¹ Gusambile, Mtu, uye yolihumona; uye guno m'bungo, hanyuma wagye udogoma na baana ba Isialeli. ² haho nigadwile anywa anyi, gee nundisha guya m'bungo. ³ Gusambile, Mtu, ugyushe gumo lyobe, uligiluche gumo lyobena gugo m'bungo gwandiuuha. Haho nilile, nago mmanywa mwanyi gubele saa, nahi saa gya bui. ⁴ Gusambile, Mtu, biino! Bagile baana ba Isilaeli ubasambile binywa byanyi. ⁵ Bululi gogwe usatumwa u batu na binywa bya bigenyi, na ata wa liidi lya ligumu, ila wa ndu gya Isilaeli. ⁶ ushi wa batu ba mioga giingi bene alina binywa bya bigenyi, na liidi lya ligumu, bene boshinaosha umana liidi lyabo. Hashi adugwa nabautuma u babo batu, babuhulicha bisoga. ⁷ Bibyo ndu gya Isilaeli gishiuhulicha gogwe; bululi bashihupulicha nene; bululi ndu gyose gya Isilaeli bali na pala cha byenyi chigumu, na mitima gya anene. ⁸ Loola, nayiita yenyi yobe uba uli byenyi byabo, na pala gya yenyi yobe uba igumu ulipala gya byenyi byabo. ⁹ Bili almasi agumu uhima putu, noo byandiita pala gyobe ya yenyi; Ushimonyi booba, na namgu udidibuwa yulu yabyenyi byabo, inangwa mndu gya lubengo. ¹⁰ Gusambileiyaka, Mtu, binywa byanyi byose byandiusambila, wabigae mnda mtima gobe, na ubihulicha wamatu mobe. ¹¹ Biino! Ugye ubahyila baya batu babululwe, u baana ba batubobe, wadogome nabo, na ubasambile, Mlume ABETCHA gwagana bino; nambo bihulicha, na nambo bashihubenja uhulicha. ¹² Haho mtima gunginune, na nene nihuluche unyuma wanyi liidi nahi uaka wa kuba, lilihugana, Na ugtonywe ugengeda wa MLUME uhuma ha ihanayage. ¹³ Nihuliche mmukulo gwa bihwa-hwa bya biya bibumbwa nyine bilinamwego, habyudane, na utiticha wa biya bichigi mibamba mwabyo, uaka wa kuba gya gyata. ¹⁴ Bibyo mtima gunginune, gunguhile inge ihana; nene nigile wa usuma, na wa sungu chingi mnda mtima gwanyi, na uboo wa MLUME ubele hegulu hanyi wa uoma . ¹⁵ Haho nibahyiile batu bene babululwe, uya Tel-abibu, bene babele bshame hoka na luudi Kebali, nihiile uya wine wababele hushama; nishamine hawingi habo uya mengo mamasugu njwii, mnda ugagilwa wiingi. ¹⁶ Na hasibele, isula ya masugu njwii, inywa ya MLUME injilile, ugana, ¹⁷ Mtu, niubiile ube mlochi gwa ndu gya Isilaeli; bino, hulichainywa ino ilihuhuma mnda anywa anyi, ubaha malo ma mtima mano malihuhuma wandi. ¹⁸ Nabemsambila mtu m'bii, Chigilwe wiiwa; gogwe usamma malo, na usadogoma na gugo mtu m'bii umlangulula, ibalo galeye ndila gyage gibii na ulihogonona mtima gwage; gugo mtu m'bii gwiwa mnda buubi bwage; bibyo nisaba maashi mage mnda maboo mobe. ¹⁹ Nambo mtu m'bii wamlangulula, nage gusaleya usona wage, na ata ndila gyage gibii, gabewa mnda usona wage; gogwe ubi walisuwa mtima goge. ²⁰ Iyaka nambo mtu gwa kiine gwaleya kiine gyage, nanugola bya usona, nene nabebiya yulihyatala umbele wage, gwiiwa; wa ibalo usamlangulula, gwiiwa mnda usona wage, nabigilanywa byage bya kiine byeligilile bishiengelechiwa; ata bibyo maashi mage nimasaba mnda maboo mobe. ²¹ Nambo umlangulule mtu gwa kiine, ugana guya mtu gwa kiine gashigile buubi, iyakanage gushihugila buubi, chigilwe gugo gubi na mwego, bululi gugitabidiche ulangululwa; na gogwe walihogonona mtima gobe. ²² Na uboo wa MLUME ubele hegulu hanyi uya; gusambile, Gimana, ugye wine ushi batunene nidogoma nobe ubo. ²³ haho, nichiwile, nigile wine ushi mtu, na llola ugengeda wa MLUME ugimene ubo, nahi ugengeda uya wandimonine hoka na luudi Kebali; nene nigwile mmachwi. ²⁴ Haho gugo mtima ging'ingile, gungimiye na magulu manyi; gudogomine nanyi, gusambie, Ugye ulihambilile mndu gyobe. ²⁵ Biino gogwe mtu, loola, biuhamba tumangila, nabo biuhamba nato, ushigya hambuga hawingi habo. ²⁶ nene niita lulimi lobe uba bushito na aola obe, na ubi ameme, na gogwe ushibi mmonyi wabali; bululi boo mndu gyine gili hubenga. ²⁷ Bibyo haho hene handidogoma nobe, nibulula anywa obe, nagogwe wibasambila, Mlume ABETCHA gwagana bino.Guya guhulicha ma gahuliche; na guya guuhanya na gahanye; bululi boo mndu gya lubengo.