¹ Iyaka, mnda mwaa gwa yahabula, mwechi gwa umi, lusugu lwa butano lwa mwechi, inywa ya MLUME injwilile, ugana, ² Mwana gwa mtu, ligole china lya luno lusugo, ehe, lya luno lusugu; oolo lya Babele lyahiila Yelusalemu loka lulo lusugu. ³ Ubasambile mihingu ndu gya ubenga, wabasambile, Mlume ABETCHA gwagana bino; Biiya lweso,lubiya; wabiye maadi mnda mwalo; ⁴ ubiongole na ubibiya bihindi mnda mwalo, ehe, kila ihindi isoga ya ilimbago na ya ombe; ulugiluche na mauda ma masubolwe. ⁵ Ugiguhe miyoo gya gisobolwe mnda ihichi yagyo, wabiye mtala gwa mauda hasi hagyo. Waabiche abisa; ehe, mauda mage maseluwe mnda lweso. ⁶ Biino M;ume ABETCHA gwagana bino; Luhanga luubi wa mbug gya maashi! Lulo lweso lwine lwina kisi mnda mwalo, kisi chalo chishihuluhuma; luhunye bihindi bihindi; hashi usobolwa ugwile waluli, yulu lusobolwe. ⁷ Bululi lwina maashi mnda mwalo; gulubiile hegulu hali liwe lyine lili hululu; gushimageshile hegulu ha bitete, yulu gamahulile na ihwili; ⁸ bibyo gusediche uchigililwa wa uguwidicha buubi wa buubi, nibiile maashi mage hegulu ha liwe lyine lili hululu, yulu mashihulilwe. ⁹ Biino Mlume ABETCHA gwagana bino; Luhanga luubi lwa mbuga gwa maashi! Nene na nene niongecha buhango bwa kunyi. ¹⁰ Biya kunyi chiingi, usenye aahya, ubiche nyama abisa, uite msabi gwa gunyemu, ulebeche na mauda. ¹¹ Hanyuma walubiye lweso hegulu ha maala, luli hululu lwawate aahya, na mmubu gwalo gwachige, m'bilo gwalo gwasumbululwe, na kisi chalo chichige. ¹² Gwaligonja wa asusu, ata bibyo kisi chalo chingi chisaluhuma; kisi chage chisahuma na aahya. ¹³ Mnda bunyenye bobe muli masei, bululi nuuhahacha, ata bibyo gogwe usahahala; ushihahachiwa iyaka iiyoyobe iuhume, ndaa na byandilitolelecha sungu chanyi yulu yobe. ¹⁴ Nene, MLUME, nadogoma ino inywa, nayo ibi, nene niigila; nishiileya, na nishimonena keene, na nishigaluwa; ulamana na madila mobe, na ulamana na bigilanywa byobe, noo byabiuonona, Mlume ABETCHA gwgana. ¹⁵ Inywa ya MLUME injwilile iyaka, ugana, ¹⁶ Mwana gwa mtu, loola, nuuhuminywa uhulwa umwechi oshinaosha umona, msobolwa gwa meeso mobe; biilo ushibi na malilo na ulila, na byosochi bishisuwe mmeeso mobe. ¹⁷ Sumwa na ulila ushi wa liidi lya uhulichiwa; ushibiye lilo yulu ya guya mine guwile; liwile isanjwa yobe umswe, uchwale mikalabanda gyobe, na uchibumbe milomo gyobe, na ushiye iliwa ya mtu. ¹⁸ Bibyo nidogomine na batu halwelo, na igolo mmachanyi nuuwa; nene nigilile halwelo nahi byandisambilwe. ¹⁹ Babo batu basambile, Wi wii! Ushihubenja utusambila mana na bibyo bihisho watuli, na wahuita nahi byoswita. ²⁰ Nibasambile, Inywa ya MLUME injwilile, ugana, ²¹ Ubasambile ndu gya Isilaeli, Mlume ABETCHA gwagana bino; Lingaminywe, nihabiya bunyenye ha haha hanyi, punda cha uosha wenyu, ihana ya ubenjiwa na meeso menyu, hene mitima gyenyu gili huhamonena keene na bawalubaga benyu na bawamisiha gyenyu, bamushigile hanyuma, biiwa wa ahilu. ²² Benywe mwigila nahi nene byandigilile; mushibumba milomo gyenyu, na mushiya iliwa ya mtu. ²³ Na bisanjwa byenyu bibi hegulu ha miswe gyenyu, na mikalabanda gibi u magulu menyu; mushibi na malilo na mushilila; mwuhunguwa nda usona wenyu, na mwisumwa kila mtu na miinage. ²⁴ Haho noo bibi Ezekiele isaga wamli; benywe mwigila ulamana na byose byeligilile gee; hawichwa ino ihisho, haho noo hamwimana ugana nene noo Mlume ABETCHA. ²⁵ Gogwe, mwana gwa mtu, wi wii! bishibi bino luya lusugu lwandibahunya uoma wabo, na saso lya ugengeda wabo, na yine ibele ya itima ya meeso mabo, yine yabaginunine mitima gyabo, baana babo na misiha gyabo. ²⁶ ugana loka luya lusugu gee mine gwihogonowa gwichwa oli, uuha mwano gwa ino ihisho wa tung'eneng'ene. ²⁷ Luya lusugu anywa obe iununywa wa guya gwiononywa, gogwe, wigana, ushibi ameme iyaka; nii byobi isaga wabali; nabo bimana ugana nene noo MLUME.