¹ Hanyuma ha bibyo bihisho, mengo ma uhyilila wage Altashasta, oolo lya Baajemi, Ezla, mwaana gwa Selaya, mwaana gwa Azalia, mwana gwa Hilkia, ² mwaana gwa Shalumu, mwaana gwa Sadoki, mwaana gwa Ahitubu, ³ mwaana gwa Amalia, mwaana gwa Azalia, mwaana gwa Melayothi, ⁴ mwaana gwa Zelahia, mwaana gwa Uzi, mwaana gwa Buki. ⁵ mwaana gwa Abishua, mwaana gwa Finehasi, mwaana Eliezeli, mwana gwa Haluni, ibuli ya yata. ⁶ gugo Ezla guselile uhuma Babeli; nage gubele mgochi mmuhu mnda m'bindo gwa Musa, gwine huhanene MLUME, Abetcha u Baisilaeli; nage oolo gummele byose byeli benjiche, nahi bibele uboo wa MLUME hamwechi nage. ⁷ Nabo basalile bamwe baana ba Isilaeli, na ba bibuli, na Balawi, na bagimbi, na bugimana u mchango, na bagichi, yulu yuugya Yelusalemu, ha mwaa gya njwii gwa oolo Altashasta. ⁸ nage Ezla guhiile Yalusalemu mwechi gwa butano gwa mwa gwa gugo oolo. ⁹ Bululi gutulise usala uhuma Babeli lusugu lwa lutangi lwa mwechi gwa gutangi, nage guhiile Yelusalemu lusugu lwa lutangi lwa mwechi gwa butano, nahi uboo wa usoga wa Abetcha age byaubele hamwechi nage. ¹⁰ Bululigugo Ezla gubele hulosha mtimagwage uenga m'bindo gwa MLUME, na ugugila, na ugigya bilagilwe nauonona mnda Isilaeli. ¹¹ Biino, noo bigolilwe mguya makanda, oolo Altashasta gwine gummele Ezla, ibuli, mgochi, ehe, mgochi gwa binywa bya alago a MLUME, na wa m'bindo gwage gwine gwelihele Isilaeli. ¹² Altashasta, oolo lya maoolo, wa Ezla, ibuli, mgochi gwa m'bindo gwa Abetcha a ha gulu, salamwa gya giwilile; na byoka biya. ¹³ Nahana alago ugana bose bene bali ba batu ba Isilaeli, na bibuli byabo, na Balawi, mnda buoolo bwanyi, gwina malanga ma ugya Yelusalemu wa mitima gyabo boo bene, bagye hamwechi nanyi. ¹⁴ Bululi watumwa na oolo, na bahungi bage njwii yulu ya ubucha mwano gwa Yuda na Yelusalemu, wa m'bindo gwa Abetcha obe guli mmaboo mobe. ¹⁵ na uguha nolo na lufeza byine oolo, na bahungi bage, wa utaga wabo, bamtangila Abetcha a Isilaeli, gulimshame Yelusalemu; ¹⁶ na lufeza lose na nolo cholimona mnda mikoba gya Babeli, hamwechi na bitu byabitangila batu wa utaga wabo, na bitundu bya bibuli byabatangili wa utaga wabo, yulu ya ndu gya Abetcha abo gyine gili Yelusalemu. ¹⁷ Bululi bwa bibyo ugule wa bubo bumona bisuganywa, miyoo gya milume, baana ba miyoo, hamwechi na lutangi lwabo lwa busu, na lutangi lwabo lwa byuunywa; gogwe wibitangila hegulu ha butambikilo bwa ndu gya Abetcha enyu, gili Yelusalemu. ¹⁸ Na inywa yo yose yine yamwimona isoga ugilwa gogwe na bashiwemyu, wa luya lufeza na nolo chine chishigala, iyo igilwe, nahi bisuunda Abetcha enyu. ¹⁹ Na biya bitundu byolihewe wa mgilo gwa ndu gya Abetcha obe, bigiwile umbele wa Abetcha a Yelusalemu. ²⁰ Na yo yose yine yiengwa abisa, wa yulu ya ndu gya Abetcha obe, yiulingye uihana, ihane mnda ndu gya m lindo lya oolo. ²¹ Na nene ehe nene, oolo Altashasta, nabaha alago bose bene bali huusa lindo, bene bali m'bwala mwa Luudi, ugana, inywa yoyose yine Ezla, ibulimgochi gwa m'bindi gwa Abetcha a ha gulu, yelitaga wamli, na igilwe wa chigilwe chiingi, ²² ata wa uhima talanta sambi cha lufeza, na ulingilila sambi wa ngano, na mabesenyi sambi ma divai, na mabesenyi sambi ma mauta, na miinyu nangu ubucha bwiingi bwago. ²³ Inywa yoyose yine yiganywa na Abetcha a ha gulu, na igilwe winene wa yulu ya ndu ya Abetcha a ha gulu. Bululi bwai hamoneye uchigililwa yulu ya buoolo bwa oolo na baana bage? ²⁴ Iyaka tulihumsambila yulu ya mwano gwa bibuli, na Balawi, na bagimbi, na bugumana u mchango, na babachi na batu, na bagichi na gino ndu gya Abetcha, bishi bisoga ubasaba mlambu, na bumona bwa lusungulo, na mbuli bululi bose noo bagichi ba ndu gya Abetcha. ²⁵ Na gogwe Ezla, wa ulamana na lwengu lwa Abetcha obe luli mmuboo obe, babiye tululiya na bagechi ba milandu,bene bibaonona bato bose bali m'bwala mwa Luudi, noobose bene bagidi alago a Abetcha obe; umgigye guya mine gusiagidi. ²⁶ Na mtu gegese gushihuunda ugugila m'bindo gwa Abetcha obe, na m'bindo gwa oolo, na gagigiwe wa alima kelela, nambo iyuhagwa, nambo iyubululwa, nambo iyusapwa bumona bwage, nambo iyuhambwa. ²⁷ Na gaginunywe MLUME, Abetcha a bamasetu, gubiile inywa nahi ino mnda mtima gwa oolo, ugitogola ndu gya MLUME gili uya Yelusalemu. ²⁸ Nage gwamonya yano yage u mbele wa oolo, na bahingi bage, na umbele wa bahela bose ba oolo bene bina uosha. Nene nibiilwe uoma, wa ulamana na uboo wa MLUME, Abetcha anyi, byaubele hamwechi nayi, nibasumbiche baosobu bose mnda Isilaeli, bululi bagye hamweichi nanyi.