¹ Iyakainywa ya MLUME injwilile, ugana, Na gogwe mtu, Mlume ABETCHA gwagisambila bino sii gya Isilaeli; Noo isula; isula yachwila masunga mose mana na sii. ³ Biino ino isula yubanga, nene niuhilila sungu chanyi, niuonona ulamana na madila mobe; nene niuha uchigilicha obe ose. ⁴ Liiso lyanyi lishiumonena miisa na nishiumonena keene; bino nionona madila mobe, na uchigilicha obe ubi hawingi hobe; haho benywe mwimanaugana nene noo MLUME. ⁵ Mlume ABETCHA gwagana bino; Iyihisho isone, ihisho isone ya ndila gishi-gishi, Lingamina ulihuchwa. ⁶ Isula yahuhwa uchwa, ino isula yahuchwa; yahubyuwa yubange; lingamina, yahuchwa. ⁷ Mwando gubi gobe gwahuchwa, gogwe mine uli mshame mnda gino sii; mengo mahuhiya, luya lusugu lwahuhiya, lusugu lwa alugi,na lushi lwa useelela u koono. ⁸ Biino hano hoka nihongolola uchigililwa wanyi hegulu hobe, nihongolola sungu chanyi hegulu hobe,nene niuonona ulamana na madila mobe, nene niuchunguluya ucigilicha obe ose. ⁹ Liiso lyanyi lishileya, na nishimona keene; niuhamba na uchigilicha obe ose ubi hawingi hobe; na benywe mwimana ugana nene, noo MLUME, nahula bihulo. ¹⁰ Lingamina, yahuchwa, mwandu gubi gobe gwahuchwa; lubango lwahusola, anene ahutipuka. ¹¹ Busapanyi bwaginyuwa, boo nuba sangulo gya usona; hashi mtu mine gwishigala hawingi habo, na ata mnda ibushi yabo, na ata itu mnda bumona bwabo; na hashi na ulitundula hawingi habo. ¹² Mengo mahuhiya, lusugu luya lwahuhiya; guya gulihugula gashiseelele, na guya gulihugucha gashinune; bululi uchigililwa wababanga bose hamwechi. ¹³ Bululi mgucha gushi igiwilila ugichiwa, ata uba bili n mwego; bululi mano malo mali yulu ya bose babili; hashi gumwechi gwigiwila; na hashi ata gumwechi gwilibiya uoma yulu ya usona wa mwego gwage. ¹⁴ Bagila tusiba, babiya bitu byose alibu; na hashi gugya u bita; bululi uchigililwa wanyi wababanga bose babili. ¹⁵ Ahilu ali hambuga, na bisumi na ndala bili mnda; guya gulihambuga umabala gwiiwa wa ahilu; na guya guli mnda mbuga, ndala na isumi byimmaga. ¹⁶ Biya bene bisina bisina, nabo babi hegulu ha koono nahi madiba ma wibeta-beta, bose bilila, gegese yulu ya usona wage. ¹⁷ Maboo mose mabi bukokoo, na machwi mose milebela nahi maadi. ¹⁸ Iyaka bilihamba bichwalanywa bya bilembe-lembe, na booba bwibaunina; na abule abi hwgulu ha byenyi byose, na bibanda hegulu ha miswe gyabo gyose. ¹⁹ Bitela bumona bose u masango na ndila ma mbuga, na nolo chabo chibi nahi itu ya bunyenye; lufeza lwabo na nolo chabo chishiosha ubahogonona lusugu lwa uchigililwa wa MLUME; bashinaligyusha mtima gyabo, na bashinaligilucha magumo mabo; wa ibalo bibele ulihyatala wa usona wabo. ²⁰ Na buhungwe bwa ulitogola wage, gee gububiile wiisuba ya buoolo, bibyo boo baitile miishi gya uchigilicha wabo, na bitu byabo bya uchigilicha, mnda mwage; noo yulu naiita uba nahi itu ya bunyenye wabali. ²¹ Nene nibiya hano mnda maboo ma bagenyi habe kole gyabo, na mnda maboo ma babii ba gino sii habi buhibi bwabo; nabo bihadogya. ²² Iyaka nigalula yenyi yanyi ishibaloole, nabo bihasonya ha ihana yanyi ya lubisagulu; na basapi bigingila mmo na uhagugicha. ²³ Loongya myololo; bululi goni sii gyagilula uonona wa maashi, nagyo mbuga gyagilula msapwe yungwe. ²⁴ Wa iyo ibalo nichwisha mioga gya batu babii abisa, nabo bihyilila madu mabo; iyaka nionona anene abo bene bali na uoma; na ihanayabo ya ihaha yibiwa bunyenye. ²⁵ Udoga wahuchwa; nabo bienga talala, nagyo gishimoneya.. ²⁶ Udoga wahuchwa hegulu ha udoga, na mwano gwa ugugila hegulu ha mwano gwa ugugila; nabo bigya uli mbuwa uenga malo; na gugo m'bindo gwimchimina ibuli, na mmungo gwimchimina miungu. ²⁷ Oolo lyilila, na mmata gwichwiwa abule, na maboo ma batu ba ibaloo migongohowa; nibagila ulamana na madila mabo; nene nibaonona ulamana na bili bibalingye boo; nabo bimana ugana nene noo MLUME.