¹ Haho oolo Dalio guhanene alago, na baengikle mnda ndu mikanda gya masugu ma mwechi na mwaa, haya hene habiilwe giya migolouya Babeli. ² Na lumwe lusungulo lumoneye uya Akmetha, mnda ndu gya oolo gili mnda mkoba gwa Baamedi, na mnda mwalo bino binywa bigolilwe yulu biengelechiwe. ³ Ha mwaa gwa gutangi gwa ooko Koleshi, oolo Koleshi guhanene alago, Yulu ya mwano gwa ndu gya Abetcha uya Yelusalemu, gigyo nsdu na gigubawe, ha ihana ya balutangila lutangi lwa nyama, na mishingi gyage gigimiwe na uiswa giomu abisa; uginyuwa wage uba maboo maumi mtuba, na bwata bwage bube maboo maumi mtuba; ⁴ ulimbamanya milongo gitatu gya mawe ma maata, na alimba amwechi a miti gya gihya; ugulwa wage wahume mnda ndu gya oolo. ⁵ Na bitundu bya nolo na bya lufeza , bya ndu gya Abetcha byine oolo Nebukadleza byeliguhile mnda ndu gya Abetcha, uya Yelusalemu, guchwile nabyo ndaa na Babeli, bigiwichiwe, byagingichiwe iyaka mnda ihwilo yine ili uya Yelusalemu, kila imwechi yabiwe ha ihana yage, na gogwe wabibiya mnda gya Abetcha. ⁶ Bino hano, benywe, Tatenai, mmata gwa mbuga gya m'bwala Luudi, na Shethal-Bozenai, na babo beenenyu ba Baajemi, bene muli m'bwala mwa Luudi, libagulwe na iyo ihana ⁷ guleewe gugo mgilo gwa ndu gya Abetcha, mushiguchibile; balewe baata ba mabuga ba Bayahudi na bauulu ba Bayahudi, bagigubae ndu gya Abetcha ha ihana yage. ⁸ Iyaka, nahana alago bwamwibagilila babo bauulu ba Bayahudi, yulu ya guno mgilo gwa ugubaa ndu gya Abectcha; na bumona bwa oolo, noo, wa mlambu gwa ibaloo yine ili m'bwala mwa Luudi, babo batu bahewe bumona bose wa chigilwe, yulu bashigimwe. ⁹ Na kila mtu yelihubenja, uba ng'ombe cha migenda,na miyoo gya milume, na baana ba miyoo, yulu ya lutangi lwa uchigya lwine lwabimtangila nalo Abetcha a ha gulu,na ngano, na minyu, na divai,, na mauta, nahi biya bibuli byine bili Yelusalemu byabigana, na bahewe bibyo bitundu byose lusugu wa lusugu, mushihulwe ubaha; ¹⁰ baoshe umtangila Abetcha a ha gulu lutangi lwa chumba lisoga, na umsabila oolo, na baana bage, babe na mwego. ¹¹ Iyaka nahana alago ugana, mtu gegese mine gwihyatulanya ino inywa, mwamba gwahunyiwe u ndu gyage, gaginunywe na usundiwa hegulu hago; iyaka ndu gyage gyaiswe uba chala yulu ya ino inywa. ¹² Na ano Abetcha, ene aitile china lyage lishame haya, na gachimye maoolo mose, na batu bose, bene bigolola maboo mabo uihyiila ino inywa, na ugigugicha gino ndu gya Abetcha, gyine gili Yelusalemu. Nene, Dalio, nahana ano alago; na agilwe wa alima kelela eengi. ¹³ Haho Tatenai, mmata gwa mbuga gwa m'bwala Luudi, na Sheth=Bozenai, na beenabo, bagilile bibyo wa abilo, bululi oolo Dalio gutumine batu wabali. ¹⁴ Nabo bauulu ba Bayahudi bagubae, babele na bitundu, wa bwatilicho gya ulisamba wabo Hagai mbuwa na Zekalia mwaana gwa Ido, Bagubae, bahwile mgilo gwabo, wa alago a Koleshi, na Dalio, na Altashasta oolo lya Ubaajemi. ¹⁵ Gigyo ndu gyo nuuhwa lusugu lwa matatu lwa mwechi gwa Adali ( Ahuhu teba; Budogo matoswe ), ha mwaa gwa uhyilila wage oolo Dalio. ¹⁶ Na baanaba Isilaeli, na bibuli na Balawi, na bange batu hawingi ha baya bene babululwe, bagibiile ndu yulu ya mgilo gwa Abetcha wa saso. ¹⁷ Na hugibiya ndu yulu ya mgilo gwa Abetcha, batangile lutangi, ng'ombe sambi, na miyoo gya milumesambi chibili, na baanaba miyoo sambi china, iyaka batangile malunga ma mabuchi umi na mabili, uba lutangi lwa buubi yulu ya ba Isilaeli bose, wa lubalo lwa mioga gya Isilaeli. ¹⁸ Bababiile ba bibuli wa usobolwa wabo, bababiile Balawi wa uyesha wabo, wa yulu ya mgilo gwa Abetcha, gwine gubele uya Yelusalemu; byoka biya nahi byabigolilwe u mkanda gwa Musa. ¹⁹ Hanyuma, baana ba ubululwa baitile Pasaka, mwechi gwa gutangi masugu umi namana ma mwechi, ²⁰ Bululi bibuli na Balawi babele balihahache bose hamwechi; bose babele bagibe kumbi; bashinjiche Pasaka yulu ya baana bose baubululwa, na wa yulu ya bashiwabo bibuli, na wa yulu ya bichuli-chuli byabo bya mwego. ²¹ Baana ba Isilaeli balilile, baya bagiwile uhuma sii gya ubululwa wabo, nanbatu bose hamwechi nabo bene balibagule na buubi bwa mioga gya sii, bululi bwa ummunda MLUME Abetcha a Isilaeli, ²² baitile lusugu lwa ulihocha lwa mikati gishi gyagibiwe mshimi wa saso, wa mengo ma masugu njwii; bululi MLUME gwabaseelela, na ugalula mtima gwa oolo lya Ashulu, gabagalwile, yulu ya ubabiya maboo mabo uoma mnda gugo mgilo gwa ugubaa ndu gya Abetcha, ABETCHA a Isilaeli.