¹ Inywa ya MLUME injwilie iyaka. ² Wi wii! hamana hage na udogoma guno mmingu mnda Isilaeli, mulihugana, Shibana gulihuya zabibu cha chibisi, nabo baana balihumona bugigili u meeno? ³ Nahi nene byandi na mwego, Mlume ABETCHA gwagana, mushibi na ibalo ya uta guno mmingu mnda Isilaeli. ⁴ Loola, mitima gyose ii bibya byanyi; nahi bili mtima gwa shibana iyibya yanyi, noo bili mtima gwa waana iybya yanyi; mtima guya gwigila buubi noo gwiiwa. ⁵ Biino nambo mtu i gwa kiine, na ugila bya bisoga naa kiine; ⁶ gushilile hegulu ha loono, na gushituginunine meeso tuwe lugulu twa ndu gya Isilaeli, na gushim'biile bya bunyenye mmachi gwa m'binji nage, na gushimmyiile mmachana mengo mage ma baachana; ⁷ Na gushimsapile mtu byage, bibyo gumgiwidiche mine gummele mbwate ya maabo, na gushimsapile mtu bibya byage wa uoma, nage gubahele bene bali na ndala biliwa byage, na ubachwiya bichwalaganywa bene bali buchi; ⁸ Gushikopeshe mtu yulu gahewe alambwe, na gushiguhile byuhima wa ndila gyo gyose; nage gwahogononya uboo wage na usona, na ugile uonona hawingi ha mtu na minage; ⁹ iyaka, uba gwalama m'bindo gwanyi, na uwasha uonona wanyi; guno mtu guli na kiine; chigilwe gubi na mwego, Mlume ABETCHA gwagana, ¹⁰ Nambo gabebuta mwana gwa msapanyi, mgeshi gwa maashi, gusugila imwe ya bibyo bihisho; ¹¹ na gushimgile ihisho yo yose yine ilingye gee uigila, bibyo gusuya hegulu ha loono, na um'biya bunyenye mmachi gwa m'binji nage ¹² na umonena bambuchu na basabi, na ubasapa batu bibya byabo wa uoma, na gushigiwidiche mbwate ya maboo, nage gutuginunine tuwe lugulu meeso, na ugila bya uchigilicha, ¹³ nage gusukopesha batu yulu gahewe alambwe, na ugaa bya bibuchu; wi wii! Gubi na mwego yulu ya bibyo? Nangu, gushibi na mwego; gwagila bibyo bya byose byuchigilicha; wa chigilwe gwiiwa; maashi mage mabi hegulu hage gemine. ¹⁴ Na nambo gugo gabebuta mwaana, nage gabemona buubi bose bwa sage bweligilile, gumwene booba, gushigilile yo yose nahi iyo; ¹⁵ gushilile hegulu ha loono, na gushituginunine meeso tuwe lugulu twa Isilaeli, na gushim'biile mmachi gwa m'binji nage bunyenye, ¹⁶ na gushimonene mtu, na gushiguhile itu ya ubiya mbwate ya maboo, na gushimsapile mtu bibya byage wa uoma, ata bibyo gee noo gubahele bene bali na mdala biliwa byage, na ubawila bichwalaganywa bene bali buchi; ¹⁷ iyaka uba guchibile uboo wage gashimmonene mbuchu, na gushigaile alambwe a libaliba, nage guonone uonona wanyi, na uwasha m'bindo gwanyi; gugo gushiwa wa ibalo ya buubi bwa sage, chigilwe gubi na mwego. ¹⁸ Yulu ya mwano gwa sage, bululi gubamonene batu wa buhuchi bwiingi,na umsapa mshiwabo bitundu byage wa uoma; na ugila bishi bya bisoga hawingi ha batu bage, loola, gwiiwa yulu ya usona wage. ¹⁹ Haho benywe mulihugana, Yulu yai gugo mwaana gushiguhe usona wa sage? Gugo mwana heligila gya bisoga na kiine, na uwasha alago anyi na uagila, chigilwe gubi na mwego. ²⁰ Mtima gwigila buubi, noo gwiiwa; mwaana gushiswala usona wa sage, na ata shibana gushiswala usona wa mwanage, kiine gyage guya gwa kiine gibi hegulu hage, na usona wage guya gwa usona ubi hegulu hage. ²¹ Haho nambo mtu m'bii gabegaluwa, na uleya buubi bwage bose bweligilile, na uwasha alago anyi ose, chigilwe gubina mwego, gushiwa. ²² Buubi bwage bose bweligilile bushiengelechiwa iyaka hegulu hage ata bumwechi; bululi bwa kiine gyage geligilile gubi na mwego. ²³ Wi wii! Nenenilihuseelela lubu lwage mtu gwa m'bii? Mlume ABETCHA Gwagana; byisuba lingye gagaluwe, na uleya ndila gyage, gubi na mwego? ²⁴ haho huya gwa kiine gabegaluwa, na ugileya ndila gyage, na ugila bisone, na ugila byuchigilcha byose nahi biya bisugila mtu msone, wi wii! gubi na mwego? Mnda bigilanywa byage byose bya kiine byeligiile bishiengelechiwa ata imwechi yabyo. Mnda ulubauya welilubile, ehe, mnda buubi byage bweligilile, gwiiwa. ²⁵ Bibyo benywe muligana, Ndila gya Mlume gishi gisoga.Hulichiwe biino, Gyenywe ndu gya Isilaeli; Wi wii! Ndila gyanyi noo gishi bululi? Madila menyu noo mashi magolobu? ²⁶ Guya gwa kiine heligaluwa, na ugileya kiine gyage, na ugila bya bisonyu, gugo gwiiwa mnda usona wage; bululi bwa usona wage weligilile gwiiwa. ²⁷ Iyaka mtu m'bii heligaluwa, na uleya usona wage weligilile, na ugilabya bigolobu na kiine, gwihonya mtima gwage, nago gubi na mwego. ²⁸ Bululi gwalanga, na ugaluwa, na uleya uluba wage ose wine weligilile, chigilwe gubi na mwego gushiwa. ²⁹ Ata bibyo ndu gya Isilaeli gilihugana, Ndilagya Mlume gishi gigolobu. Ee ndu gya Isilaeli, wi wii! Madila manyi mashi noo mali magolobu? Madila menyu ati noo mashi magolobu? ³⁰ Biino, nimmonona benywe, ndu gya Isilaeli, gegese ulamana na madila mage, Mlume ABETCHA gwagana. Giwilwe, galuwe, na ubuleya bulubi bwenyu bose; bino hao usona wenyu ushibi udoga wenyu. ³¹ Telwe koo nenyu uluba wenyu ose wamulubile; lilongechiwe malanga mahya na mitima gihya; yulu yai mulihuunda uuwa, gyenywe ndu gya Isilaeli? ³² Bululi nene nishibaseelela uuwa wage mmu, Mlume ABETCHA; biino galuwe, mwabe na mwego.