¹ Bibyo bambuwa Hagai na Zekalia mwaana gwa Ido, bababuile bubuwa Bayahudi bene babele m Yelusalemu na Yuda; babuwile bubuwa wa yulu ya china lya Abetcha a Isilaeli. ² Haho noo hachuwile Zelubabeli, mwaana gwa Shealtieli, na Yoshua, mwaana gwa Yosadaki, bo nutula ugubaa ndu gya Abetcha giya gili Yelusalemu; na hamwechi na baya benebabele bambuwa ba Abetcha, babawatiliche. ³ Mengo moka maya Tetanai, mmulu gwambuga gya m'bwala mwa Luudi, na Shethal-Bozenai, na bange nabo, babachwilile, babasambile, Mnanyi gummele alago a ugubaa gino ndu, na ubihwa bino bibambacha? Haho bababudiche bino, Machina ma bene balihugubaa ii ba nanyi na nanyi? ⁵ Bibyo liiso lya Abetcha libele hegulu ha bauulu ba Bayahudi, babo bashibachile, ndaa na guya mwano hagummyile Dalio, haho noo himoneya alambwe a guya mkanda. ⁶ Guno noo mgolo nahi gwine gwabahilile oolo Dalio; na Tatenai, mmata gwa mbuga gwa m'bwala mwa Luudi, na Shethal-Bozenai, na beenage ba Baajemi, bene babele m'bwala mwa Luudi, ⁷ bammilile mgolo nabo; na bino binywa bigolilwe mnda mwago; Wa Dalio oolo salamwa abisa. ⁸ Na gamane ugana benswe twahihwa ugingila mnda sii gya Yuda, twahiya ndaa na undu gya ABETCHA a aata, gyine gigubawe wa mawe ma maata, na miti gibiwe u lukuta lwage, na guno mgilo gwagililila wa alima kelela, na ushama mnda maboo mabo. ⁹ haho tubudiche baya mauulu, tubasambile bino, Mnanyi gummele alago a ugubaa gino ndu, na uhwa ino ibambacha? ¹⁰ Iyaka tubabudiche machina mabo, bululi tuusambile gogwe,bululi tugole machina ma baya batu bene babele baata babo. ¹¹ Batusambile bino, baganibe, Bweswe yuli bagichi ba Abetcha a gulu na sii, beswe tulihuguba ndu gyine gigubawe aala abisa, hahuhita myaa giingi, gyine oolo lya Isilaeli gyiligubae na ugihwa. ¹² Ata bibyo bamasetu habamchigiliche Abetcha a gulu na sii, na helichigililwe, gubabiile mnda uboo wa Nebukadleza, oolo lya Babeli, Mkaldayo, nage noo gudogiche gino ndu, gubawashile batu kole ndaa na Babeli. ¹³ Haho ha mwaa gwa gutangi gwa Koleshi, oolo, guhanene alago iyaka a ugubawa ndu gya Abetcha. ¹⁴ Na bitundu bya nolo na bya lufeza bya ndu gya abetcha, byeliguhila Nebukadleza mnda ihwilo yine ili uya Yelusalemu, na ubigingicha mnda ihwilo ya Babeli, butundu oolo Koleshi gubihuminye mnda ihwilo ya Babeli, bihelwe mtu , china lyage Sheshbaza, mine gwilibiile mmata gwa mbuga; ¹⁵ nage gumsambile Guha bino bitundu, ugye, wabibiye nda ihwilo yine ili uya Yelusalemu, na ndu gya Abetcha gyagubawe ha ihana yage. ¹⁶ Haho guya Sheshbaza helichwile, gugimiya mshingi gwa ndu gya Abetcha gyine gili Yelusalemu; na utula maya mengo ndaa na lino gili hugubawa, na gishi nahwa ugubawa. ¹⁷ Biino, hano, oolo gabemona bisoga, batu na baenge mnda ndu gya lindo lya oolo, lyine lili ubo Babeli, nambo m winene ugana oolo Koleshi guhanene alago a ugigubaa gigyo ndu gya Abetcha m Yelusalemu, na oolo gatuhilile mwano gwa ubenja wage mnda ino ihisho.