¹ Gogwe na gogwe, mtu, uenge iliki uibiye umbele obe, hanyuma wadabe hegulu hayo mlingilisho gwa mbuga, noo ugana Yelusalemu; ² wagihyiile, wagubae misonge wagili, na ugimiya mgombo wagili; wabiya na tumashamo wagili, wabiya na migogo gya ugibela ugichunguluwa ngubi chose. ³ Hanyuma waenge mgochu gwa igela, wagugimiya gwabe mgumbo gwa igela hawingi hobe gogwe na gigyo mbuga; walingamine hegulu hagyo, nagyo gyienenywa na gogwe wigienena. Bululi yabe isaga u ndu gya Isilaeli. ⁴ Iyaka ubelalila lubachu lobe lwa uboo wa uachi, wabiye usona wa ndu gya Isilaeli hegulu hage; ulamana na masugu mene molilala u lulo lubachu, waulamananabibyo noo byoliuguha usona wabo. ⁵ Bululi nuulaga myaa gya usona wabo ube oli ulamana na masugu , noo, masugu sambi chitatu na maumi mtuba; noo byoliuguha usona wa baana ba Isilaeli. ⁶ Iyaka holiwilicha mamo masugu, wilala iyaka u lubachu lobe lwa ulume, gogwe wiguha usona wa ndu gya Yuda; masugu maumi mana,lusugu lumwechi nahi mwaa gumwechi nuulaga uwiliche. ⁷ Gogwe wihugulula yenyi yobe, luubi lwa uchunguluwa Yelusalemu, na na uboo obe ubi buchi ushi uchwiwe isanjwa, gogwe wibuwa yulu yao. ⁸ Na loola, niubiwa tumangila na gogwe ushiligalula uhuma lulu luubi na ugya lunge luubi lwa bubili, ndaa na byolihwa masugu mobe mose ma uchungulwiwa obe. ⁹ Iyaka uenge ngano, na shayili, na kunde na ibululu, na mabelee, na kusemethi, wabibiye byose mmitanga imwechi, walongye mkati wa bibyo bitu; ulamana na masugu molilala na lubalu lwa masugu molilala u lubachu lobe; noo, masugu sambi chitatu na maumi mtuba wiya gugo mkati. ¹⁰ Na iliwa yobe yoliya yilingililwa, shekeli maumi mopi wa lusugu lumwechi; wiiya u mengo mage. ¹¹ Gogwe winywa maadi ma malingilile hini (ilauli) ugabula nyendo mtuba; wimanywa wa mengo mage. ¹² Na gogwe wiiya nahi mkati gwa shayili, na gogwe wiguchele u mbele wa meeso mobe na tubi twatunyebe na mtu. ¹³ MLUME guganine, Bibyo noo byiiya baana ba Isilaeli iliwa yabo, byaibi ibiwe bunyenye, hawingi ha mioga wine wandibachinga. ¹⁴ Haho niganine, Ee Mlume ABETCHA, loola, mtima gwanyi gusabiwa bunyenye; bululi utula u buwalubaga bwanyi nishilile nyama gyuuwa wa aamo, na ata gyine gihagilwe na iila; na ata nyama gya usgigilicha gishigingile mnda anywa anyi. ¹⁵ Haho gusambile, Loola, nuuha tubi twa ng'ombe hanyuma ha tubi twa batu, gogwe wihiya iliwa yobe hegulu ha tuto tubi. ¹⁶ Iyaka gusambile, Mtu, loola, nibele maudagilo ma iliwa mnda Yelusalemu; nabo biiya mkati wa ugulingilila, na ugubisa abisa nabo binywa maadi wa umalingilila, na wa ugagicha. ¹⁷ yulu bahungwilwe na mkati na maadi, na ugagichana, na ugonda wa yulu ya usona wabo, bashibi na migoma.