¹ Inywa ya MLUME injwilile iyaka, ugana, ² Mwana gwa mtu, habele na baachana babili, msiha gwa mnaga gumwechi; ³ nabo baitile masei uya Misili; baitile masei mengo ma buwamisiha bwabo; byaali byabo bibele bihangu, na babele bahambe mabele ma bunyundu bwabo. ⁴ Na machina mabo, mmulwa batugugishilwe Ohola, na mnunage Oholiba; babele banyi, babushile baana na misiha. Na babo machina mabo, Samalia noo Ohola, na Yelusalemu noo Oholiba. ⁵ Na Ohola gugilile bya lusengu helibele gwanyi; nage guunjile abisa baunjwa bage, Baashuli babinji nage. ⁶ Bene bachwiiwe imanjano, maata ba mabuga na tupita, boose bawalubaga ba uunjwa, bashinyi ba falasi babechina falasi chabo, ⁷ Gubagabulile bihisho byage bya lusengubatu ba basobolwe ba Ashulu, boo nabo, gulibiile bunyenye bwa tuwe lugulu tose twa gegese guya mine gweliundile. ⁸ Na gushileile bihisho byage bya lusengu utula uya Misili, bululi mengo ma buwamsiha bwage balalile nage, bawashile mabele ma bunyundu bwage bageshile bunyenye bwabo hegulu hage. ⁹ Bululi bwa bibyo nim'biile mnda maboo ma baunjwa bage, mnda maboo ma Baashuli, bene beliunjile. ¹⁰ Na babo babulule buchi bwage, baguhile baana na misiha gyage, boo nummaga gee wa ahilu; gee noba na china lya abule hawingi ha baachana; bululi bahyiiche uonona hegulu hage. ¹¹ Mnunage, Oholiba, gumonine bibyo haho gugililile ugugila ummima gee, wa ubenja balumyana wage, na wa lusengu lwage, wine ubele wiingi uhima wa mmulwage. ¹² Guunjile Baashuli, baata ba mbuga na tupita, babinji nage, bene bachwiiwe bichwalaganywa bya ugagicha, bachinyi ba falasi habalibachine falasi chabo, bose abisa ii bawalubaga ba uunjwa. ¹³ Nimonine ugana gwabiwa bunyenye; bose babili balamine ndila gimwechi. ¹⁴ Nage gulibiya lusngu lwage; bululi gumonine balumyana, bene byenyi byabo bili bigolwe u bibambacha, byenyi bya Bakaldayo byine bibele bigolwe nalangi lya ligachichu; ¹⁵ babele bahambwe michingo mmunda chabo, na bisanjwa bya umiswe bya bibiwe langi u miswe gyabo; boose baata ba ulolwa, wa mlingilisho gwa baana ba Babeli uya Ubakaldayo, mnda sii gya ubuswa wabo. ¹⁶ Na helibamonine gubaunjile na uhilabatu balisambi wabo uya u Bakaldayo. ¹⁷ Na batu ba Babeli bamgilile mnda ingo ya luundo, bam'biile bunyenye bwa lusengu lwabo, gubiilwe bunyenye nabo, hanyuma mtima gwage gugumene nabo, ¹⁸ Haho guunune lusengu lwage, na uununa buchi bwage; haho noo mtima gwanyi gugumene nage, nahi byeligumene na mmulwage. ¹⁹ Ata bibyo guongeche lusengu lwage, heliengeche masugu ma buwamsiha bwage, heligilile bihisho bya lusengu mnda sii gya Misili. ²⁰ Gubabenjiche abisa baunjwa bage, boo nyama cha mibili gyabo chili nahi nyama cha punda, na yine ibele hubahuma ibele nahiili huhuma falasi. ²¹ Noo byoliengeche maseli ma buwamsiha bobe, hamahininywe balele mobe na ba Misili, wa mabele ma buwamsiha bobe. ²² Bululi bwa bibyo, Gogwe Oholiba, MluME ABETCHA gwagana bino; Loola, nibaginuna baunjwa bobe hegulu hobe, na mtima gobe gwagumana nabo, nene nibachwisha hegulu hobe ngubi chose; ²³ batuba Babeli, na Bakaldayo bose, Pekodi na Shoa na Koa, na Baashuli bose hamwechi nabo; bawalubaga mahungwe, na boo, baata namabuga na tupita, bauulu, nabatu bene bali na punda chata, na batu bene bai huchina falasi. ²⁴ na bichwa oli na tulume gela twabo,na tubilibili twabo twa bita, na bichigi, namioga giingi; bililuliya oli na ngabo, na biginga, na tukusukusu twa lusuu, ngubi chose; nene nibaha uoshawa uuonona, nabo biuonona ulamana