¹ Na gogwe mwanamtu, ubuwe yulu ya Gogu, ugane, Mlume ABETCHA gwagana bino; Loola, nene nili hegulu hobe, Gogwe Gogu, mmata gwa Loshi, na Mesheki na Tubali; ² nene niugalula na uulombwela, nene niusecha uhuma isulaya luubi lwa uboo wa uachi; nene niuhyicha heguluha koono cha Isilaeli; Nene nibuhula buta bobe buhume mnda uboo obe wa uachi, na migwii gyobe nigigwisha, gihuma mnda uboo obe wa ulume. ⁴ Wiigwa heguluha koono cha Isilaeli, gogwe, na migoma gyobe gyose, na batu ba mioga giingi bene bali hamwechi nobe; nene niuhana na utuha tunonyi twa mioga gyose twine tusuya nyama, na nyama cha mgala, uliwe nabyo. ⁵ Wiigwa mnda lubala; bululi nene nadogoma ino inywa, Mlume ABETCHA gwagana. Nene nihila aahya hegulu ha Magogu; na hegulu habatu bose bali bashame kolongechomnda bileba; nabo bimana ugananene noo MLUME. ⁷ Na chinalyanyi lihaha nilyiita limanyiye hawingi ha batu banyi Isilaeli; na nishilileya china lyanyi lya lihaha ubiwa bunyenye iyaka; nagyo mioga gyimana ugana nene noo MLUME, na Guli Mmaha mnda Isilaeli. ⁸ Loola, yahuchwa, nayo yigiliya, Mlume ABTCHA gwagana; luno noo lusugu luya lwandiganine. ⁹ Babo balibashame mnda maguba ma Isilaeli bihuma, nabo biita tulume gela twa bita na uchigya ngabo, na tugingililwe, na mata, na migwii, na bidabo na masumo, nabo bibyiita nahi kunyi mengo ma masugu njwii; ¹⁰ nabo bashitola kunyi u mabala, na bashishaba kunyi m'bisowa; bululi bisambya aahya wa tuya tuome; nabo biwata kole u batu baya bene babawashile nabo kole, na usapa bitu bya baya bene babasapile bitu byabo, Mlume ABETCHA gwagana. ¹¹ Iyaka, lubi lulo lusugu nimma Gogu ihana ya ichyiila mnda sii gya Isilaeli, ibetabeta ya bahishi, luubi lwa mlugulu lwa bahali; nayo yibachibila bahishi; na ubo bimchiya gogu na batu bage ihichi yose; nabo biigita ibetabeta ya Hamon-Gogu. ¹² Na mengo ma myechi njwii ndu gya Isilaeli gibihubachiya, bululi bahahache sii. ¹³ Ehe, batu bose ba gigyo sii babihubachiya; gibi punda gyabo ha luya lusugu, haho noo handitonywa, Mlume ABETCHA gwagana. ¹⁴ Nabo bibasobola batu buugila mgilo gwa masugu mose, bene bihita mnda ibaloo, yulu ya uchiya bene bashigele tabataba u bitete, yulu ya uihahacha inaloo; myechi njwii hagyihwa uhita bienga. ¹⁵ Na babo bene bihita mnda sii babi huenga; na mtu gegese mine gwimona uda lya mtu, haho gwibiya isha hoka nalyo, ata na bachii habilichiya mnda ibetabeta ya Hamon-Gogu. ¹⁶ Iyaka, Hamona libi china lya mbuga. Bibyo noo byabihahacha sii. ¹⁷ Na gogwe, mwanamtu, Mlume ABETCHA gwagana bino; Dogoma na tunonyi twa mioga gyose, na nyama gyogyose gya mmabala, Liongolwe, muchwe; liongolwe ngubi chose muluchwile lutangi lwanyi lwandiita yulu yanyu, ehe, lutangi lwaata hegulu ha koono cha Isilaeli, bululi uye nyama na unywa maashi. ¹⁸ Mwiya nyama chabo baya beli na uoma, na unywa maashi ma baata bibaloo, ma miyoo gya milume na ma baana ba miyoo, na ma mabuchi, na ma ng'ombe, bose na cha chinonyu cha Bashani. ¹⁹ Benywe mwiiya mauta na nugyuta, mwinywa maashi nuolwa, noo lutangi lwanyi lwandiitile yulu yenyu. ²⁰ Na benywe mwigyushiwa u mesa manyi na falasi, na tubilibili twa bita, na bilume pambwa, na batu bose ba bita, Mlume ABETCHA gwagana. ²¹ Na nene nibiya ugenged wanyi hawingi ha mioga, na mioga gyose gyimona uonona wanyi wandichigiche, na uboo wanyi wandibiile hegulu habo. ²² Bino, ndu gya Isilaeli gyimanaugana nene noo MLUME Abetcha abo, utula lulo lusugu na hanyuma. ²³ Na mioga gyimana nugana ndu gya Isilaeli gibululwe, na ugya ubulogo, bululi bya usona wabo; bululi bamengile, nene nibabisa yenyi yanyi; haho nibabiya mnda maboo matumangu twabo, nabo biigwa wa ahilu bose abisa. ²⁴ Wa ulamana na bunyenye bwabo, ulamana na buubi bwabo, bibyo noo byandibagilile, na nene nibabisile yenyi yanyi. ²⁵ Bululi bwa bibyo, Mlume ABETCHA gwagana bino; Bino, nibagiwicha batu ba Yakobo bene babululwe, nibamonena keene ndu gyose gya Isilaeli; nene nilimonena buwa china lyanyi lihaha. ²⁶ Nabo biguha abule abo, na buubi bwabo bose bwabamengile, hene habishama kolongecho mnda sii gyabo boo bene, na hashi mtu gwibadidibula; ²⁷ handibi nahubachwisha iyaka uhuma hawingi ha mioga gya batu, na ubasumbicha wa ubahunya mnda sii ga tumangu twabo, na uhahachiwa hawingi habo umbele wa meeso ma mioga giingi. ²⁸ Nabo bimanaugana nene noo Mlume ABETCHA abo, wa bululi nibabulule, bagye ubucha hawingi ha mioga, na nene nibaongole, na ubagingicha mnda sii gyabo boo bene; na nishibaleya iyaka ubo ata, ata gumwechi gwabo; ²⁹ na nishibabisa yenyi yanyi iyaka; wa bululi nahongolola mtima gwanyi hegulu ha ndu gya Isilaeli, Mlume ABETCHA gwagana.