¹ Hasibele mwaa gwa njwii, mwechi gwa butano, lusugu lwa umi lwa mwechi,bamwe bauulu ba Isilaeli bachwile yulu ya ubucha wa MLUME, na ushama u mbele wanyi. ² Inywa ya MLUME injwilile, ugana, ³ Mwana gwa mtu, dogoma na bauulu ba Isilaeli, ubasambile, Mlume ABETCHA gwagana ino; Wi wii! Mwachwa umbucha inywa? Nmbo byandi nene na mwego, gwagana Mlume ABETCHA, nishibuchiwa inywa nenyu. ⁴ Wi wii! Wibaonona, baana ba batu, wibaonona? Ubasambile uchigilicha wa bamasabo; ⁵ ubasambile, Mlume ABETCHA gwagana bino; Luya lusugu lwandisobole Isilaleli, na ubaginunina ibushi ya Yakobo uboo wanyi, na ulimonywa wabali mnda sii gya Misili, haya handibaginunine uboo wanyi, niganine, Nene noo MLUME Abetcha enyu; ⁶ maya masugu nimginunine uboo wanyi, ummunya mnda sii gya Misili, na umgingicha mnda sii gyandimdindile, gyagigiluchu mabele na bui, gyoo noo ugengeda wa sii gyose. ⁷ nibasambile, Gegese mtu wamli gatele koo byuchigilicha wa meeso mage, na mushilibiya bunyenye bwa tuwe lugulu twa Misili, Nene noo MLUME Abetcha enyu. ⁸ Ata bibyo bamengile, na bashibenjiche upulicha; bashitelile koo bya uchigilicha bya u meeso mage kila mtu, na bashitushigile tuwe lugulu twa ba Misili; haho noo niganine, nihongolola uchigililwa wanyi hegulu habo, na mnda sii gya Misili. ⁹ Bibyo nigilile yulu ya china lyanyi, bululi lishibiwe bunyenye u mbele wa meeso na mioga, bene babashamine hamwechi nabo, baya bene bandilimoninye u meeso mabo hululu, wa ummunya benywe mnda sii gya Misii. ¹⁰ Bibyo nimmunyinye mnda sii gya Misili, nimyiche mlwanaganywa. ¹¹ Nimmele alago anyi, na ummonya uonona wanyi, byine mwana gwa mtu gwishama nabyo, nambo gwibigila. ¹² Iyaka nimmele Sabato chanyi, (lusugu lwa ulitucha) yulu ibe isaga hawingi hanyi nene nabo, bululi baoshe umana ugananene, noo, MLUME gwa ubahahacha. ¹³ Ata bibyo ndu gya Isilaeli bamengile mlwanaganywa; bashigilile nagi alago anyi, bahaninye uonona wanyi, ene mwana gwa mtu elishama nao, nambo gwiagila; na sabato chanyi bashibiile bunyenye abisa; haho nignine, Nihongolola sungu chanyi hegulu habo mlwanaganywa, yulu nabachimye. ¹⁴ Ata bibyo nigilile yuluya china lyanyi, lishibiwe bunyenye u meeso ma mioga, baya bene bandibahuminye u mbele wa meeso mabo. ¹⁵ Iyaka nibaginunine uboo wanyi mlwanaganywa, ugana nishimgingicha mnda sii giya gyine gyandimmele, gya gigiluchu mabele na bui, gyoo noo ugengeda wa sii gyose. ¹⁶ ibalo bahaninye uonona wanyi, nabashigyatile mnda m'bindo gwanyi, babiile bunyenye sababo chanyi, bululi mitima gyabo gilamenena tuwe lugulu twabo. ¹⁷ Bibyo liiso lyanyi libamonene kene nashibachimye abisa, na nishibasungye abisa mlwanaganywa. ¹⁸ Hanyuma nibasambile baana babo mlwanaganywa, mushigile nahi m'bindo gwa