¹ Inywa ya MLUME injwiie, ugana, ² Mwanamtu, omenenya yenyi yobe, umlole Gogu, gwa sii gya Magogu, mmata gwa Loshi, Mesheki na Tubali, wabuwe yulu yage, ³ ugane, Mlume ABETCHA gwagana bino; Loola, nene nili hegulu hobe,Gogwe Gugo, mmata gwa Loshi, na Mesheki na Tubali; ⁴ Nene niugalula na uubiya bugela mnda bisanjwa byobe, nene niuhunya hamwechi na basolokoto bobe bose, falasi na bobo buuchina falasi, bose bachwala tuome twa mioga gyose, ihichi yaata abisa, bina ngabo na tugingiliwe, bose bawate tuhilu; ⁵ Baajemi, na Kushi, na Putu, hamwechinabo; bose bali na ngabo na akusukusu a bita; ⁶ Gomeli, na migoma gyage gyose; ndu gya Togalma, luubi lwa isula lwa uboo wa uachi, na migoma gyage gyose; ehe, batu beengi hamwechi nobe. ⁷ Ulibiya bosoga, ehe, ulibiya bisoga, gogwe na bilume pamwa byobe byose byine biliongwele, gogwe ube mmata gwa bilume pambwa byabo. ⁸ Na hanyuma ha masugu meengi wichwilwa; ha myaa gya isula, wigingila mnda sii gyine gigiwichiwe mishaminyi gyage gya gitangi, hanyuma ha uluwa wa ahilu, giongolwe uhuma mioga giingi gya batu, na hegulu ha koono cha Isilaeli, chine chibele mauwa masugu meengi; ata bibyo chahunyiwa mnda mioga gya batu, nabo, bishama kolongecho bose abisa. ⁹ Gogwe wisela hegulu, wiichwa nahi isukishi, ubi nahi timba uwila ibaloo, gogwe, na mogoma gyobe gyose; na mioga giingi gya batu hamwechi nobe. ¹⁰ Mlume ABETCHA gwagana bino; habi ha lulo lusugu, itula byigingila mnda mtima gobe, gogwe wilanga langa libii; ¹¹ gogwe wigana, nisela hegulu nagye u giya sii gyine gyina tumabuga twine tushi na migumbo; nibagila batu bene bali balituche, bali bashame kolongecho, bose bashame bashi na migumbo, bene bashi na mchango ata na ahungolo; ¹² yulu ya uwata kole, nauhiba buhibi; uugalule uboo obe hegulu ha ihana yine idogile, hene bino hashaminywa na batu, na yulu ya batu bene balisumbiche uhuma u mioga, bapashile ng'ombe na bibya, bali bashame hawingi ha sii. ¹³ Sheba na Dedani, na badagulanyi ba Talshishi, hamwechi na baana ba matambwe bage bose, biusambila, Wi wii! Waachwa uwata kole? Wasumbicha basolokoto bobe, yulu ya uhiba buhibi? Uguha lufeza na nolo, uguha ng'ombe na bibya, uwata kole chiingi abisa. ¹⁴ Bino mwanamtu, buwa, ubasambile, Gogu, Mlume ABETCHA gwagana bino; Ha luya lusugu batu banyi, Isilaeli, habishama kolongecho, ushibi na mwano? ¹⁵ Gogwe wiichwa uhuma wiihana yobe, uhuma isula ya luubi lwa uboo wauachi, gogwe,na batu ba mioga giingi hamwechi nobe, bose bali bachine falasi, sumbilo lyaata, na ihichi yaata; ¹⁶ gogwe wisela hegulu wabachwile batu banyi Isilaeli, nahi timba ugiwila sii; bibi ha masugu ma isula, niuchisha ulwe na sii gyanyi, bululi mioga giimane, mengo mandihahachiwa oli, Gogwe Gogu, umbele wa meeso mabo. ¹⁷ Mlume ABETCHA gwagana bino; Wi wii! Gogwe noo gwandiganine aala mganda, u tunywa twa bagichi banyi, ba mbuwa ba Isilaeli, babuwule maya masugu na wa mengo ma myaa gingi, ugana niuchwisha ulwenabo? ¹⁸ Habi ha lulo lusugu, Gogu helichwa ulwa na sii gya Isilaeli, Mlume ABETCHA gwagana, uchigililwa wanyi wisela m tulonge-longe twa mihyembe ganyi. ¹⁹ Bululi yulu ya buwa bwanyi, na yulu ya aahya a uchigililwa wanyi, nagana; Chigilwe luya lusugu habi ititicha yaata mnda sii gya Isilaeli. ²⁰ ata swii cha bahali, natunonyi twa ha hululu, na nyamacha mmabala, na byose byudandala hegulu ha bitete, na baanababatu bose bene bali hegulu ha bitete, bidanda umbele wa yenyi yanyi;nacho koono chyitelwa hasi, na mawe ma malahu miigwa, na bibambacha byose byigwa hasi ²¹ Nene nigita ahilu,achwe hegulu hage mnda koono chanyi chose, Mlume ABETCHA gwagana; nao ahilu a kilamtu abi hegulu ha mshiwabo. ²² Nene nimmonona wa bisumi, na wa maashi; nene ninyesha mbula gya imbi luudi, na mbulagya mawe ma mata abisa, na aahya a abigo abi hegulu hage, na migoma gyage, na batuba mioga giingi bene bali hamwechi nage. ²³ Nene nilitona, na ulihahacha, na ulimonya, umbele wa meeso ma mioga giingi, nabo bimana ugana nene noo MLUME.