¹ Iyaka inywa ya MLUME injwilile, ugana, ² Mwana gwa mtu, cheelechayenyiyobe heguluha loono Seili, wabuwe yulu yalo, ³ ulusambile, Mlume ABETCHA gwagana bino; Loola, nene nilihegulu hobe, Ee loono Seili, nene niugolola uboo wanyi hegulu hobe, na nene niuita ube mauwa na bigagi. ⁴ Mabuga mobe nimadogya, nagogwe ubi mauwa; gogwe wimanaugana nene noo MLUME. ⁵ Bululi uli na bumangu bwine bushihusunga, gogwe wabahana baanaba Isilaeli bahagwe wa uomawa ahilu, mengoma susu abo, mengo miisula ma usona. ⁶ Biino, nambo nene byandi na mwego, Mlume ABETCHA gwagana, niubiya hoka wa ugeseya maashi, na maashi miulama; uba asaonywa maashi, haho maashi muilama. ⁷ Bibyo noo byandiluita loono Seili uba bigagicha na mauwa; nene nimchinga koo nalo mtu mine gwihita, na mtu mine gwigiwila. ⁸ Nene nigiluche koono chage batu bage bene bahagilwe; mnda koono chobe,na bibetabeta byobe, na mnda midabwa gyobe gya maadi gyose, biigwa baya benebihagwa wa ahilu. ⁹ Niuita uba mauwa masugu mose, na mabuga mobe mashishaminywa na batu; benywe mwimana ugana nene noo MLUME. ¹⁰ Bululi wagana, Mioga gino gibili na bibaloo bino bibili bibi byanyi, beswe twibihyilila, inangwa MLUME gubele ubo. ¹¹ Biino, nambo nene byandi na mwego, Mlume ABETCHA gwagana, niigila ulamana na sungu chobe, na ulamana na buwa bobe, bolimoninye wa uaonywa; nene nilimonywa wabali, handi uonona gogwe. ¹² Gogwe wimana ugana nene noo MLUME, nihuliche misobo gyobe gyose, gyolituwile koono cha Isilaeli, ugana, Baiswa mauwa, babiwa mnda maboo metu tubaye. Benywe mwalitona hegulu hanyi na tunywa twenyu, na ubucha binywa byenyu yulu yanyi; nene nahulicha. ¹⁴ Mlume ABETCHA gwagana bino; Sii gyose hagyiseelela, niuita uba mauwa. ¹⁵ Nahi biya byoliseelele yulu ya buhyana bwa ndu gya Isilaeli, bululi gibele mauwa, noo byandiugila gogwe, Ee loono Seili, na Edomu yose, ehe, yose nagyo; nabo bimana ugana nene noo MLUME.