bamasenyu, na mushiwashe uonona wabo, na mushilibiya byunyenye bwa tuwe lugulu twabo. ¹⁹ Nenenoo MLUME, Abetcha enyu; gyaswe mnda alago anyi, mwawashe uonona wanyi, na mwaugile; ²⁰ hahachiwe sabato chanyi; chibi isaga hawingi hanyinene nenyu, mwanane ugana nene noo MLUME, Abetcha enyu. ²¹ iya baya baana bamengile; bashigyatile nahi m'bindo gwanyi, na bashiwashiche uonona wanyi uugila, gwine mwana gwa mtu gubi namwego nambo gwigugila; babiile bunyenye sabato chanyi,(lusugu lwa ulitucha) haho niganine, nihongolola uchigililwa wanyi hegulu habo,yulu ya uwilicha sungu chanyi heguluhabo mlwanaganywa. ²² Ata bibyo niuchibile uboo wanyi, nigilile yulu ya china lyanyi, lishibiwe bunyenye u mbele wa meeso ma mioga, baya u mbele wa meeso mabo nimmuminye. ²³ Iyaka nimginunine uboo wanyi mlwanaganywa, ugana nibasambalacha hawingi ha mioga, na ubasala mnda bibaloo gya koo; ²⁴ bululi bashinyeminye uonona wanyi, yulu baguhninye m'bindo gwanyi, nabo bagibiile bunyenye sabato gyanyi, na meeso mabo malolile na tuwe lugulu twa bamasabo. ²⁵ Iyaka nibahele alago eneashi a asoga, na uonona wine wabashioshiche ushama nao; ²⁶ na nene nibabiile bunyenye yulu ya lutangi lwabo boo bene, bululi bachigiche baana babo ba batangi ubuswa waahya; yulu ya uita uba mauwa, bamaane ugaba nene noo MLUME. ²⁷ bino, mwana gwa mtu, dogoma na ndu gya Isilaeli, ubasambile, Mlume ABETCHA gwagana bino; Bamasenyu batuwile wa ino ihisho, bululi balubile uluba yulu yanyi. ²⁸ Bululi handihwile ubagingicha mnda giya sii, gyandiginune uboo wanyi na ubaha, mamomengo mabamonine loono lwa lulahu, na miti gyose gyine gyina byaanyi biingi, batangile lutangi lwabo ubo, naubo batangile uchigilicha uba lutangi lwabo; na ubo baitile malashi ma masoga, na ubo bahongolole lutangi lwabo lwa uunywa. ²⁹ Haho nibabudiche, Iyii hamana hage ihana yine iginunywe hene hamulihugya? Biino, china lyage iya ihana ii Bama ndaa na lino. ³⁰ Biino, ugisambile ndu gya Isilaeli,Mlume ABETCHA gwagana bino; Wi wii! Mwalibiya bunyenye wa ulama madila ma bamasenyu? Mulihugya uita masei wa ulama uchigilicha wabo? ³¹ Iyaka hamwitangila lutangi lwenyu, na ubachigya baana benyu waahya, wi wii! Muli hulibiya bunyenye yuluya tuwe lugulu twenyu ndaa na lino? Na nene wii! Nabuchiwe inywa nenyu, Gyenywe ndu gya Isilaeli? Nahinene byandi na mwego, Mlume ABETCHA gwagana, nishibuchiwa inywa nenyu. ³² Na bibyo byose byine bilihugingila mnda malanga menyu bishigiliya ata; uba mwadogoma, Beswe tubi lulingo lumwechi na mioga, nahi ginge milongo gya binge bibaloo, ugilila miti na mawe. ³³ Nahi nene byandi na mwego, Mlume ABETCHA gwagana, chigilwe wa uboo wa uoma, na wa uboo wa ugololwe, na wa uchigililwa wa ugeswe, nibi oolo hegulu