¹ Uboo wa MLUME ubele hegulu hanyi, nagu gunguhile hambuga wa mtima gwa MLUME, gumbiile hasi m'bwingi na ibetabeta; nayi ili igiluchu mauda; ² gupishiche hoka namo ngubi chose; na loola, habele na mauda meengi mnda iya ibetabeta! Loola, namo, mabele magumu abisa. ³ Gusambile, Mwanamtu, wi wii! Mano mauda manaosha uba na mwego? Nene nigaile, Ee Mlume ABETCHA, gogwe noo ugidi. ⁴ Gusambile iyaka, Ubuwe yuluya mano mauda, umasambile, Menywe mauda ma magumu, ihulichiwe inywa ya MLUME. ⁵ Mlume ABETCHA gwamasambila mano mauda bino binywa; Loola, nibiya luhuda mnda mwenyu, na benywe mubi na mwego. ⁶ Nene nibiya mii hegulu henyu, nene nichwisha nyama chibe hegulu henyu, na um'bwila bibambi, na ubiya luhuda mnda mwenyu, na bwenywe mubi poo; benywe mwimana ugana nene noo MLUME. ⁷ Haho nibuwile nahi byandisambilwe; nahandibele hubuwa, habele na lwindo lwata; na loola, ititicha ya sii, na maya mauda mashenanine, uuda wa uuda linge nage. ⁸ Nilolile, mndi! Habele na mii hegulu hage, nyama chimenine hagu hage, ibambi iunine hagulu hage; bibyo hashibele naba na luhuda mnda mwage. ⁹ haho gusambile, Buwa, ubuwile mnaga, mwanamtu, ugusambile mnaga, Mlume ABETCHA gwagana bino; Chuno, uhuma ngubi chose china, Ee luhuda, ubahulile bano bene bahagilwe, baoshe uba namwego. ¹⁰ Haho nibuwile nahi byandisambilwe; luhuda gubagingile, boo nuba na mwego, bagimene na magulu mabo, ihichi yaata abisa. ¹¹ Hanyuma gusambile, Mwanamtu, mano mauda noo ndu gya Isilaeli gyose; loola, boo bali hugana, Mauda metu mmagumu, maudagilo metu matuchimina; twachingwa koo abisa. ¹² Bino ubuwe, ubasambile, Mlume ABETCHA gwagana bino; Loola, niununa tubuli twenyu, na ubasecha uhuma mnda tubuli twenyu, benywe batu banyi, nene nimgingicha mnda sii gya Isilaeli. ¹³ Benywe mwimana ugana nene noo MLUME, handiununa tubuli twenyu,na ummunya benywe mnda tubili twenyu, benywe batu banyi. ¹⁴ Nene nibiya mtima gwanyi mnda mwenyu, bemywe mubi na mwego, nene nim'biya mnda sii gyenyu, benywe mwimana ugana nenenoo, MLUME, nadogoma bibyo, na ubiwilicha, MLUME gwagana. ¹⁵ Inywa ya MLUME injwilile iyaka, ugana, ¹⁶ Na gogwe mwanamtu, guha imwe ihindi ya mti; wagole hegulu hayo, Yulu ya Yuda na yulu ya baana ba Isilaeli beenage; hanyuma, waguhe inge ihindi ya mti ya bubili; wagole hegulu hayo, Yulu ya Yusufu, ihindi ya mti ya Eflaimu, na wa ndu gyose gya Isilaeli na beenage; ¹⁷ wabilunge hamwechi ii na ii byabe ihindi imwechi ya mti, byabe imwechi mnda uboo obe. ¹⁸ Na baana ba batu banyi habiusambila, babegana,Wi wii! Ushitumonya mana gya bibyo bihisho byolihugila? ¹⁹ Ubasambile, Mlume ABETCHA gwagana bino; Loola, niiguha ihindi ya mi ya Yusufu, ili mmuboo wa Eflaimu, na mlongo gwa Isilaeli beenage; nene nibabiwa hamwechi nayo, noo, hamwechi na ihindi ya mti ya Yuda, na ubyiita uba ihindi ya mti imwechi; nabyo bibi imwechi mnda uboo wanyi. ²⁰ Nabyo bihindi bya miti, byoligolile hegulu habyo, bibi mmuboo obe umbele wa meeso mabo. ²¹ Wabasambile, Mlume ABETCHA gwagana bino; Loola, nubaguha baana ba Isilaeli uhuma hawingi ha mioga wine wabagile, nene ibasumbicha uhuma ngubi chose, nanubachwisha mnda sii gyabo bo bene; ²² nene nibaita uba mmoga gumwechi nda gigyo sii hegulu ha koono cha Isilaeli; na oolo limwechi libi oolo lyabo boo bose, na bashibi iyaka mioga bigili, na bashisambuana uba buoolo bubili iyaka, ndaa na milumbu. ²³ Na bashilibiya iyaka bunyenye bwa tuwe lugulu twabo, na ata wa bitu byabo bya uchigilicha, na ata wa uluba wabo o ose; bibyo nibahogonona, na ubahunya mnda bushamo byabo bose, bwine bwabagilile mo buubi bwabo, nene nibahahacha; biino babi batu banyi, na nene nibi Abetcha abo. ²⁴ Na mgichi gwanyi Daudi, gubi oolo hegulu habo, nabo bose babi na mmushi gumwechi; nabo bigyata mnda uonona wanyi, na uwashi alago anyi, na uagila. ²⁵ Nabo bishama mnda sii gyandihele Yakobo, mgichi gwanyi, gyine gishamine bamasenyu; nabo bishama mo, boo na baana babo,milumbu; na Daudu mgichi gwanyi, gubi mmata gwabo milumbu. ²⁶ Iyaka niita malagano ma talala hamwechi nabo; mabi malagano ma milumbu hamwechi nabo; nene nibabiya na ubabucha, , na ha haha hanyi nihabiya hawingi habo milumbu. ²⁷ Iyaka bushamo bwanyi bubi hamwechi nabo; nene nibi Abetcha abo, nabo babi batu banyi. ²⁸ Na mioga gyimanaugana nene noo MLUME, nene nisubahahacha ba Isilaeli, ha haha hanyi habi hawingi habo milumbu.