¹ Hanyuma ha bibyo bihisho inywa ya MLUME ichwilile Ablamu u malo ma mtima, iganine, Nangu uwa booba, Ablamu, Nene nilingabo gyobe na alambwe oba aata abisa. ² Ablamu gunanine, Ee Mlume ABETCHA, Wiipa ii, na nene nishi na mwaana, na gwihana ndu gyanyi ii gugu Eliezeli Mdameski? ³ Ablamu guganine, Loola ushipele lubuto, na mtu gubuswa mnda nduu gyanyi noo byana gyanyi. ⁴ Nayo inywa ya MLUME ichwilile na ugana, Gugu gushi uhyana, haho mine gwihuma mnda muunda chobe noo mine gwiuhyana. ⁵ Gumtobole hambuga, guganine, Loola bino hegulu, baala tumbala-mbala, nambo wiosha utubala. Gumsambile, Noo bibi ibushi yobe. ⁶ MLUME gumsambile, nage gum'balile iyo ihisho uba ii kiine. ⁷ Hanyuma gumsambile,Nene nili MLUME, niuhuminye sii gya Uli wa Bakaladayonuuhe gino sii uguhyane. ⁸ Guganine, Ee Mlume ABETCHA, niosha umana ugana niihyana ino ibaloo? ⁹ Gumsambile, upe mwana ng'ombe gwa myaa gitatu, na diba, na mwaana gwa akundulu. ¹⁰ Ablamu gummele bibyo byose, gubigadule bibaa bibili, gubiile kila ibaa ulola inge nage, gushigadule tu tunonyi. ¹¹ Na mengo masalile maubi hegulu ha bitumba Ablamu gumachingile. ¹² Na chuba halitulile usendama tulo twa bushito tumlemine Ablamu, booba bwa mdo gwa masolo gumgwilile. ¹³ MLUME gumsambile Ablamu, Umane chigilwe ugana ibushi yobe ibi igenyi mnda sii gishi gyage, bibagilila baya batu, nabo bisusulwa myaa sambi china. ¹⁴ Ata na guya mmoga, gwabigilila, bibaonona, hanyuma bihuma na bitundu biingi. ¹⁵ Gogwe noo wigya u bamasobe wa talala, wichiwa mnda buoto busoga. ¹⁶ Na ilongo ya buna noo yigiwila hano; bululi ushinawilila usona wa Baamoli. ¹⁷ Habele, chuba halichindile mdo guchwile, loola, lulindi lwa mii na mwenge gulihulama guhitile hawingi ha biya bihindi bya nyama. ¹⁸ Luya lusugu MLUME gubiile alago na Ablamu, guganine, ibushi yobe naiha gino sii, uhuma ludi lwa Misili ndaa na lulo ludi lwa lwata, ludu Flati. ¹⁹ Mkeni, na Mkenizi na Mkadmoni, ²⁰ na Mhiti, na Mpelezi, na Mlefai, ²¹ na Mwamoli, na Mkanaani, na Mgilgashi, na Myebushi.