¹ Ha mwaa gwa umi, na mwechi gwa umi, na lasugu umi na mipi ma mwachi, inywa ya MLUME injwiile, ugana, ² Mwana gwa mtu, uhugulule yenyi yobe uli Falao, oolo ;ya Misili, naubuwe yulu yage, nayulu ya Misili gyose. ³ ugane, Mlume ABETCHA gwagana bino; Loola, nene nili hegulu hobe, Gogwe Falao, oolo lya Misili, ndowa gya gyata gyalibisa hawingi ha nguudi chage, giganine, Luudi lwanyi ii lwanyi nene mine, nene naluita yuluya ichuli-chuli yanyi ya mwego. ⁴ Nene nibiya bugele u isanjwa yobe, nene nisambanya swii cha luudi lobe Nilena magamba bobe; nene niuhunya mnda ngudi chobe, hamwechi na swii cha ngubi chobe, chisambanywe na magamba bobe. ⁵ Nene niuleya nahi ulimtelwe mlwanaganywa, gogwe na swii chose cha ngudi chobe; wiigwa u bitete bya lubugu; ushiongolwa, na ushibiwa hamwechi; nuubiya wabe iliwa ya nyama cha mgala, na ya tunonyi twa ha hululu. ⁶ Na bato bose bene bali bashame Misili bimanaugana nene noo MLUME, wa bululi basili longe lya ugegaminywa lya ndu gya Isileli. ⁷ Habauwashile wa uboo obe, unogeye, ubabongole maombe babo mose; habuudagile, ubanogile, ubadandiche munda chabo chose. ⁸ Biino, Mlume ABETCHA gwagana bino; Loola, nihila ahilu hegulu hobe, nene nichinga koo gogwe mwana gwa mtu na nyama. ⁹ Nagyo sii gya Misili gibi mauwa na lele; nabo bimana ugana nene noo MLUME; bululi gwagana, Luudi luno mlwanyi, nene niluitile. ¹⁰ Biino, loola, nene nili hegulu hobe, na hegulu ha ngudi chobe, nene niita sii gya Misili uba lele lya hululu, na mauwa, utula Migdoli ndaa na Sewene, ndaa na ulugumba lwa Kushi. ¹¹ Ushihita mnda mwagyo ugulu wa mwana gwa mtu, naushihita mnda mwagyo ugulu wa nyama, na gishishaminywa na mtu, mengo ma myaa maumi mana. ¹² Nene nigiita sii gya Misili uba mauwa, hawingi ha bibaloo byine bili mauwa, na mabuga mage, hawingi ha mabuga mene madogole, mabi bibunduguchu mengo mamyaa maumi mana; nene nibasambalacha hawingi ha mioga, nene nibasambalache hawingi ha binge bibaloo. ¹³ Bululi Mlume ABETCHA gwagana bino; isula ya myaa maumi mana nibasumbicha Bamisili, na ubahinya hawingi ha milongo gya batu, gyine gyabasambalachiwe hawingi habo. ¹⁴ nene nibagiwicha Bamisili bene bali nahi bahambwa, nene nibagiwicha ndaa na sii gya Pathlosi, ndaa na sii byabo byubuswa wabo; na ubo babi buoolo bwa hasi abisa. ¹⁵ Bubi hasi uhima buoolo bunge bose; na bushiliginuna iyaka hegulu ha mioga; nene nibahungula, bululi bashihyilile iyaka hegulu ha mioga. ¹⁶ Na bushibi iyaka maudagilo ma ndu gya Isilaeli, ugila usona uengelechiwe, habigaluwa ulola unyuma wabo; nabo bimana ugana nene noo Mlume ABETCHA. ¹⁷ Ha mwaa gwa maumi mopi na njwii, mwachi gwa gutangi lusugu lwa lutangi lwa mwachi, inywa ya MLUME injwilile, ugana, ¹⁸ Mwana gwa mtu, Nebukadleza, oolo lya Babeli gugimiye basolokoto bage mnda mgilo gwa bita hegulu ha Tilo; mswe go gose gubiilwe ibanda, na ombe lyolyose lisasulwe ibambi, ata bibyo gushibele na alambwe uhuma Tilo, utula gee na basolokoto bage bose, yulu ya mgilo guya gweligilile yulu yage. ¹⁹ Biino, Mlume ABETCHA gwagana bino; Loola, nimma Nebukadleza oolo lya Babeli, gigyo sii gya Misili; nage gwibaguha batu bage ihichi yose nayo, na uguha kole chage, na uguha buhibi bwage, nabyo noo bibi alambwe age na basolokoto bage. ²⁰ Namma sii gya Misili uba alambwe a mgilo gweligilile, wa bululi bagilile mgilo yulu yanyi; Mlume ABETCHA gwagana. ²¹ Luya lusugu ndu gya Isilaeli gyitota meega, nene niuha ubulula anywa hawingi habo; nabo bimana ugana nene noo MLUME.