mgilo Salai. ⁹ Malaika ma MLUME mamganine, Giwila uli mmobe gwa mgilo, ulisache hasi ha maboo mage. ¹⁰ Malaika ma MLUME mamganine, Chigilwe niibucha ibushi yobe, ishibalwa wa yulu babi beengi. ¹¹ Malaika ma MLUME mamsambile, Looma! Gogwe uli na gumo, wibuta mwaana gwa mlumyana, gogwe wimgita china lyage Ishimaeli,bululi MLUME gwahulicha lilo lya asusus obe. ¹² Nage gubi nahi bende hawingi ha batu, uboo wage ubi hegulu ha batu bose na uboo wa batu bose ubi hegulu hage, nage gwishama umbele wa bashiwabo bose. ¹³ Gugishile china lya MLUME mine gudogomine nage, Gogwe uli Abetcha asumona, yulu aganine, Ata hano nimmonine gee gumbonine? ¹⁴ Wa bubyo ishima iya igitilwe Beel-lahai-loi. Loola, ili hawingi ha Kadeshi na Beledi. ¹⁵ Hajili gum'butule Ablamu mwaana gwa mlumyana; Ablamu gumgitile china lyage Ishimaeli, guya mwanage, gubushilwe na Hajili. ¹⁶ Nage Ablamu gubele mtu gwa myaa maumi inana na mtuba, haho Hajili helim'butule Ablamu mwaana.