na uonona wabo. ²⁵ Nene nibiya buwa bwanyi hegulu hobe, nabo biugila bihishi wa uchigililwa; biuchulammyembe gobe na matu mobe; namihonagyobe gyigwa wa ahilu; bibaguha baana bobe na misiha gyobe; namihona gyobe gyichigiwa mmaahya. ²⁶ Iyaka biuchula bichwalaganywa byobe, na uhunywa bitundu byobe bya buhungwe. ²⁷ Bibyo noo byandisungya masei mobe, na lusengu lobe, uchwishiche uhuma sii gya Misili; ushichwe ubaginunina meeso mobe, na uengelecha Misili iyaka. ²⁸ Bululi Mlume ABETCHA gwagana bino; Loola, niubiya mnda maboo ma baya bene bolihuonywa, na mnda maboo mabo, baya bene mtima gobe gugumenenabo; ²⁹ nabo biugila bihisho wa mmonywa, biuhuminywa migilo gyobe gyose, biushiga buchi, ushina bichwalaganywa na abule a bihisho byobe bya lusengu miununywa, namasei mobe na lusengu lobe. ³⁰ Wigililwe bibyo bihisho bululi waita masei nabatu bashi ba bawashe, naibalo wabiwa bumyemye bwa tuwe lugulu twbo; ³¹ Ugile mnda ndila gya mmulobe; biino nibiya isengo yage mnda uboo obe, ³² Mlume ABETCHA gwagana bino; Wiinywa isengo ya mmulobe; yine ili na ihaa iingi ya yaata; wisebululwa na unenunywa; ili igiluchu abisa. ³³ Wigiluchiwa boolwa na ulitongelela, na isengo ya ugagilwa na ahumbwe, isengo ya kchobe Samalia. ³⁴ Ehe, wiinywa na uombotola byose, wibitauna tugingiliwe twage, wilihala-hala u mabele mobe; bululi nene Mlume ABETCHA nagana ino inywa. ³⁵ Biino Mlume ABETCHA gwagana bino; Yulu wangibilila, na utele nyama chobe, bino wa bibyo, uguhe masei mobe na lusengu lobe. ³⁶ Iyala MLUME gusambile, Mwana gwa mtu, wibaonona Ohola na Oholiba? Biino ubasambile uchigilicha wabo. ³⁷ Bululi baita masei, na maashi mali mmaboo mabo, nabo baita masei na tuwe lugulu twabo; iyaka baana babo bene babambutile babahisha mnda aahya yulu bachigiwe nao. ³⁸ Iyaka bangila biino; bahasonya ha ihana yanyiya ihaha, loka luya lusugu, nabo badogya sabato chanyi. ³⁹ Wa ibalo hababele bahuhwa ubashinja baana babo u tuwe lugulu twabo, haho boo nuugingila hahaha hanyi, loka luya lusugu, bahaitile bya bunyenye, naloola, bagilile bibyo mnda ndu gyanyi. ⁴⁰ Iyaka mwabatuma batu ubagita bgyata madila buhuma koo; yuga ndogomi gutuminywe wabali, na loola, bachwile; nagogwe uligogile yulu yabo, ulishininywe langi u meeso mobe, na ulinoneya bichwalaganywa bya buhungwe; ⁴¹ ushamine wiingo ya buoolo, na mesa maganjwe u mbele wage, mali mabiwe hagulu hamo buswenge bwanyi na mauta manyi. ⁴² Na maadi ma batu eengi benebali na mshaminyi gwa ulitucha mabele hamwechinage; na hamwechi nabatu bene bashi na sumia, balushiwe baolwa uhuma mlwanaganywa; bababiile lusuu u maboo, na masala masoga u miswe gyabo. ⁴³ haho niganine, Gugu guli mmosu gunagila maseli! Biino babo biita nage nasei, ehe, na gee! ⁴⁴ Bamgingilile nahi byabasugingilila sengu; noo byabagingilile Ohola na Oholiba, baachana baya bamasei. ⁴⁵ Bibyo batu bene bali na kiine bibaonona, wa uonona ulingya bamaseli, na uonona ulingye baachana bene bali hugesa maashi; bululi boo ii bamaseli, na mmaboo mabo muli maashi. ⁴⁶ Bululi Mlume ABETCHA gwagana binp; Nihila sumbilo lya batu hegulu habo, nene nihunya bagululwe ubo na ubo nauwaswa kole. ⁴⁷ Na lilyo sumbilo lyibata mawe, na ubahaga wa tuhilu twabo,; na uchigya madu mabo na aahya. ⁴⁸ Bibyo nionona maseli mnda gino sii, yulu baachana bose bagigiwe, bashigile bihisho bya maseli manyu. ⁴⁹ Nabo bimma alambwe a masei menyu, na benywe mwiguha buubi bya tuwe lugulu twenyu; benywe mwimana ugana nene noo Mlume ABETCHA.