¹ Na haguhiile mwechi gwa njwii, na baana Bisilaeli hababele bashame mmabuga mabo, batu basumbile uya Yelusalemu nahi mtu gumwechi. ² Haho noo hagimene Yoshua, mwaana gwa Yosadaki, na bashiwabi bibuli, na zelubabeli, mwaana gwa Shealtieli, na bashiwabo, nabo bagimiye butambikolo bwa Abetcha a Isilaeli, yulu ya utambikila lutangi lwa uchigya hegulu halo,nahi byabili bigolwe mnda m'bindo gwa Musa, mtu gwa abetcha. ³ Bagimiye butambikolo hegulu ha mshingi gwage; bululi bamonine booba yulu ya batu ba giya sii; bamtambikilile MLUME lutangi lwa uchigya hegulu halo, lutangi lwa uchigya lwa halwelo na igolo. ⁴ Baomenenye lusugu lwa ulitucha lwa Bitula, nahi byabigolilwe, batangile lutangi lwa uchigya lwa masugu mose ulamana na ubula wabo, nahi byabilagilwe, nahi byabilingye masugu mose; ⁵ na hanyuma lutangi lwa uchigya lwa ugililila, na lwa abalu a mwechi, nalwa masugu ma ulitucha ma MLUME, mene malagilwe na ubiwa mahaha, na batu bose bamtangile MLUME lutangi wa mtima gwage hululu. ⁶ Utula lusugu lutangi lwa mwechi gwa jwiibatulile umtangila MLUME lutangi lwa uchigya, haho mshingi gwa ndu gya MLUME gubele gushinagimiwa. ⁷ Iyaka bapashile bagubai na babachi ba lufeza; babahele batu ba Sidoni na batu ba Tilo, biliwa, na byunywa, na mauta, bululi balwishe miamba gyuhuma Lebanoni ndaa na Yafawa ndila gya bahali, ulamana na byabahelwe malagano na Koleshi oolo lya Baajemi. ⁸ Ata mwaa gwa bubili gwa uhiya u ndu gya Abetcha, uya Yelusalemu, mwechi gwa bubili, Zelubabeli, mwaana gwa Shealtieli, na Yoshua, mwaana gwa Yosadaki; na bange bashiwabo, bibuli na Balawi, na batu bose, bene behumine mnda mwa ubululwa na uhiya Yelusalemu, batulile; nabo bababiile Balawi, baya bene basili na myaa maumi mopi na bilaha, yulu ya ugimena mgilo gwa ndu gya MLUME ⁹ Haho noo hagimene Yeshua, na baana bage na bashiwabo, Kedmieli, na baana bage, baana ba Hodavia, hamwechi, yulu ya ubagimena baya bene balihugila mgilo mnda ndu gya Abetcha; baana ba Henadadi, hamwechi na baana babo, na bashiwabo, Balawi. ¹⁰ Haho bagubai hababiile mshingi gwa lubunga lwa MLUME, babiile babibuli, bachwale bichwalaganywa byabo, bine tusiba, na Balawi, baana ba Asafu, bina magoma bululi bamginune MLUME, nahi bilagile Daudi, oolo lya Isilaeli. ¹¹ Bagimbilane, balihumtona MLUME na uumtona, balihudogoma,Bululi ii gwa yano, bululi yano yage uli Isilaeli ii ya milumbu. Hanyuma batu bose basediche madi mabo, na uita mdodo, habamtonine MLUME, yulu ya ibalo ya mshingi gwa ndu gya MLUME gwahuhwa ugimiwa. ¹² bibyo bibuli biingi, na Balawi, na bauulu ba milongo gya batata, bene bamonine ndu gya gitangi, mengoma mshingi gwa gino ndu hagugimiwe umbele wa meeso mabo, balilile wa lidi liulu; na batu bengi baitile mdodo gwa saso; ¹³ na ata batu bashioshiche ubagula naumana mdodo gwa saso na mdodo gwa pangaa cha batu, na mdodo gwabo guhulichiwe koo abisa.