¹ Inywa ya MLUME injwilie iyaka, ugana, ² Mwana gwa mtu, msmbile mmata gwa Tilo, Mlume ABETCHA gwagana bino; Bululi mtima gobe gwaginyuwa, na gogwe wagana, Nene noo Abetcha, nene nashama wisuba ya Abetcha, m'bwingi na bahali; ata bibyo gogwe uli mwana gwa mtu ushi Abetcha, inangwa wabiya mtima gobe nahi mtima gwa Abetcha. ³ Loola, uli nalwengu uhima Daliele; hashi inywa ya lubisagulu inaubisa batu; ⁴ wa lwengu lobe na wa malango mobe walibiya mona, gogwe wapata nolo na lufeza mnda lindo lyobe. ⁵ wa lwengu lobe lwiingi na byudagulanya byobe, walibiya bumbona bobe, namtimagobe gwaginyuwa yulu ya bumbona bobe; ⁶ bino, wa bibyo, Mlume ABETCHA gwagana bino; Bululi wabiya mtima gobe nahi mtima gwa Abetcha; ⁷ bino, loola, nilusha bagenyi hegulu hobe, batu ba ginge mioga budanja; nabo bihulula tuhilu twabo hegulu ha ubenda wa lwengu lobe, nabi bibeda ugema obe. ⁸ Biusacha ndaa na mmina; na gogwe wiiwa lubu lwabo baya bene bahagilwe mnda bahali. ⁹ Wi wii! Wigililila udogoma u mbela wa guya gulihuuhaga, Nene noo Abetcha? Ata bibyo uli mwana gwa mtu, ushi Abetcha, mmaboo mage guya gulihuubiya malase. ¹⁰ Wiiwa lubu lwa baya bene bashigile kumbi, wa maboo ma bagenyi; bululi nene nadogoma ino inywa, Mlume ABETCHA gwagana. ¹¹ Iyaka inywa ya MLUME injwilile, ugana, ¹² Mwana gwa mtu, um'biile malilo oolo lya Tilo, umsambile, Mlume ABETCHA gwagana bino; gogwe waibiya yaala lulingo, wagilula lweengu, na uwilila wa buhungwe. ¹³ Ubele mnda mwa Adene, ibenda ya Abetcha; mawe mose mugengeda mabele byuliunina byobe, akiki, na yakuti ma imanjano, na mmubo, na zabalajadi, na shohamu, nayaspi, na yakuti ya ibule, na zumalidi, na bahalamani, na nolo; mgilo gwa bigombaganywa na bihonde byobe ubele nabyo; lusugu lwa ubumbwa obe bisibele bilongiwe. ¹⁴ Gogwe ubele kelubi gwa ushinyiwa mauta na guuwila; nene niubiile ubehegulu ha loono lwa luhaha lwa Abetcha, uenine ubo na uya hawingi ha mawe ma aahya. ¹⁵ Ubele m'bwilile mnda madila mobe utula lusugu luya loli bumbilwe, ndaa na mengo mamoneye usona mnda mobe. ¹⁶ Wa yulu ya udagulanya obe batu buugiluche busapanyi mnda mobe; na gogwe wagila buubi; bululi bwa bibyo nuuhunya wa uoma mnda loono lwa Abetcha, nahi itu ya bunyenye; nene nuuchimyaa, Gogwe kelubi guunina, uhume hawingi ha mamomawe maahya. ¹⁷ Mtima gobe guginyuwe yulu ya buhungwe bobe; wadogya lweengu lobe wa yulu ya ugema obe; niutelile hasi, niulachiche u mbele wa maoolo, bululi buumone. ¹⁸ Bululil bwa bwiingi bwa usona obe, mnda usona wa udagulanya obe, wahabiya bunyenye ha ihana yobe; biino nahila aahya uchwa oli, nao iuchigya, nene nuita uba mtoo hagulu ha sii, u meeso mabatu bobe bene biulola. ¹⁹ Bose bene buugidi hawingi ha mioga gya batu biugagilwa; usiliitu ya ugagicha, na ushibi ho iyaka ata na milumbu. ²⁰ Inywa ua MLUME injwilile, ugana, ²¹ Mwana gwa mtu uhugululeyenyu yobe luubi lwa Sidoni, ubuwe yulu yage, ²² ugane, Mlume ABETCHA gwagana bino; Loola, nene nili hegulu hobe, #e Sidoni, nene natonywa hawingi hobe; nabo bimana ugana nene noo MLUME, hene handibi nahuwilicha uonona wanyi mnda mwage, na uhahachiwa mnda mwage. ²³ Bululi nibahilila bisumi, na maashi, u masango na ndila mage, na baya bene babiilwe malase biigwa hawingi hage, wa ahilu ngubi chose; nabo bimana ugana nene noo MLUME. ²⁴ Na hashibi na byokole bya utungana mndu gya Isilaeli; ata na miigwa gwa uchibulau mmagulu mw bose bene bali bamchungulubu, bene babagilile bihisho bya anene; nabo bimana ugana nene noo Mlume ABETCHA. ²⁵ Mlume ABETCHA gwagana bino; Handibi nahuhwa ubasumbicha ba ndu gya Isilaeli, na ubagiwicha uhuma hawingi ha batu bene babamwagiye wabali, na uhahachiwa wabali u meeso ma mioga, haho noo habishamamnda sii gyabo boo bene, gyandimlahile mgichi gwanyi Yakobo, ²⁶ Nabo bishama mmo kolongecho; ehe, bugubaa madu, na uuna mizabibu mmabala, na ushama kolongecho; handibi nahuwilicha uonona wanyi hegulu ha batu bose, baya bene bali humgilile bya anene ngubi chose; nabo bimana ugana nene noo MLUME Abetcha abo.