¹ MLUME gumsambile Ablamu, Huma gogwe mnda sii gyobe, nailongo yobe, na ndu gya sobe, ugye ndaa m sii gyandiumonya; ² nene niuita gogwe ube mmoga gwata, na uuhalila mihaa, na uliginuna china lyobe; na gogwe ube mihaa; ³ na nene nibahalila mihaa bene biuhalila mihaa, nage gwiuloga nene nimloga; na mnda mobe bilongo byose bya sii bihalilwa mihaa. ⁴ Bibyo Ablamu gugile, nahi bimsambile MLUME; Luti gugile hamwechi nage. Nage Ablamu gubele mtu gwa myaa maumi njwii na gitano helihumine Halani. ⁵ Ablamu gumguhile Salai mmachage, na Lutu mwana gwa mshiwabo, na bitundu byabo byose byabapashile uya Halani, Bachuwile yulu bagye sii gya Kanaani; nabo bagingile m sii gya Kanaani. ⁶ Ablamu guhitili m'bwingi na sii ndaa na ihana ya ihaha noo Shekemu; ndaa na ubutambikilo bwa Mole. Na ba Kanaani maya masugu bashamine mnda giyo sii. ⁷ MLUME gumtobwele Ablamu , guganine, ibushi yobe nibaha gino sii. Nage uya gumgimyile MLUME butangilo mine gumtobwele. ⁸ Hanyuma guhumine ubo gugile u loono luli lubi lwa mlugulu mwa Babeli, gugimiye hema lyage; gubele na Betheli luubi lwa igolo, na Ai luubi lwa mlugulu, gumgimyile MLUME butambikilo obo, gugishile Chila lya MLUME. ⁹ Nage Ablamu gugile, na ugilila ubi lwa uboo uachi. ¹⁰ Haho mndi habele ndala mnda giya sii; Ablamu gugile Misili, gashame uya mamwe mengo bululi ndala gibele gingi mnda sii. ¹¹ Helibele alibu na ugingila Misili, gumsambila Salai mmachage, Loola, nigidi uli mmachana gwina buhungwe; ¹² mndi habibi, Bamisili habiumona bigana, Gugu ii mmachobe; bibyo biipaga nene na gogwe biushiga na mwego. ¹³ Ibumbu ino ugane, gogwe ili kachanyi, byabe bisoga wandi yulu yobe, na ichuli-chuli yanyi ya mwego yabe poo yulu yobe. ¹⁴ Mndi haho hahiile Ablamu Misili, Bamisili bammonine gugo mmachana ugana gee ii hungwe abisa. ¹⁵ Baata ba Falao bammonine, nabo bamtonine uli Falao; bibyo gugo mmachana guhililwe mndu gya Falao. ¹⁶ Falao gumgilile Ablamu bosoga yulu ya Salai; Ablamu guhelwe miyoo na ng'ombe, na punda cha milume, na baacha na bagichi, na punda cha maota, na ngamiya. ¹⁷ Haho MLUME guhuli Falao na ndu gyage gyose wa bihulo byata, wa yulu ya Salai, mmachi gwa Ablamu. ¹⁸ Bibyo Falao gumtile Ablamu, guganine, Iyii ino yawapisha? Yulu yai usasambila ugana gugu ii mmachobe? ¹⁹ Yulu yai wagana, Gugu ii kachanyi, ata byandamguha uba mmachanyi? Bino hano, gugo mmachobe ubemguha, uligile lobe. ²⁰ Falao gulagile batu yulu yage, bamshindiche undila, na mmachage, na byose byelibele nabyo.