¹ Hanyuma gupwiiche u mchango gwa ndu, na loola, maadi matobowile hasiha mtataa panya gwa ndu, u ndila gya luubi lwa mlugulu, bululi luubi lwa umbele wa ndu ubelehulola luubi lwa mlugulu; namomaadi masalile uhuma hasi luubi lwa ulume lwa ndu, luubi lwa uboo wa ulume wa butambikilo. ² haho gupwiiche hambuga wa ndila gya mchango gwa luubi lwa oboo wa uachi, gunyunguluye wa ndila gya gya hambuga ndaa na u mchango gwa hambuga, u ndila gyage gilihulola luubi lwa mlugulu; na loola, maadi malihuhuma luubi lwa ulume. ³ Na helihumine guya mtu, gwina binyushi bwa ulingilila nabo mmuboo wage, ugya luubi lwa mlugulu, gulingilile maboo uki, gundabuye maya maadi, maadi mahiile mndaa na mmeeso ma magulu. ⁴ Hanyuma gulingilile maboo uki, gundbule maya maadi, maya maadi mapyiile mmachwi. Hanyuma gulingilile maboo uki, gundabule, maadi mahiile mlubunda. ⁵ Hanyuma gulingilile maboo uki, noo uba luudi lwandishinaosha udabuwa; bululi maadi mahuubula, maadi ma uta bugoga, luubi lushinadabwiiwa. ⁶ Gusambile, Mwanamtu, wi wii! Wamona bino? Hanyuma gunguhile na ungiwicha ndaa na um'bega gwa luudi. ⁷ haho handihwile ugiwila, loola, hibamba ha m'bega gwa luudi habele miti giingi abisa, lulu luubi na lulu luubi. ⁸ Hahp gusambile, Mano maadi mahuma na ugya luubi lwa iaboo ya mlugulu, namo masala ndaa na sii gya Alaba, na ugingila mnda bahali; mahugululwenaugingila mnda bahali, na maadi mage mihonyiwa. ⁹ Iyaka habi, bibumbwa byine bili na mwego bisushama mmaadi, hohose haya hene hihiya chicho ngudi, ibi na mwego; habi na swii chiingi, bululi mamo maadi mahiya na ubo yulu mamo maadi mihonyiwa, na kila itu ibi na mwego hohose hene hihiya lulo luudi. ¹⁰ Iyaka habi, balobi bigimana hoka nalo; uhuma Engedi ndaa na En-eglaimu, habi iyihana ya uganda maila; swii chabo chibi mioga giingi, nahi swii cha bahali lya lyaata, chiingi abisa. ¹¹ Ibi ihana yine ili na biswaswa, na bichiba byage, bishihonyiwa, milewa uba ma miinyu. ¹² Na hoka na luudi, u m'bega gwage, lulu luubi na lulu luubi, gwimene kila mti gwa iliwa, gwine byaanyi byage bishihonga, na biguma byage bishiukumuwa ata; bwiiha biguma bihya byage kila mwechi, bululi maadi mage malihuhuma ha ihana ya ihaha; na biguma byage bibi biliwa; na byaanyi byage bibi buganga. ¹³ Mlume ABETCHA gwagana bino; luni noo lugumba lwine lwigabulanya sii gibe buhyana ulamana na mioga umi na gibili gya Isilaeli; Yusufu, mitala gibili. ¹⁴ Benywe mwigihyilila, gugu mtu lulingo lumwechi na gugu mtu; byandiginunine uboo wanyi ubaha bamasenyu; na gino sii gibi byenyu na buhyana bwenyu. ¹⁵ Na luno noo lugumba lwa sii: luubi lwa uboo wa uachi, uhuma bahali lya lyaata, u ndila gya Hethloni, ndaa na ubugingililo bwa Sedada; ¹⁶ Hamathi, na Belotha, na Siblaimu, gili hawingi ha lugumba Dameski na lugumba lwa Hamathi; na Hasel-hatikoni, gili hoka na lugumba lwa Haulani. ¹⁷ Nalo lugumba uhuma bahali lubi Hasal-enoni, ha lugumba lwa Dameski, na luubi lwa uboo wa uachi ugya luubi lwa uboo wa uachi noo lugumba lwa Hamathi, Lulo noo luubi lwa uboo wa uachi. ¹⁸ Na luubi lwa uboo wa ulume, hawingi ha Haulanina Dameski,na Gileadi na sii gya Isilaeli, lubi luudi Yolodani; mwilingilila uhuma lugumba lwa luubi lwa uboo wa uachi ndaa na u bahali lya mlugulu, Lulo noo luubi lwa mlugulu. ¹⁹ Na luubi lwa uboo wa ulume, uhugulwila uboo wa ulume, lugumba lubi uhuma Tamali ndaa na maadi ma Meliba-Kadeshi, ndaa na luudi lwa Misili, ndaa na bahali lya lyaata. Lulo noo luubi lwa uboo ulume, uhugulwila uboo ulume. ²⁰ Luubi lwa igolo, lugumba lubi bahali lya lyaata, uhuma lugumba lwa uboo wa ulume ndaa na ihana ya bugingililo bwa Hamathi, Lulo noo luubi lwa igolo. ²¹ Haho noo hene hamwiligabulila bichuli-chuli byenyu bya mwego gino sii, ulamana na mioga gya Isilaeli. ²² Iyaka mubi hugabula wa uta luti, uba buhyana bwenyu, na ubagenyi bene bamulihushama nabo nahi bagenyi, bene bibuta baana hawingi henyu, nabo babi wamli, nahi babuswa hawingi ha baana ba Isilaeli; babi na buhyana hamwechi nenyu hawingi ha mioga gya Isilaeli. ²³ Iyaka nambo hali mgenyi mine guli mshame hawingi ha mmoga gogose, gwihewa buhyana hamwechi na gugo mmoga gweli waguli Mlume ABETCHA gwagana.