¹ Hasibele mwaa gwa mtuba, mwechi gwa mtuba lusugu lwa mtuba lwa mwechi, handibele mchame mnda ndu gyanyi, miungu gya Yuda gibele bishame u mbele wanyi, uboo wa Mlume ABETCHA ungwilile uya. ² Haho niingamine, na loola, mlingilisho gwa aahya; utula mlubunda mwage ndaa na hasi, nahi aahya; na utula mlubunda mwage ndaa na hegulu, nahi ugana iy'ugema, nahi langi lya imanjano. ³ Nahe gugolwele nahi mlingilisho gwa uboo, gumbwatile u libutu lyanyi limwechi lya njuli chaunyi; nago mtima gunginune hawingi ha sii na gulu, gupwiiche u Yelusalemu u malo ma Abetcha, ndaa na uchango gwa bugingililo bwa lagala lya mnda lilihulola luubi lwa uboo uachi; ihana yine ibele ibiwe mmishi gwa buwa, gulihubiya buwa. ⁴ Na loola, ubo ugengeda wa Abetcha a Isilaeli ubele haho, ulamana na malo maya mandimonine ha iya ihana ya hululu. ⁵ haho gusambile, Mtu, bino ginuna meeso mobe,ulole luubi lwa uboo wa uachi. Haho niginune meeso manyi, nilolile luubi lwa uboo uachi, na loola, luubi lwa uboo wa uachi lwa mchango, habele guya mmishi gwa buwa, ha iya ihana ya bugingililo. ⁶ Gusambile, Mtu, wi wii! Wabimona byabagila, noo, ubo uchigilicha wata wabalihugila gyigyo ndu gya Isilaeli hano, na naligile lwanyi koo na ha haha hanyi? Biino wimona iyaka uchigilcha wabo unge wata ⁷ Gupyiche ndaa na umchango gwa lagala; nene handilingamine, loola, mndi hali hundu wibambacha. ⁸ Haho gusambile, Mtu, biino uchibule hundu u ino ibambacha; nene nichibule, loola, mndi hali mchango. ⁹ Gusambile, Gingila umone uchigilicha ubii wabalihugila hano. ¹⁰ haho nigingile, niminine, na loola, kila mmoga gwa bichimu, na byiila bya byuchigilicha, na ushiilwa ose wa miishi gyose gya ndu gya Isilaeli, byabiwa u bibambacha ngubi chose. ¹¹ Na batu maumi njwii ba bauli ba Baisilaeli babele bagimanyu hubilola, na hawingi habo gugimene Yaazania, mwaana gwa Shafani; kilagumwechi gwina itu ya uhulila buswenge mmuboo wage, na bushio bwa mii gwa buswenge guselile hagulu. ¹² Hanyuma gusambike, Mtu, wabinona byabagile bauulu ba Isilaeli mnda mdo, kilamtu mnda byumba byage by miishi? Bululi balihugana, MLUME gushihutumona; MLUME gwagileya gino sii. ¹³ Gusambile iyaka, Wimona iyaka biinge byuchigilicha byata byabalihugila. ¹⁴ Iyaka gupyiiche ndaa mchango gwa ugingilila ndu gya MLUME, gwine gubelehulola luubi lwa uboo wa uachi, na loola, baachan bashame balihumlilila Tamuzi. (mmiishi) ¹⁵ Gusambile, Mtu, wamona biino? Wimona iyaka byuchigilicha byaata uhima bibyo byawamona. ¹⁶ Gupyiiche ndaa na ulagala lya mnda mwa ndu gya MLUME, na loola, ha mchango gwa ihwilo ya MLUME, hawingi ha balacha na butambikilo, habele batu nahi maumi mopi na batano, bateile mgongo ihwilo ya MLUME, na byenyi byabo bili hulola luubi lwa mlugulu, nabo bali hutambikila chuba, balihulola luubi lwa mlugulu. ¹⁷ Biino, gusambile, Wabimona biino, Gogwe mtu? Wi wii! iyihisho icho abisa u ndu ya Yuda, bagile uchigilicha wabalihugila hano? Bululi bagiluchwa busapanyi mnda gino sii, iyaka bagiwila unyuma yulu nachigililwe; na loola, babiya mtabi u mmyembe. ¹⁸ Wa yulu ya bibyo nene nigila wa uchigililwa; liiso lyanyi lishileya, na nishibamonena keene, inangwa bilila mmatu manyi wa liidi lyaata, nishibahulicha.