henyu; ³⁴ nene nimmumya hawingi ha mioga, na umsumbicha, na ummongola mnda bibaloo byose byine byamusambalachiwe wa biili, wa uboo wa uoma nawa uboo wa ugololwe, na wa uchigililwa wine uhongololwe; ³⁵ nene nimgingicha mnda lwanaganywa lwa mioga, na ubo nigumana nenyu yenyi wa yenyi. ³⁶ Nahi byandigumene na bamasenyu mnda lwamaganywa lwa Misili, noo byandigumana nenyu, Mlume ABETCHA gwagana, ³⁷ Nene nimmisha hasi ha lubango, nene nimgingicha mnda ihambo ya malagano. ³⁸ Nene nimmahacha wa ummumya ubenga wenyu, nabaya bene bandubile; nibahunya mnda sii gyabalibashame gya bugenyi, ata bibyo bashigingila mnda sii gya Isilaeli; na benywe mwimana ugana nene noo MLUME. ³⁹ Na wa yulu ya mwano gwenyu, gyenywe ndu gya Isilaeli, Mlume ABETCHA gwagana bino, Giwe utugilila tuwe lugulu twenyu gegese gumwechi gwenyu; na mange mengo ma hanyuma, nambo ushihubenja upulicha; ata bibyo china lyanyi lya lihaha mushilibiya iyaka bunyenye, wa yulu ya lutangi lwenyu na wa tuwe lugulu twenyu. ⁴⁰ Bululi u loono lwanyi lwa luhaha, u loono lwa lulahu abisa lwa Isilaeli, Mlume ABETCHA gwagana, noo wabingilila ndu gyose gya Isilaeli, bose nabo mnda giya sii; na nene nimgitaicha uya, na uya nibenda lutangi lwenyu, na mitomwe gya lutangi lwa nyama chenyu, hamwechi na bitundu byenyu byose bya bihaha byose. ⁴¹ Nimmunda nahi chumba lya lisoga, handimmunya hawingi ha mioga, na umsumbicha uhuma mnda bibaloo byose byine byamusambalachiwe wa biili; nanene nihahachiwa wamli u meeso namioga. ⁴² Na benywe mwiimana ugananene noo MLUME, hene handimgingicha mnda sii gya Isilaeli, mnda sii giya gyandiginunine uboo wanyi ugana nibaha bamasenyu. ⁴³ Na uya mwiengelecha madila menyu, na bigilanywa byenyu byose, byamulibiile bunyenye wabili; benywe bene mwilionywa u meeso menyu benywe bene, yulu usona wenyu wine wamugilile. ⁴⁴ Benywe mwimana ugana nene noo MLUME, handibi hugila yulu ya china lyanyi, ushi nahi wa madila menyu mabii, ushi nahi wa bigilanywa byenyu biibi, Ee gyenywe ndu gya Isilaeli, Mlume ABETCHA gwagana. ⁴⁵ Iyaka inywa ya MLUME injwilile, ugana, ⁴⁶ Mwana gwa mtu, uhugulule yenyi yobe luubi lwa uboo wa ulume, wadogome inywa yobe luui lwa uboo wa ulume, wabuwe yulu ya isowa ya lele lya Negebu, ⁴⁷ waisambile isowa ya Negebu, Ihuliche inywa ya MLUME; Mlume ABETCHA gwgana bino; Loolo, nilamya aahya mnda mobe, nao ichigya kila mti gwa gubisi, na mti go gose gwa gugumu; lulindi lwa ao aahya ashichima, na byenyi byose uhuma luubi lwa uboo wa ulume ndaa na lubi lwa uboo wa uachi lwichiga naao aahya. ⁴⁸ Na batu bose bene bali na mibili bimona ugana nene noo MLUME, naalamya; ashichima. ⁴⁹ Haho niganine, Ee Mlume ABETCHA, boo basungana wii; Wi wii! Guno mtu ii mtu guta mihingu?