¹ Hasibele mwaa gwa umi na gumwechi, lusugu lwa lutangi lwa mwechi, inywa ya MLUME injwilile, ugana, ² Mwana gwa mtu, Wa ibalo Tilo gwadogoma yulu ya Yelusalemu, Oho! Gee bwabeleya gubele mchango gwa milongo gya batu; gungalwile; nigilulwa bululi hano gwadoga; ³ bino Mlume ABETCHA gwagana bino; Loola, nene nili hegulu hobe, Ee Tilo, nene nichwisha mioga giingi ulwa nobe, nahi bahali byalisuginuna mabimbi mage. ⁴ Nabo bidogya bibambacha bya Tilo, na ubele madu mage ma malahu; na nimmyagila ata ihwili yage iguluwe, na ummita uba liwe lya hululu. ⁵ Nage gubi ihananya ugandila maila ma balobi m'bwingi na bahali; bululi nene nadogoma ino inywa, gwagana Mlume ABETCHA; nage gubi kole cha mioga. ⁶ Na misiha gyage gyine gili umabala gyihagwa wa ahilu; nabo bimana ugana nene noo MLUME. ⁷ Bululi Mlume ABETCHA gwagana bino; Loola, nimchisha Nebukadleza, oolo lya Babeli, oolo lya maoolo, hegulu ha Tilo uhuma luubi lwa uboo wa uachi, hamwechi na falasi, na tubilibili twa bita, nabachinyi ba falasi, na bilume pambwa, na batu beengi. ⁸ Gwihaga misiha gyobe wa ahilu u mabala; nage gwigubaa migumbo gya mawe yulu yobe, na ugimiya migumbo gya miti yulu yobe, na uginuna ngabo yulu yobe. ⁹ Nage gwibiya bigela bya ubelela bibambacha byobe u mbele obe, na wa matemo mage gwigwisha madu mobe ma malahu hasi. ¹⁰ Wa yulu ya falasi chage chiingi, ihwili yabo yuwila; bibambacha byobe byidigila yulu ya kindo cha falasi, na wa bichigi, na wa tubilibili twa bita, heligingila mnda michango gyobe, nahi biya bisugingila batu mnda mbuga gyine gibelilwa hamwe. ¹¹ Wa tubidi twa falasi chage gwigyatila madila mobe mose; gwihaga batu bobe wa ahilu, na madu mobe maomu ma makahu miigwa ndaa na hasi. ¹² Nabo biita bumbona bobe uba kole, na bisuganywa byobe uba buhibi; nabo bibele bibambacha byobe, na udogya madu mobe ma ugengeda; nabo bibiya mawe mobe, na miti gyobe, na ihwili yobe, mnda maadi. ¹³ Nene nisungya madi ma ng'imbo chibe, na madi ma binubi byobe mashihulichiwa iyaka. ¹⁴ Nene niuita uba liwe lya mnda hululu; ubi ihana ya ugandila maila ma balobi; ushigubawa iyaka; bululi nene, MLUME, nadogoma ino inywa, Mlume ABETCHA gwagana. ¹⁵ Mlume ABETCHA gwamsambila Tilo ino inywa; Wi wii! Bichiba bishidigila yulu ya lwindo lwa ugwa obe, habisumwa baya bene balasilwe, hawiiswa ushinjiwa hawingi hobe. ¹⁶ Haho noo hene bauulu ba bahali bose habihuma u bisuba byabo bya buoolo, na ubiya hibamba bisanjwa byabo, na uchula bichwalaganywa byabo bya bibiwe malenda; boo nulichwiya udanda; bishama na udanda mengo mo mose, na uugagilwa. ¹⁷ Nabo biubiila malilo, na uusambila, Bisili wii gogwe udoga, gogwe mine ushaminywe na baana ba maadi, mbuga gya punda, ubele na uoma mnda bahali, gigyo mbuga, na babo bene babele bashame mnda mobe, bababiile booba bene babele bashame mnda mobe! ¹⁸ Biino bichiba byidanda lusugu lwa ugwa obe; ehe, bichiba byine bili mnda bahali byidamba mme, yulu ya uhuma obe. ¹⁹ Bululi Mlume ABETCHA gwagana bino; Henehandiuita uba mbuga gya mauwa, nahi mabuga mene mashi mashaminywe na batu; handichwisha mabenga mabahali hegulu hobe, na maadi meengi hamiuunina; ²⁰ haho noo handiusacha hamwechi nabo bene balihusala mmiina, ugye u batu baala; nene niushamya luubi lwa hasi ha ibaloo; ihana yine ibele mauwa utula aala, hamwechi na baya balihusala mmiina; yulu ushishaminywe na batu, naushibiye ugengeda obe mnda sii gya batu benebali na mwego. ²¹ Niuita ube itu ya ugagicha, na ushibi ho iyaka; inangwa unaengwa, bibyo ushimoneya iyaka abisa, Mlume ABETCHA gwagana.