¹ Na bibyo bihisho habihwile ugiliya, bauulu bapyile, baganine, Batu ba Isilaeli, na bibuli, na Balawi, bashigubalile na batu ba bino bibaloo, bagilile ulamana na uchigilicha wabo, noo, wa Bakanaaani, na Bahiti, na Bapelizi, na Bayebusi, na Baamoni, na Bamoabu, na Bamisili, na Baamoli. ² Bululi baguhila misiha gyabo uba baachi babo, na baachi ba baana babo; biino biguma bya bihaha byalisupaganya na batu ba bino bibaloo, ehe, uboo wa baosobu na bata ba ihwilo noo babagolwele mnda uno uluba. ³ Nene handihuliche bibyo, nigulile bichwalaganywa byanyi na ichibabo yanyi, nilichulile njuli cha mswe mwanyi, na alembe anyi, nishamine wa ugagilwa. ⁴ Haho basumbile wandi batu bose bene badandile na binywa bya Abetcha a Isilaeli, wa ibalo ya uya uluba wa batu ba ubululwa; nene nishamine wa ugagilwa ndaa na mengo ma lutangi lwa igolo. ⁵ Na mengo ma lutangi lwa igolo niginyuwe hanyuma ha ulisacha wanyi, bichwalaganywa byanyi na ichibabo yanyi byahugulwa, nigwile mmachwi nibungule maboo manyi umbele wa MLUME, Abetcha anyi. ⁶ niganine, Ee Abetcha anyi, nadamba mme,namona abule uginuna yenyi yanyi umbele obe, Abetcha anyi, bululi usona wetu uli wiingi, na wahuhiya ndaa nahegulu ha miswe gyetu, abachi etu abula na ahiya ha gulu. ⁷ Utula ha masugu ma bamasetu tubele na abachi uhima lulingo ndaa nalino; na wa ibalo ya usona wetu beswe, na maoolo metuna bibuli byetu, twabiya mnda maboo ma maoolo ma bini bibaloo, twahulwa wa ahilu, twawaswa kola, twasapwa bitundu byetu, twabiwa abule byenyi byetu, nahi bino lino. ⁸ Na hano wa mengo macho twahewa yano ya MLUME, Abetcha etu, na gwatushigila mihona gihogononywe, gutuhele huubiya ugulu ha ihana yage ya ihaha. Abetcha etu atubiye lwenge mnda meeso metu, tulitoleleche mnda uhambwa wetu. ⁹ Bululi beswe tuli bacha; bibyo Abetcha etu ashituleile mnda bucha bwetu, bibyo gutulangile mnda uleelela wage, umbele wa maoolo ma Baajemi, yulu ya ulitolelecha, ugigimiya ndu gya Abetcha etu, na ugilongya hene habeleye, gatuhe lukuta mnda Yuda na Yelusalemu. ¹⁰ Na hano, Ee Abetcha etu, gugane ii hanyuma ha biino? Bululi twaleya alago obe, ¹¹ uliganine u milomo gya bagichi bobe, bambuwa, uganine, Giya sii gyamulihugya wagili yulu ya ugihyilila, m sii gya bunyenye, yulu ya bunyenye bwa batu ba giya sii, yulu ya uchigilicha wabo, byauli ugiluche utula lulu luubi ndaa na lulu luubi, wa bunyenye bwabo. ¹² Biino, mushibahe baananbabo misiha gyenyu, na mushiguhe misiha gyabo uba baachi ba baana banyu, na mushibasabile talala na uba na bibya milumbu; bululi mwabe na uioma, na uya manona ma gigyo sii, na ubashigila baana banyu gibe buhyana bwa milumbu. ¹³ na hanyuma ha bibyo byose byine bitupashile wa ibalo ya bigilanywa byetu bisone, na wa yulu ya abachi etu ene ali aata, uba gogwe Abetcha etu usatuonona nahi byatulingye yulu ya buubi bwetu, iyaka watuha mihona; ¹⁴ wi wii! Tubele iyala alago obe, twalilunge na batu balihugila bya ubo uchigilicha, wa ugondana nabo? Wi wii! Usaba chigililwa yulu yetu na utuhaga abisa, hashishigale mihona gyogyose, na ata mtu gwa uhogonowa? ¹⁵ Ee MLUME, Abetcha a Isilaeli, gogwe noo gwa kiine, bululinbeswe tushigele, mihona gihogonowe, nahi bino lino; loola, beswe tuli hano bino na abachi u meeso mobe; bululi hashi mtu gunaosha ugimana u mbele obe wa ibalo ya ino ihisho.