¹ Mlume ABETCHA gwagana bino; Mchango gwa lagala lya mnda, gyine gulihulola luubi lwa mlugulu gwibugalwa masugu mtuba ma mgilo; na lusugu lwa njwii gwibugulwa. Na mmata gwigingila ndila gya balaha lya mchango guya; luubi lwa hambuga, nage gwigimana hoka na iikwa lya mchango, nabo, ba bibuli bilongya lutangi lwage lwa uchigya, nalutangi lwa talala, nage gwigimana ha mtatala panya gwa mchango; hanyuma gwihuma; na gugo mchango gushibugalwa ndaa na mengo ma igolo. ³ Babu ba gino sii nabo biginama umele wa mchngo wa guya mchango gwa MLUME, masugu ma sabato (ulitucha), na lusugu lwa abalu a mwechi. ⁴ Nalo lutangi lwa uchigya, lwine mmata lwelitangil MLUME lusugu lwa sabato, lubi lwa baana ba miyoo mtuba ba bawilile, na mmoo gwa mlume gwa guwilile. ⁵ Na lutangi lwa busu lubi igodelo imwechi wa mlume gwa mmoo gumwechi, nalutangi lwa busu u baya baana ba miyoo, nahi byeliosha utangila, na chupa limwechi lya mauta wa igodelo imwechi. ⁶ Na lusugu lwa mwechi gwa abalu ubi ng'ombe gya mlume gya mwaana gwa m'bwilile; na baanaba miyoomtuba, na mmo gwa mlume; nabyo bibi bya biwilile. ⁷ Nage gwilongya lutangi lwa busu, igodelo imwechi wa ng'ombe gya mlume, na chupa limwechi wa mlume gwa mmoo, na u baya baana ba miyoo, nahi byiliosha utangila , chupa limwechi lya mauta wa igodeloimwechi. ⁸ Nage mmata heligingila, gwigingila gwigingila wa ndila gya balacha lya guya mchango, nage gwitobowa u gyoka giya ndila. ⁹ Haho batu ba wa ibaloo habichwa umbele wa MLUME u masugu mene malagilwe, guya mine gwigingila undila gya mchango gwa luubi lwa uboo wa uachi yulu ya uginama, gwitobwela u ndila gya mchango gwa uboo ulume; naguya mine gwigingilila ndila gya mchango gwa uboo wa ulume, gwitoboaw wa ndila gya mchngo gwa uboo wa uachi; gushigiwilila u ndila gya mchango gweligingilile waguli, haho gwigimana na ugya u mbele, ¹⁰ Nage mmata heligingila, gwigingila hawingi habo, nabo, habitobowa bitobowa bose hamwechi. ¹¹ Na masugu mamo ma ulihocha, na masugu mange na ulihocha mene malagilwe, lutangi lwa busu bubi igodelo imwechi wa ng'ombe gimwechi, naigodelo imwechi wa mmooo gumwechi gwa mlume, na u baya baana bamiyoo nahi byeliosha uhanana, na chupa limwechi lya mauta wa igodelo imwechi. ¹² Nage mmata, helilongya lutangi lwelitangila wa mtima gwage, lutangi lwa uchigya, nambo lutangi lwa talala, lube lutangi lwelitangila MLUME wa mtima gwage, mtu gumwechi gwim'bugulila mchangoguya gulihulola luubi lwa mlugulu, nage gwilongya lutngi lwage lwa uchigya, na lutangi lwa talala, nahi byesugila lusugu lwa ulihocha; hanyuma gwitobowa, ;hanyuma ha utobowa mtu gumwechi gwibugala mchango. ¹³ Nage gwilongya mwana mmoo gwa mwaa gwa gutangi, m'bwilile, uba lutangi lwa uchigya wa MLUME kila lusugu; kila lusugu halwelo gwimlongya, ¹⁴ Gogwe wilongya lutangi lwa busu bamwechi nagyo kila lweelo, na ibaa ya mtuba ya igodelo imwechi, na ibaa ya butatu ya chupa limwechi lya mauta; usupaganya na busu buya bya nekuneku; lutangi lwa busu wa MLUME masugu mose, wa alago a milumbu. ¹⁵ Bibyo noo byabimlongya mwana mmoo, lutangi lwa busu, na mauta, kila lusugu halwelo, uba lutangi lwa uchigwa masugu mose. ¹⁶ Mlume ABETCHA gwagana bino; Mmata gabemma mwanage gegese uhima, uba buhyana bwage, bubi bumona bwa mwanage; nuuba wabo wa utewa yaanga. ¹⁷ Nambo gabemma mgichi gwage gegese bumwe buhyana bwage, bubi bumona bwage ndaa na mwaa gwelilechiwa uba hululu; haho noo habyimgiwilila mmata mine nabyo; bibyo buhyana bwage, bubo bubi bwa baana bage. ¹⁸ Iyaka mmata gushubasapa batu buhyana bwabo, ata uhachinga wa uoma mnda bihana byabo; gwibaha baana bage u buhyana bwa bumona bwage gee mine, batu banyi bashichwe usaliya, kila mtu koo na byelihelwe. ¹⁹ Hanyuma gupwiiche hawingi ha bugingililo, mabele mobamba mwa mchango, ndaa na ubyumba bya bihaha bya bibuli, byine bibele hulola luubi lwa mlugulu; na loola, habele na ihana, luubi lwa unyuma luli huloola luubi lwa igolo. ²⁰ Gusambile, Ino noo ihana ya bibuli, hababi hubidicha lutangi lwa abachi, na lutangi lwa buubi, habichela lutangi lwa busu; ibalo bashibihyiche hambuga u lagala lya hambuga, na ubahahacha batu. ²¹ Hanyuma gupwiiche ndaa na lagala lya hambuga, gupishiche hoka na masunga mana ma lilyo lagala; na loola, hakila songa lya liylo lagala habele na linge lagala. ²² u mamo masunga mana malagala habele na malagale mene mabele malungane, ulaha wage maboo maumi mana, na bwata bwage maboo maumi matatu; malagala mamo mana ma mibamba mabele na lulingo lumwechi. ²³ Iyaka habele na iisha mnda mwage ngubi chose, umachunguluwa maya malagala mana; iyaka haishilwe ngeso cha abumba cha ubidicha hasi ha ngeso ngubi chose. ²⁴ Haho gusambile, Mano noo madu ma utokoteshecha, mene bagichi ba ndu bitokotesha lutangi lwa batu.