¹ Abetcha ahalile Noa mihaa na baana bage, gumsambile, Butanywe, mwabule, mwagiluche ibaloo. ² Nyama choose cha mmibaloo chyimsina benywe na umwa iduba, na tunonyi tose twa ha hululu; hamwechi na batu bose byababela bagiluchu bitete, na swii chose cha m'bahali; byabiwa mmaboo menyu. ³ Yoyose ilihugyata ili na mwego ibi iliwa yenyu, nahi byandibahele bi iliwe na byanyi, byoka biya namma bino byose. ⁴ Bibyo nyama hamwechi na mwego, nugana, mashi mage mushimaye. ⁵ Chigilwe mashi menyu ma mwego gwenyu nimasaba; ugana mnda uboo wa nyama niubucha; na mnda uboo wa mtu, mnda uboo wa mshiwabo nisaba mwego gwa mtu. ⁶ Nine gwigesa mashi ma mtu, mashi mage gugo migeswa na na mtu, bululi wqa mlingilisho gwagwage Abetcha tummitile mtu. ⁷ Benywe butanywe, mulibuche abisa; butanywe abisa mnda sii, mubule mnda mwayo. ⁸ Abetcha amsambile Noa, na baana bobe hamwechi nobe, guganine, ⁹ Nene loola, nigimiya malagano manyi nenyu; iyaka na ibushi yenyu hanyuma henyu; ¹⁰ iyaka na ibumbwa yose yina ili na mwego ili hamwechi nobe, tunonyi, na nyama cha usugwa, na nyama chose cha mgala mnda sii hamwechi nenyu; chose chilihuhuma mnda bwato, na yoyose yine ili na mwego mnda sii. ¹¹ Na alago anyi niagimiya nenyu; na yoyose yine yina m'bili ishibangwa iyaka na madi ma imbi ludi, hanyuma ha bibyo, udogya sii. ¹² Abetcha aganine, ino noo yumanya ya alago anduhuita hawingi nanyi na benywe,na bibumbwa bili na mwego byose bili hamwechi nenyu, wa bibushi byose ata na milumbu. ¹³ Nene nabiya mmita mbula gwanyi u matimba, nago bubi ii yumanya alago hawingi hanyi na sii. ¹⁴ Ata inangwa ninaganda matimba hegulu ha sii, mmita mbula gwimoneya umatimba, ¹⁵ Nene niaengelecha alago anyi, ene ali hawingi hanyi na benywe, na ibumbwa yose yina mwego hawingi ha byose bili na m'bili, na madi mashibi imbi ludi iyaka ubadogya bose bene bali na mibili. ¹⁶ Mndi gugo mmitambula gubi umatimba; nene nigulola bululi naengeleche alago a milumbuene aliho hawingi ha Abetcha naibumbwa yoyose ili na mwego hawingi ha bose bene balina m'bili ili hano ha mgala. ¹⁷ Abetcha gumsambile Noa, Ino noo yumanya alago andibiile hawingihanyi na bose bene bali na m'bili bali mnda sii. ¹⁸ Baana ba Noa bene bahumune mnda bwato, ii Shemu na Hamu na Yafeti; na Hamu noo sage na Kanaani. ¹⁹ Bano batatu babele baana ba Noa na ulamana na babo sii gyose gyawilila batu. ²⁰ Noa gutulile uba mlimi, guunine mizabibu; ²¹ gee nuunywa divai, nuolwa; gee nuba buchi mnda itula yage. ²² Hamu, sage gwa Kanaani, gumonine buchi bwa sage, gubasambile bashiwabo babilibene babele hambuga. ²³ Shemu na Yafeti baguhile ichwalaganywa, baigandile umaombe mabo bose babili, bagile inyuma nyuma, bawilile buchi bwa sabo; na byenyi byabo bibele hulola unyuma, bashimonine ata buchi bwa sabo. ²⁴ Noa hammololowe boolwa bwage, gumanine bimgilile mwanaga gwa mmala. ²⁵ Guganine, Na galogwe Kanaani; Gubi mcha abisa gwa bashiwabo; ²⁶ Guganine, Na gahewe buswachi Abetcha a Shemu; Na Kanaani gabe mcha gwage. ²⁷ Abetcha ammele Yafeti iba yata ya ibaloo. Na gashame mnda itula ya Shemu; Na kanaani gabe mcha gwage. ²⁸ Na Noa gushamine iyaka hanyuma ha imbi ludi ginge myaa sambi chitatu na maumi matano. ²⁹ Masugu mose ma Noa mabele myaa sambi yahabula na maumi matano. gee nuuwa.