¹ Inywa ya MLUME injwilile iyaka, ugana, ² Na gogwe, mwana gwa mtu, wi wii! wigionona, wigionona gino mbuga gya maashi? Biini, ugisambile uchigilicha wage ose. ³ Gogwe wagane, Mlume ABETCHA gwaganabino; Mbuga gyigesa maashi mnda mwagyo, bululi mengo mage maachwe; mbuga gyiita tuwe lugulu yuluya ichuli-chuli yagyo ya mwego, bululi gilibiya bunyenye! ⁴ Gisili na abachi yulu ya maashi magyo magyagesa, gogwe usili na bunyenye bwa tuwe lugulu tobe tolilongiche; gogwe wamachwisha hoka masugu mobe, gogwe wahuhiya hoka na myaa gyobe; bino, wa yulu ya bibyo, nuita uba gulangululwa u mioga, na guusewa mnda bibaloo byose, ⁵ byine bili hoka, byine bili koo nobe, byushiga yoga-yoga, Gogwe gwa buchafu, gwamgiluchu alugi. ⁶ Loola, bauulu ba Isilaeli ge gese ulamana na uoma wage, bali mnda mobe, yulu ya ugesa maashi. ⁷ Mnda mobe bali hunenuna shibaana na mnabaana; hawingi hobe balihugilila bagenyi bya ubasapa; mnda mobe bali humonena mashige na bawile. ⁸ Wabinenuna bitundu byanyi bya bihaha, wabiya bunyenye sabato chanyi. ⁹ Bachinganyi bali mnda mobe, bululi bagese maashi; na mnda mobe balihuuya hegulu ha loono; hawingi hobe balihuita masei. ¹⁰ Mnda mobe babulule buchi bwa bamasabo; mnda mobe bamgingilie wa uoma mmachana gushi bibenju mengo meli u bya baachana byage. ¹¹ Na mtu gumwechi gwagila bya uchigilicha hamwechi na mmachi gwa m'binji nage; na gunge mtu gwamdogya mmachi gwa mwanaage wa ndilagya masei; na gunge mtu mnda mobe gwamgilile kachage wa uoma, kachage wa sage. ¹² mnda mobe bagaa bugeda milomo yulu ya ugesa maashi; wagaa byulibiya na alambwe; gogwe wa bushimbi wahewa byuhewa wa usapa m'binji nobe, gogwe wangibilila nene, Mlume ABETCHA gwagana. ¹³ Biino, loola, naahulila luhi ao alambwe opashile u ndila gishi gya kiine, na mamo maashi mobe mene mabele hawingi hobe. ¹⁴ Wi wii! Mtima gobe gunaosha ulitolelecha, na uboo obe unaosha na uoma, ha maya masugu mandiugila bihisho? Nene MLUME nadogoma ino inywa, iyaka, niigila. ¹⁵ Nene niusambalacha hawingi ha mioga, na uusala hawingi ha sii gyose koo; nene nibuchigya buchafu bobe, yulu buuhume. ¹⁶ Gogwe wibiwa bunyenye mnda ichuli-chuli yobe ya mwego, u mbelewa meeso na mioga; gogwe wimanaugana nene noo MLUME. ¹⁷ Inywa ya MLUME injwilile, ugana, ¹⁸ Mwana gwa mtu, ndu gya Isilaeli gisili iiyo ya lufeza wandi; bose basili lusuu, na bati, na igela, na lisasi, mnda aahya a maala; basili iiyo ya lufeza. ¹⁹ Biino Mlume ABETCHA gwagana bino; Bululi benywe bose musili iiyo ya lufeza, loola, nimsumbicha hawingi ya Yelusalemu. ²⁰ Nahi biya bisuongola batu lufeza, nalusuu nabigela, namasasi,nabati, hawingi ha aahya a maala, yulu ya ubihulila aahya na ubisumbuluya; noo byandimsumbicha benywe wa sungu chanyi, nene nimlacha ubo, na umsumbulucha. ²¹ Ehe, nimsumbicha, na umwongolwela aahya a uchigililwa wanyi, nabenywe mwisumbuluwa mnda aahya. ²² Nahi bisusumbuluwa lufeza mnda aahya a maala, noo byamwisumbuwa hawingi hage; na benywe mwimana ugana nene noo MLUME, nahongolola uchigilwa wanyi hegulu henyu. ²³ Inywa ya MLUME injwilil,ugana, ²⁴ Mwana gwa mtu, Ugisambile sii, Gogwe uli sii gishi gya gihahachu, ataunyenywa na mbula lusugu lwa uchigililwa wanyi. ²⁵ Mmonywa gwa ba mbuwa bobe guli mnda mobe, nahi tambwe byagisuduga hagisuwata buhibi; balihuya mitima gya batu; basuguha wa uoma bya mlindo na bitundu bya uguchiwa wa bumona bwiingi; babuche lubalo lwa bawilwa mnda mwage. ²⁶ Bibuli byabo byanoga m'bindo gwanyi, babiya bunyenye bitundu byanyi bya buhaha; bashibiile hala-hala bitu bya bihaha na bitu bya ugililwa masugu mose; na bashibagigiche baana usobolanya bitu bisone na bitu bisoga,nabo bawila meeso mabo, bashilole sabato chanyi, nene nabiwa bunyenye hawingihabo. ²⁷ bauulu bage hawingihage basili nahi mibwa-bwa balihuhaga buhibi; yuluya ugesa maashi, na udogya mitima gya batu, baabe na alambwe wa ndila gishi gya gisoga. ²⁸ Na bambuwa bage babashinya luhemba chishi cha chinyuibu bisoga, balihumona bunene, na ubabuwila binywa bya lulimi, balihugana, Mlume ABETCHA gwagana bino; inangwa Mlume gusagana inywa. ²⁹ Batu ba gino sii baudagila usapana, balihusapa wa uoma; ehe, bali hubagilila bya buhulihuli ba mbuchu na basabi, nabo balihubamonena bagenyi ushi wa kiine. ³⁰ Nene niengile mtu hawingi habo, gwigubaa mgumbo,na ugimoya u mbele wanyi ihana yine ibelilwe, wa yulu ya sii, nashichwe ugidogya, ata bibyo nishimonine mtu. ³¹ Wa yulu yaiyoibalo nahongolola uchigililwa wanyi hegulu habo; nibachigiche wa aahya a sungu chanyi; nene nalusha ndila gyabo boo bene hegulu ha miswe gyabo, Mlume ABETCHA gwagana.