¹ Bibyo tumangu twa Yuda na Benyamini, habahuliche ugana baana ba ubululwa balihumgubaila MLUME, Abetcha a Isilaeli, Lubynga, ² bamgilile Zelubabeli, na baosobu ba milongo gya bamatata, bamsambile, Na tugubae na beswe hamwechi neenyu; wa bululi tulihuaenga Abetcha enyu nahi benywe, beswe tulihumtangia utula aala a Esal-hadoni, oolo lya Ashulu, gutusediche ndaa nahano. ³ Haho Zelubabeli, na Yoshua, na baosubu bange ba milongo gya bamatata mnda Isilaeli, babasambile, Benywe bishi bimlolee uhulichana netu wa umgubaila Abetcha etu ndu, mndi ii beswe buchima bwetu twimgubaila MLUME, Abetcha a Isilaeli, ndu, nahi oolo Koleshi, oolo lya Baamedi byalitusambile. ⁴ Mndi haho batu ba gigyo sii balabeche maboo ma batu ba Yuda, babadegiche, hababele hugubaa. ⁵ Baengile batu bubaha malanga, yulu ya uhanya mmungo gwabo, masugu mose ma Koleshi, oolo lya Baajemi, ndaa na mengo ma uhyilila wage Dalio, oolo lya Baajemi. ⁶ Iyaka, mengo ma uhyilila wage Ahasuelo, ubutulilo bwa uhyilila wage, batu bagolile mashitaki yulu ya bashami ba Yuda na Yelusalemu. ⁷ Na iyaka, ha masugu ma Altashasta, Mithledathi, na Taabeli na mihona bya benaage, bamgolele Altashasta, oolo lya Baajemi, salamwa cha luhanga lusoga; na nigolo gya mkanda gugo, gugolilwe wa lidi lya Ialamu, na na ugogomwa mnda lidi lya Ialamu. ⁸ Nabo Lehumu, Mlume gwa mihungo, na Shimshai, mgochi, bagolile mkanda yulu ya Yelusalemu uli Altashasta, oolo, nahi bino; ⁹ Lehumu, Mlume gwa mihungo, na Shimshai, mgochi, na mihona gya benaabo, mgechi gwa milandu gwa Baajemi na balochi ba mabuga ma Baajemi; na Baalkewi, ba Babeli, Bashushani, noo, Baelami; ¹⁰ na mihona gya mioga, bene Asul-bani-pali mmusobu, gwa lwenyi, gubadabulile, na uashamya mmbuga gya Samalia, na binge bihana, m'bwala mwa luudi na ugililila. ¹¹ Gugo noo mkanda gwabammilile oolo Altashasta; Bagichi bobe, batu bene bali m'bwala mwa Luudi; na ugililila. ¹² Bimanyiye ugana Bayahudi bene bagile uhuma oli, bahiya wetu Yelusalemu; na balihugigubaa giya mbuga gya ubenga, gibi; bahuhwa bibambacha byage, na ugimiya mishingi gyage. ¹³ Bino, bimanyiye uli oolo, ugana gino mbuga gibegubawa, na bibambacha byage bibehwa, bashihana mlambu, na ata mishaminyi, na ata mbuli, na isula yage oolo babi na alugi. ¹⁴ Na beswe, yulu tuli huya miivyu gwa mndu gya oolo, na bishi bisoga beswe umona ulihugililwa oolo bya buhulihuli, bino twahila batu bululi tumme oolo mwano. ¹⁵ Yulu mwano guengwe mnda migolo gya masugu ma mwechi ma bamasobe; haho noo holimana mnda mgolo gwa masugu ma mwechi ugana gino mbuga ii mbuga gya ubenga, gyine gilihubaonona bamaoolo, na bahela ba mbuga, na ugana bashami bage bagillile bya mmonywa mnda giya mbuga gyaala; noo yulu giya mbuga gidigilwe. ¹⁶ Tulihumsambila oolougana gigyo mbuga byagubawa, na bibambacha byage byagimana, ushibi na ibaa m'bwala wa Luudi. ¹⁷ Haho oolo lihilile ugana wage; Wa Lehumu, Mlume gwa mihungo, na Shimshai, mgochi, na bange beenage bene bashamine Samalia na haya hange m'bwala mwa Luudi, Salamwa; uli bose. ¹⁸ Guya mkanda gwamupilile gwasungulwa u meeso manyi, na nene nimanine gyagulihugana. ¹⁹ Niganine, na batu baengile mwano; bimoneye ugana gigyo mbuga aala giitile mmonywa yulu ya maoolo, na ugana ubenga na mmonywa bigiliya mo. ²⁰ Iyaka babele mo maoolo baosobu hegulu ha Yelusalemu, bene bahyiilile sii gyose gili m'bwala mwa Luudi; bahelwe mlambu na mishaminyi na mbuli. 21 Bino muhane alago a ubaleya bano batu mgilo gwabo, gigyo mbuga gishigubawe, ndaa ba hene handihana alago. ²² Iyaka lilolwe, mushilebele nda mwa ino ihisho; yulu yai buubi bugilile, na maoolo mapate udoga? ²³ Na mkanda gwa oolo altashasta hagusominywe u meeso ma Lehumu, Mlume gwa mihungo, na Shimahai, mgochi, na beenabo, bagile Yelusalemu abilo, u Bayahudi, babaleiche wa uoma na wa ushuubenja. ²⁴ Bibyo mgilo gwa ndu gya Abetcha uya Yelusalemu gusungile; nago gusungile ndaa na mwaa gwa bubili gwa uhyilila wage Dalio, oolo lya Baajemi.