¹ Inywa ya MLUME injilile, ugana, ² Mtu, ugalule yenyi yobe uchilole koono cha Isilaeli, wachibuwile, ³ wagane, Chenywe koono cha Isilaeli, ihulichiwe inywa ya Mlume ABETCHA; Mlume ABETCHA gwachisambila koono na tuoono, na bichiba na bibetabeta; Loola, nene, ehe, nene, nichwisha ahilu hegulu henyu, na nene nidogya ihana yenyu ya iginyubu, ⁴ Na butambikilo bwenyu bubi mauwa, na miishi gyenyu gya chuba gyibeleya; nene nibatela baana benyu bene bawile u mbele wa tuwe lugulu twenyu. ⁵ Nene nitela bitumba bya baana ba Isilaeli u mbele wa tuwe lugulu twabo; nene nisala mauda menyu ngubi chose cha butambikilo byenyu. ⁶ Ihana yoyose yine yamwishama niidogya, na ihana ya iginyubu ibi mauwa; yulu butambikilo bwenyu budogiwe, na uiswa mauwa, na tuwe lugulu twenyu twibelwa, na usunga, na miishi gyenyu gya chuba gigechwe, na ugwishiwa, na migilo gyenyu gichimiwe abisa. ⁷ Na baya bahagilwe bigwa hawingi henyu; na benywe mwimana ugana nene noo MLUME. ⁸ Bibyo nishiga mihona; bululi nibi na bamwe batu bene bisina ahilu hawingi ha mioga, hamubi mwahusaliya mnda bibaloo bya batu. ⁹ Na baya benyu bene bihogononywa bikengeleche hawingi ha mioga, wine wabiwaswa kole, nahi byandi mdogye mitima gyabo gya lusengu, gyine gindeile,na meeso mabo, mene malihugya u masei na u tuwe lugulu twabo; nabo bilionywa bichuli-chuli byabo bya mwego u meeso mabo bo bene, wa ibalo ya usona wabo bo bene, byabagilile wa uchigilicha wabo ose. ¹⁰ Bano bimana ugana nene noo MLUME; nisadogoma bunene ugana nibagila bibyo biibe. ¹¹ Mlume ABETCHA gwagana bino; Hula wa uboo obe na uhule sii wa ugulu obe, wagane luhanga Luubi! Wa yulu ya bichigilicha bisone bya ndu gya Isilaeli; bululi bihangwa wa ahilu, na wa ndala, na wa bisumi. ¹² Guya mine guli koo abisa gwiiwa wa bisumi, na guya mine gwishigala, na ubangwa mnda ndila, gwiiwa wa ndala, bibyo noo byandiwilicha uchigililwa wanyi wa bali. ¹³ Na benywe mwimwnw ugana nene noo MLUME, batu ba wabo benebahagilwe hababi hawingiha tuwe lugulutwabo, ngubi chose cha butambikilo bwabo, hegulu ha koono cho chose cha chilahu, hegulu ha masongo ma koono, na hasi ha kila mti gwine guli na byaanyi bibisi, na hasi ha kila mmamba gwa gwata, hokahaya hene habatambikile buswenge tuwe lugulu twabo tose. ¹⁴ Nene nigolola uboo wanyi hegulu habo, na ugiita sii uba bibunduguchu, iyaka mauwa mabii uhima lwanaganywa luubi lwa Dibla, mnda bushamo bwabo bose; nabo bimana ugana nene noo MLUME.