¹ Inywa ya MLUME injwilile, ugana, ² Mwana gwa mtu, uhane bubuwa yulu ya baushi ba Isilaeli, uhane bubuwa ubasambile, ehe, babo baushi, Mlume ABETCHA gwagana bino; Luhanga luubi lwabo baushi ba Isilaeli, bali hulilisha boo bene, wi wii! Bishilingye baushi ugilisha miyoo? ³ Mulihugiya gya ginonyu, mwalichwiya maso, mwagishinja gya ginonyu; na mushihugilisha miyoo. ⁴ Basumwa mushibabiile uoma, na musabahonya bene bali bisumi, na mushi bahambile babanogeye, namushibagiwiche bene bachingilwe, na mushibaengile bene bachimine; bibyo wa uoma na wa buhuchi mubahyilile. ⁵ Nabo basambalele, bululi hashibele na mmushi; boo nuba iliwa ya nyama cha mgala, boo nuusaliya. ⁶ Miyoo gyanyi gihubagene-hubagene u koono chose, na hegulu ha kila abandagulu a alahu; ehe, miyoo gyanyi gisaliye hegulu ya ibaloo yose; na hashibelena mtu gwa ugibucha na ugienga wagili. ⁷ Biino, benywe baushi, ihulichiwe inywa yanyi; ⁸ Nambo nene byandi na mwego, Mlume ABETCHA gwagana, wa bululil miyoo gyanyi gibele kole, miyoo gyanyi gibeleiliwa ya nyama cha mgala chose, bululi hashibele na mmushi, na ata baushi banyi bashiengile miyoo gyanyi, haho baushi balilishiche boo bene bashilishiche miyoo gyanyi; ⁹ bululi bwa bibyo, benywe baushi, ihulichiwe inywa ya MLUME; ¹⁰ Mlume ABETCHA gwagana bino; Loola, nene nili hegulu ha baushi; nene nibasaba miyoo gyanyi mmaboo mabo, nene nibaleya guya mgilo gwa ugisha miyoo; nabo baushi balilisha iyaka boo bene; nene nigihogononya miyoo gyanyi u tunywa twabo, bashibe iyaka iliwa yabo. ¹¹ Bululi, Mlume ABETCHA gwagana bino; Loola, nene mine, ehe, nene, nigienga miyoo gyanyi, na ugibucha wagili. ¹² Nahibiya bisuenga mmusha miyoo gyage, lusugu luya lwelibi hawingi ha miyoo gyage gibele gyagisambalachu; noo byandienga miyoo gyanyi; nene nigihogonona bihana byose byine byabasambalachiwe, ha lusugu lwa matimba na mdoo. ¹³ Nene,nibahunya hawingi ha batu ba mioga, na ubasumbicha mnda bibaloo byose, nene nibagiwicha mnda sii gyabo boo bene; nene nigilisha hegulu ha koono cha Isilaeli, na hibamba ha midabwa gya maadi; na ha bihana byose bya sii hene hali hashamwe na batu. ¹⁴ Nene nigilisha biliwa bisoga, hegulu ha koono haihanaya iginyubu ya Isilaeli libi liha lyabo; ubo bilala mndaliha lisoga; nagyo gyiiya biyoo byabo bya bisoga, hegulu ha koono cha Isilaeli. ¹⁵ Nene mine nigilisha miyoo gyanyi, nene nigilacha, Mlume ABETCHA gwagana. ¹⁶ Nene nigienga gya gichiminyu, Nigigiwicha gyine gichingilwe, nigihamba gyine ginogeye, nigibiya uoma gyine gisuminywe, nabo ba banonyu na bene bali na uoma nibadogya; nibalisha uonona, ¹⁷ Na yulu ya mwano gwenyu, Benywe ihichi yanyi, Mlume ABETCHA gwagana bino; Loola, nihuonona hawingi ha nyama na nyama, miyoo gya milume na mabuchi ma malunga gyose. ¹⁸ Wi wii! Mwamona iyinywa icho benywe ulishiwa biliwa bisoga, ata mwahuba mulingye ugyatila na magulu menyu byine bishigele? naugana munywine maadi mene mali mahaha, na benywe mulingye umahonya na magulu mene mashigele? ¹⁹ Na yulu ya mwano gwa miyoo gyanyi, gyo gilihuya biya byine byamugyatile na magulu menyu, nagyo gilihunywa maadi mamuhoninye na magulu menyu. ²⁰ Wa yulu ya bibyo, Mlume ABETCHA gwagana bino; Loola, nene, ehe, nene, nionona hawingi ha nyama cha chinonyu na nyaa cha chigonju. ²¹ Bululi mwalunga wa lugachu, na wa maombe, na ubata bene balihusumwa meega menyu, na ubasambalacha koo. ²² bino nene nihogononywa ihichi yanyi, na bashibi kole iyaka; nene nionona hawingi ha nyama na nyama. ²³ Nene nibiya mmushi gumwechi hegulu habo, nage gwichilisha, ehe, mgichi gwanyi, Daudi, gee gwibalisha, nage gubi mmushi gwabo. ²⁴ Na nene, MLUME, nibi Abetcha abo, na mgichi gwanyi Daudi, gubi mmata hawingi habo; nene, MLUME, niganine bino. ²⁵ Nene nibiya malagano ma talala nabo, nene nisungya byiila hawingi habo; nabo bishama kolongecho mlwanaganywa, nulala m'bisowa. ²⁶ Nene nibaita boo, na bihana byinebili ngubi chose cha loono lwanyi, uba mihaa, nene nilusha mbula gya lunyange wa mengo mage; gibiho mbula gya lunyange gya mihaa. ²⁷ Na mti gwa mlubala gwiha biguma byage, nago gubi kolongecho mnda sii gyabo; nabo bimana ugana nene noo MLUME, handinoga bihambo byabo bya uhamba maoshi, na ubahogononya mnda maboomabaya batu bene babagidiche migilo. ²⁸ Bashibi kole cha tufili iyaka, na inyama ya mmibaloo ishibaya; haho babi kolongecho, na hashibi mtu gwibadidibula. ²⁹ Nene nimmenenya bitutuu bibe punda chisoga, na bashimiwaa na ndala mnda sii gyabo iyaka, na bashiguha iyaka abule a tufili. ³⁰ Nabo bimana ugana nene noo Mlume ABETCHA abo, nilihamwechi nabo, na ubagwabo, ndu gya Isilaeli, m'batu banyi, Mlume ABETCHA gwagana, ³¹ Na benywe, miyoo gyanyi, miyoo gya ulishiwa wanyi, muli baana ba batu, na nene noo Abetcha enyu, Mlume ABETCHA gwagana.