¹ Sii gyose gibele na lidi limwechi na mdogomenyi gumwechi; ² Mndi batu habagile luubi lwa mlugulu bamonine sii gya ibandabanda mnda sii gya Shinali; bashamine ubo. ³ Basambilene, Bino na tuhule biliki tubichele waahyaa. Babele na biliki pahali pa mawe, na bumba pahali pa luhemba. ⁴ Baganine, Bino, na tuligubaile mbuga, na tugubae itu ya ilahu ugya hegulu, songo gyage gihiye umatimba, na tuliginyiye china beswe bene; bululi tushimwagiye hegulu ha ibaloo yose. ⁵ MLUME gusalile gamone mbuga na itu ya ilahu yabali hugubaa batu. ⁶ MLUME guganine, Loola, bano batu ii ilongo imwechi, na lidi lyabo ii limwechi; na bino noo byabahutula ugila, na ata bino bashichibilwa na itu yabalihubenja ugila. ⁷ Bino mndi tusale ubo, tuba bulaganinye mdogomenyi gwabo yulu bashi hulichane binywa byabo boo wa boo. ⁸ Bibyo MLUME gubasambaleche uhuma ubo bagye m sii gyose; boo nuuleya ugubaa giya mbuga. ⁹ Yulu ya iyo ibalo china lyage gigisilwe Babeli; bululi haho noo hene MLUME heli bulaganye ludi lya sii gyose; na uhuma ubo MLUME guba sambaliche bagye mnda sii gyose. ¹⁰ Bino noo bibushi bya Shemu; Shemu gubele mtu gwa myaa sambi genubota Alfaksadi myaa gyopi hanyuma ha imbi ludi. ¹¹ Shemu gushamine hanyuma ha ubuta Alfaksadi myaa sambi chitano, gubushile baana balume na baachi. ¹² Alfaksadi gushamine myaa maumi matatu na gitano, genubuta Sela, ¹³ Alfaksadi gushamine hanyuma ha ubuta Sela myaa sambi china gitatu, gubushile baana, balume na baachi. ¹⁴ Sela gushamine myaa maumi matatu, genuubuta Ebeli. ¹⁵ Sela gushamine hanyuma ha ubuta Ebeli myaa sambi china na gitatu, gubushile baana balume na baachi. ¹⁶ Ebeli gushamine myaamaumi matatu na gina, genubuta Pelegi. ¹⁷ Ebeli gushamine hanyuma ha ubuta Pelegi myaa sambi china na maumi matatu, gusbushile baana balume na baachi. ¹⁸ Pelegi gushamine myaa maumi matatu, geenubuta Leu. ¹⁹ Pelegi gushamine hanyuma ha ubuta Leu myaa sambi chibili na yahabula, gubushile baana balume na baachi. ²⁰ Leu gushamine myaa maumi matatu na gyopi, genubuta Selugi. ²¹ Leu gushamine hanyuma ha ubuta Selugi myaa sambi chopi na njwii, genubuta baana ba balumyana na ba baachana. ²² Selugi gushamine myaa maumi matatu, genubuta Naholi. ²³ Selugi gushamine hanyuma ha ubuta Naholi myaa sambi chopi, genubuta baana ba balumyana na ba baachana. ²⁴ Naholi gushamine myaa maumi mopi na yahabula, genubuta Tela. ²⁵ Naholi gushaminne hanyuma ha ubuta Tela myaa sambi gimwechi na umi na yahabula, gubushile baana ba balume na ba baachi. ²⁶ Tela gushamine myaa maumi njwii, gubushila Ablamu, na Naholi, na Halani. ²⁷ Na ino noo ilongo ya Tela. Tela gubushila Ablamu, na Naholi, na Halani. Halani gubushile Luti. ²⁸ Halani guwile hambele ha sage Tela mnda sii gyebushilwe, noo, mnda Ulu wa Bakaldayo. ²⁹ Ablamu na Naholi galiguhile baachi. China lya mmachi gwa Ablamu gugitilwe Salai, na china lya mmachi gwa Naholi gugitilwe Milka, msiha gwa Halani, gee nogubele sabo gwa Milka na Iska. ³⁰ Na Salai gubele igumba, gushibele na mwana. ³¹ Tela gumguhile Ablamu mwanage, na Luti mwana gwa Halani, midulwage, na Salai mmage buo, mmachi gwa Ablamu mwanage, bahumine bose Uli wa Bakaldayo, bagye sii gya Kanaani, bahiile ndaa na Halani bashamine ubo. ³² Masugu ma Tela mabele myaa sambi chibili na gitano; Tela guwile haya Halani.