¹ Inywa ya MLUME injwilie, ugana, ² Mwana gwa mtu, uhugulule yenyi yobe uli baana ba Amoni, wabuwe yulu yabo. ³ Ubasambile babo baana ba Amoni, Ihulichiwe inywa ya Mlume ABETCHA; Mlume ABETCHA gwaganabino; Bululi wagana, Aha! Yulyya ha haha hanyi, hene habiilwe bunyenye; na hegulu ha sii gya Isilaeli; na hegulu ha ndu gya Isilaeli, habagile ubuhambwa; ⁴ bino, wa yulu ya bibyo, niubiya mnda maboo ma baana ba mlugulu ube mtu gwabo, na bibiya bulalo bwabo nda mobe, na ulongya bushamo bwabo mnda mobe; biiya biguma byobe, na unywa mabele mobe. ⁵ Nene niita Laba uba ibunga-bunga ya bulilo bwa punda, na baana ba Amini uba ihana ya ulacha bihichi bya miyoo; benywe mwimana ugana nene noo MLUME. ⁶ Bululi Mlume ABETCHA gwagana bino; yulu wahula kwasa, na uta kindo cha magulu mobe, na useelela yulu ya sii gya Isiaeli, anene ose a mtima gobe; ⁷ bino, loola, nagolola uboo wanyi hegulu hobe, nana niuhana ube kole gya mioga; nene niuchinga koo na mlongo gwa batu banyi, na nene niuchimyaa; ushibe mnda gigyo sii, niusungya; gogwe wimana ugana nene noo MLUME. ⁸ Mlume ABETCHA gwagana bino; Wa ibalo ya Moabu na Seili balihugana, Loola, ndu gya Isilaeli gili nahi ginge mioga gyose. ⁹ bino, loola, baanaba mlugulu lubachu lwa Moabu uhuma mmabuga mage, uhuma u mabuga mage mene mali u ng'umba chage, ugengeda wa gigyo sii, Beth-yeshomothi, na Baal-meoni, na Kiliathaimu, ¹⁰ hamwechi na baana ba Amoni, nene nibahana uba buhyililwa, yulu baana ba Amoni bashiengelechiwe hawingi ha mioga. ¹¹ Nene nihana uonona yuluya Moabu; nabo bimana ugana nene noo MLUME. ¹² Mlume ABETCHA gwagana bino; bululi Edomu gwagila inyumeya ndu gya Yuda, wa uligiwidicha buubi wa buubi, boo baluba abisa, yuluya uligiwidicha buubiwa buubi. ¹³ yuluya bibyo, Mlume ABETCHA gwagana bino; Nigolola uboo wanyi hegulu ha Edomu, nibachinga koo maana ba batu na nyama; nene niita uba mauwa uhumina Temani; ndaa na ulugumba lwa Dedani bihagwa wa ahilu. ¹⁴ Nene niita uligiwicha wanyi yulu ya Edomu, uhitila uboo wa batu banyi Isilaeli; nabo bigila bihisho nda Edomu, ulamana na sungu chanyi, na uchigililwa wanyi, nabo bimana ugana nene noo Mlume ABETCHA. ¹⁵ Mlume ABETCHA gwaganabino; Wabululi Bafilisti bagila wa uligiwidicha buubi wa buubi, nabo baligiwidicha wa anene a mitima gyabo, yulu ya uhachimya wa bumangu bwa masugu mose. ¹⁶ wa iyoibalo, Mlume ABETCHA gwagana bino; Loola, nigolola uboo wanyi hegulu ha Bafilisti, nene nibachinga koo Bakelethi, na ubadogya bene bishigala luubi lwa wibega. ¹⁷ Nene niligiwidicha buubi wa buubi bwaata, nibaambila wa buhuchi; nabo bimana ugana nene noo MLUME, handiligiwidicha buubi wa buubi hegulu habo.