¹ Bino bano noo baosobu ba bibushi bya bamasabo, naluno noo lubalo lwa bene bagile hamwechi nanyi uhuma Babeli, mengo ma uhyilila wage oolo Altashasta. ² Baana ba Finehasi, Gelshoni; ba baana ba Ithamali, Danieli, ba baana ba Daudi, Hatushi, baana ba Shekania; ³ ba baana ba Palushi, ba baana ba Zekalia; na hamwechi nage babalilwe nahi lubalo balumyana sambi na maumi matano. ⁴ Ba baana ba Pahath-Moabu, Eliehoenai, baana ba Zelahia; pamoja nage balulyana sambi vhopi. ⁵ Ba baana ba zatu, Shekania, baanaba Yahazieli; na hamwechi nage malumyana sambi chitatu. ⁶ Na ba baana ba Adini, Ebedi, mwaana gwa Yonathani, na hamwechi nage balumyana maumi matano. ⁷ Na ba baama ba Elamu, Yeshaya, mwaana gwa Athalia, na hamwechi nage balumyana maumi njwii. ⁸ Na ba baana ba Shefatia, Zebadia, mwaanangwa Mikaeli; na hamwechi nage balumyana maumi inana. ⁹ Ba baana ba Yoabu, Obadia, mwaana gwa Yehieli; na hamwechi nage balumyana sambi chopi na umi na inana. ¹⁰ Na ba baana ba Binui, Shelomithi, mwaana gwa Yosifia; na hamwechi nage balumyana sambi na maumi mtuba. ¹¹ Na ba baana ba Bedai, Zakalia, mwaana gwa Bedai; na hamwechi nage balumyana maumi mabili na inana. ¹² Na ba baana ba Azgadi, Yohana, mwaana gwa Hakatani; na hamwechi nage balumyana sambi na umi. ¹³ Na ba baanaba Adonikamu, babo noo babele ba isula, na mamo noo machina mabo, Elifeleti, na Yeueli, na Shemaya; na hamwechi nage balumyana maumi mtuba. ¹⁴ Na ba baana ba Bigwai, Uthai, mwaana gwa Zabudi, nan hamwechi nage balumyana maumi njwii. ¹⁵ Nibasumbiche ha mgwilo gwa luudi Ahava; na uya tugimiya bitula byetu mengo ma masugu matatu; nibabagule batu na bibuli, na nishimonine haho baana ba Lawi ata gumwechi. ¹⁶ haho nitumine batu ugya umgita Eliezeli, na Alieli, na Shemeye, na Elnathani, na Yalibu, na Elnathani, na Nathani, na Zakalia, na Meshulamu, bene babele baosobu; na Yoyalibu, na Elnathani nage, babele bagigya. ¹⁷ Nibahilile wa Ido, mmosobu, uya Kasifai; nibasambile, byabimsambila Ido, na bashiwabo baya ba babachi ba batu, uya Kasifai, ugana batuhilile batu bene bigila mnda ndu gya Abetcha etu. ¹⁸ Na nambo uboo wa misa wa Abetcha etubyaubele hamwechi netu, bamletele Ishekeli; gumwe gwa baana ba Mali, mwaana gwa Lawi, mwana gwa Isilaeli; na Shelibia, hamwechi na baana bagena bashiwabo batu umi na inana. ¹⁹ na Hashabia, na hamwechi na Yeshaya, ba baana ba Melali, na bashiwabo na baana babo, batu maumi mabili; ²⁰ na hawingi ha babachi ba batu, bene Daudi, na baosobu, bene bababiile yulu ya mgilu gwa Balawi, buubala batu sambi chibili na maumi mopi; bose balumbulwe wa machina mabo. ²¹ Haho niganine yulu ya uhamba, haya ha luudi Ahava, bululi tuoshe ulisacha umbe wa Abetcha, na uenga wage ndila gya gigolobu, yulu yetu beswe bene na wa yulu ya baaba betu na wa yulu ya bibya byetu. ²² Bululi nimonine abule umsaba oolo ihichi ya bilume pambwa na bachinyi ba falasi, yulu ya utuwatilicha u tumangu mndila; bululi tusibele twahudogoma na oolo, tuganine, Uboo wa Abetcha uli hegulu ha batu bose bene bali hummenga, ubagilila bisiga; bino uosha wage na uchigililwa wage uli pugu lubanga u bose bene bali bamshige. ²³ Haho tuhambile, tumtendelele Abetcha etu wa yulu ya bibyo; nage gutugitabiche. ²⁴ Haho nibagule batu umi na babili ba batu ba bibuli, nabo noo Shelebia, na Hashabia, na batu umi ba bashiwabo hamwechi nabo, ²⁵ nene nibalingilile wa bushito bwa luya lufeza, na nolo na biya bitundu, lutangi yulu ya ndu gya Abetcha etu, bene oolo na bahungi bage na baata bage, na Baisilaeli bose bene babele ho, byabatangile; ²⁶ nene nibabiile mmaboo mabo talanta cha lufezasambi mtuba na maumi matano na bitundu bya lufeza sambi; na talanta sambi cha nolo; ²⁷ na bilego maumi mopi bya nolo, ugulwa wage nahi dolkoni uki; bitundu bibili bya mmubo bisoga byugema, ugulwa wage nahi nolo. ²⁸ Hanyuma nibasambile, Benywe musili bahaha wa MLUME, na bibyo bitundu bisili bihaha; lufeza na nolo ii lutangi lwa uhana wa mtima wa MLUME, Abetcha a bamasetu. ²⁹ Biino, lingaminywe, na ubiusa bino bitundu, ndaa na byine byamwibilingilila u mbele bauulu ba bibuli, na Balawi, na baata ba bibushi bya bamasabo na Isilaeli, uya Yelusalemu, mnda byumba bya ndu gya MLUME. ³⁰ Bibyo bibuli na Balawi bagaile buya bushito bwa lufeza na nolo, na bitundu, yulu ya ubihila Yelusalemu mnda ndu gya Abetcha etu. ³¹ Haho tugile uhuma u luudi Ahava masugu umi na mabili ma mwechi ma mwechi gwa gutangi, yulu yuugya Yelusalemu; na uboo wa Abetcha ubele hamwechi netu, gutuhogonone na uboo wa amangu, na mtu gwa utuhiba mndila. ³² Bibyo tuhiile Yelusalemu, tushamine ubo masugu matatu. ³³ Na lusugu lwa mana, luya lufeza na chiya nolo chilingililwe mnda ndu gya Abetcha, bibiilwe mnda maboo ma Melemothi, mwaana gwa Ulia, ibuli,na hamwechi nage habele Eleazeli, mwaana gwa Finehasi; na hamwechi nabo Yozabadi, mwaanagwa Yeshua, na Noadia, mwaana gwa Binui, Gwa Lawi; ³⁴ bibyo bitundu byose wa lubalo na wa bushito bwabyo; iyaka bushito bwabyo bose bugolilwe mamo mengo. ³⁵ Na baana ba ubululwa, bene bahumine uya wababululwe bamtangile Abetcha lutangi lwa uchigya, ng'ombe umi na chibili wa yulu ya Baisilaeli bose, na miyoo gya milume maumi yahabula na mtuba, na na baana ba miyoo maumi njwii na njwii, na malunga umi na mabili ma mabuchi, uba lutangi lwa buubi, mamo namo mose mabele lutangi lwa uchigya wa MLUME. ³⁶ Babahele batu ba ugimana ha ihana ya oolo, na baata ba mabuga ba m'bwala wa Luudi, bilagile oolo; nabo babahele batu, na mbwatilicho gya ndu gya Abetcha.