¹ Bino noo bibushi bya baana ba Noa, Shemu, na Hamu, na Yafeti. Na wabali ubushilwe bawambaga hanyuma ha imbi ludi. ² Baana ba Yafeti ii Gomeli, na Magogu, na Madai, na Yavani, na Tubali, na Mesheki, na Tilasi, ³ Na baana ba Gomeli ii Ashkenazi, na Lifathi, na Togama. ⁴ Na baana ba Yavani, ii Elisha, Talshishi, Kitimu, na Walodani. ⁵ Wa babo sii gwa wibega ya mioga giligabulile uba sii gyabo, gyogyose na lidi lyage, wa bubuswa bwabo, ulamana na mioga gyabo. ⁶ Na baana ba Hamu ii Kushi, na Misili, na Putu, na Kanaani. ⁷ Na baana ba Kushi ii Seba, na Havila, na Sabta, na Laama, na Sabteka. Na baana ba Laama ii Sheba, na Dedani. ⁸ Kushi gubushile Nimlodi, noo gutulile uba mtu gwa uoma wingi mnda sii. ⁹ Gubele mtu mmomu wa uhiba nyama umbele wa MLUME. Wa bibyo batu basugana, Nahi Nimulodi, mmomu wa uhiba nyama umbele wa MLUME. ¹⁰ Buolo bwage butulile Babeli na Eteku, na Akadi, na Kalne, mnda sii gya Shinali. ¹¹ Guhumine mnda giya sii nuugya Ashulu, gugubae Ninawi, na Lehoboth-ili, na Kala; ¹² na Lesini, hawingi ha Ninawi na Kala, nagyo ii mbuga gyata. ¹³ Misili gubushile Baludi, na Baanami, na Balehabi, na Banaftuhi, ¹⁴ na Bapathlusi, na Bakasluhi; ubo noo uhumine Bafilisti na Bakaftoli. ¹⁵ Bakanaani babushile Basidoni, mwanage gwa mtangi, na Hethi, ¹⁶ na Bayebusi, na Baamoli, na Bagilgashi,, ¹⁷ na Bahiti, na Bamwalki, na Bamsini, ¹⁸ na Balvadi, na Basemali, na Bahamathi. Hanyuma noo ibushi ya Bakanaani basambalele. ¹⁹ Na lugumba lwa Bakanaani ii utula uhuma Sidoni wa ndila gya Gelalindaa na Gaza; iyaka wa ndila gya Sodoma, na Gomola, na Adma, na Seboimu, ndaa na Lasha. ²⁰ Babo noo baana ba Hamu, ulamana na ubuswa wabo, wa lidi lyabo, mnda bibalo byabo, ulamana na mioga gyabo. ²¹ Nage Shemu noo sabo gwa baana ba Ebeli, na mmulwage na Yafeti, gubushile baana. ²² Baana ba Shemu ii Elamu, na Ashulu, na Alfaksadi, na Ludi, na Alamu ²³ Na baana ba Alamu ii Usi, na Huli, na Getheli, na Mashi. ²⁴ Alfaksadi gubushile Sela, Sela gubushile Ebeli. ²⁵ Ebeli gubushila baana bopi na balumyana; china lya gwa mtangi ii Pelegi, bulumbulwilo ii ugana ha masugu mage sii gigabwile; na china lya mshiwabo ii Yoktani. ²⁶ Yoktani gubushile Almodadi, na Selefu, na Hasalmawethi, na Yela, ²⁷ na Hadolamu, na Uzali, na Dikla, ²⁸ na Obali, na Abimaeli, na Seba, ²⁹ na Ofili, na Havila, na Yobabi. Babo bose noo baana ba Yoktani. ³⁰ Bushamo bwabo bubele uhuma Mesha wa ndila gya Sefali, loono lwa mlugulu. ³¹ Babo noo baana ba Shemu, ulamana na ubuswa wabo, na lidi lyabo, mnda bibaloo byabo ulamana na mioga gyabo. ³² Babo noo baana ba Noa ulamana na ubuswa wabo, ulamana na bibushi byabo, mnda mioga gyabo; na wa gigyo mioga giligabulile mnda sii hanyuma ha imbi ludi.