¹ Ha mwaa gwa umi na gyopi, mwechi gwa umi na gibili, lugusu lwa lutangi lwa mwechi, inywa ya MLUME injwilile, ugana, ² Mwanagwamtu, ubiile Falao, oolo lya Misili, malilo, umsambile, Walingilishiwa na mwana tambwe gwa mioga; ata bibyo ubele nahi ndowa mnda bahali; gogwe wahuma na uoma hamwechi na ngudi chobe, na usubula maadi na magulu mobe, na ubiya msubusubu ngudi chabo. ³ Mlume ABETCHA gwagana bino; niganda bwila bwnyi hegulu hobe, na sumbilo lya batu bamioga giingi; nabo biugunda mnda bwila bwanyi. ⁴ Nene niuleyahegulu ha bitete bya bigumu, niutela hegulu ha lubugu, nene nilusha tunonyi tose twa ha hululu tusale hegulo hobe, nene nigyusha nyama chose cha sii gyose oli gogwe. ⁵ Nene nibiya nyama chobe hegulu ha koono, na ugilucha bibetabeta na ulahaobe. ⁶ Iyaka wa maashi mobe nimanywisha bitete, gyolihuta bugoga hegulu hagyo, ndaa na ukoono; na midabwa gya maadi gyigilula nobe. ⁷ Nene handiuchima, niunina gulu, na utuita tumbalambala twage uba mdoo; nene niunina chuba na timba, na ata mwechi gushihunya ugema wage. ⁸ Byose byugema bya gulu nibyiita uba mdoo hegulu hobe, nene nibiya mdoo mnda sii gyobe, Mlume ABETCHA gwagana. ⁹ Iyaka nichigilicha batu beengi mitima gyabo, handichwisha udoga obe hawingi ha mioga, ugingile mnda bibaloo byoshimanine. ¹⁰ Nene nigagicha batu ba tubila twiingi yulu ya mwanogobe, na maoolo mabo bimona booba abisa yulu yobe, handidigicha ahilu anyi umbele obe; nabo bidanda mengo mose, mtu gegese yulu ya mwego gwage, lusugu lwa ugwa obe. ¹¹ Bululi Mlume ABETCHA gwagana bino; Ahilu ya oolo lya Babeli iuchwila. ¹² Wa tuhilu twa bilume pambwa nibagwisha batu bobe boose wa bwigi bwa ahilu; babo bose ii batu ba mioga buudanja, nabo bobela anene a Misili, na ihichi ya batu bage beengi bidigwa. ¹³ Iyaka nidogya nyama chage chose, habamba ha maadi meengi; na ugulu wa mwana gwa mtu ushimahonya iyaka, na ata tubidi twa nyama tushimahonya. ¹⁴ haho noo hadiita maadi mabo uba mahaha, na ugyasha ngubi chabo nahi mauta, Mlume ABETCHA gwagana. ¹⁵ Handigiita sii gya Misili uba mauwa na lele, sii gihugwilwe na bitundu byine bibele bigiluchu, handibahaga batu bose bene bali bashamemo, haho noo habimana ugana nene noo MLUME. ¹⁶ Mamo noo malilo mene mabilila; bawamisiha ba mioga bibiya malilo yulu ya bibyo; wa bibyo mamo malilo yulu ya Misili, na wa yulu ya batu bage bose ihichi, Mlume ABETCHA gwagana. ¹⁷ Ha mwaa gwa umi na gibili, lusugu lwa umi na matano lwa mwechi, injwa ya MLUME injwilile ugana, ¹⁸ Mwana gwa mtu, balilile batu ba Misili. Bose ihichi wabagwishe, ehe, gee, na misiha gya mioga gya gilungamanyu, ndaa na luubi lwa hashi ha sii, hamwechi na batu bene balihusala mmiina. ¹⁹ Wammima nanyi wa buhungwe? Sala, walale hamwechi na bashibabagibe kumbi. ²⁰ Bagwile hawingi ha batu bene bahagilwe na ahilu; gwahananywa gahagwe wa ahilu; m'bulwe gagye hamwechi na ihichi ya batu bage bose. ²¹ Bene bali na uoma bidogoma nage, uhuma m'bwingi na sinda hamwechi na bene bali hum'bwatilicha; basala balala pii, ata na bebe bashibabagibe kumbi, biya byabahagilwe wa ahilu. ²² Ashulu guli ubo, na ihichi ya batu bose; na tubuli twage twamchunguluwa; bose bahagwa abisa, bahagilwe na ahilu, ²³ bene tubuli twabo twabiwa luubi lwa biina byine bili koo abisa, ihichi yose yachunguluwa abuli age; bose abisa bahagilwe na ahilu, benebaitile udanja mnda sii gyabo bene bali na mwego. ²⁴ Elamu guli ubo, naihichi ya batu bage; gubi chose cha tubuli twage; bose bahagilwe, bagwile wa ahilu, basalile bashi babagibe kumbi luubi lwa hasi ibaloo; bene bababiile batu booba mnda sii gya bali na mwego, nabo baguha abule abo, hamwechi nabo bene balihusala m'biina. ²⁵ Bam'biileingo hawingi ha babo bene bahagilwe, hamwechi na ihichi ya batu bage bose; tubuli twage twamchunguluwa; bose abisa bashigile kumbi, ahagilwe na ahilu; bululi ubiiya booba wabo uitiye mnda sii gya bene bali na mwego, nabo baguha abule abo,hamwechi na baya bene balihusala m'biina; gwabiwa hawingi ha baya bene bahagilwe. ²⁶ Mesheki guli ubo, na Tubali, na ihichi ya batu bage; tubuli twage twamchugnuluwa; bose abisa bashigile kumbi, bahagilwe na ahilu; bululi bagila bya udanja wabo mnda sii gya bene bali na mwego. ²⁷ Wi wii! bashilale hamwechi bilume pambwa byabo byine bishigile kumbi, bene bagwile, bene basalile usinda hamwechi na tuome twabo twa bita, bene bali babiye tuhilu twabo hasi ha miswe gyabo, na usona wabo mnda mauda mabo? bululi babadidibuye ba bilume pambwa mnda sii gya bene bali na mwego. ²⁸ Biino Misili, winogeya hawingi ha bene bashibabagibe kumbi, nagogwe wilala hamwechi na baya bene bahagilwe na ahilu. ²⁹ Edomu guliubo, maoolo mage, na bauulu bage bose, wa uosha wabo balachiwa hamwechi na baya bene bahagilwe na ahilu; bilala hamwechi nabaya benebashigile kumbi, na hamwechi na baya bene balihusama m'biina. ³⁰ Baulu ba luubi lwa uboo wauachi bali ubo, nabo abisa, na Basidoni, bose bene basalile hamwechi na beya bene bahagilwe; wa yulu ya baya buudanja wabagilile yulu ya uosha wabo badamba mme, nabo balala bashibagibe kumbi, hamwechi nabo bene bahagilwe na ahilu, nabo baguha abule abo,hamwechi nabo bene bali husala m'biina. ³¹ Falao gwibamona, nage gwihewa mmungyo hawmechi na ihichi ya batu bage bose; ehe, Falao na basolokoto bage bose bahagilwe na ahilu, Mlume ABETCHA gwagana. ³² Wa bibyo nabiya udanja wage mnda sii gya bene bali na mwego; nage gwilachiwa hawingi ha bene bashibabagibe kumbi, na hamwechi nabaya bene bahagilwe na ahilu; gee Falao na ihichi ya batu bage, Mlume ABETCHA gwagana.