¹ Inywaya MLUME injwilile, ugana, ² Mwana gwa mtu, ute ida, wabasambile ndu gya Isilaeli mihingu; ³ ugane, Mlume ABETCHA gwagana bino; Loochi lwa lwata, lwinelwina bihwahwa bwaata na membo alafu u bihwahwa, lwine luli na maso meengi, ma mioga giingi gya langi, luhiile Lebanoni, luguhile songo gya mti gwa mwelezi. ⁴ lugedile mtabi gwine gulihegulu ha matabi mago, liguguhile ndaa na sii gya udagulanya, ligubiile mnda mbuga gya budagulanya. ⁵ Luguhile iyaka biguma bimwe biguma bya gigyo sii, lubyunine u bitete bya binagu abisa, lubibiile mibamba mwa maadi meengi; lubiunine nahi mti gwagutosu haoka na luudi. ⁶ gulahile, goo nuba mzabibu gudagalala abisa, na ichuli ishihu, gwine matabi mage maligobile, na michinga gyage gibele hasi hago; haho goo nuba mzabibu, gumenine matabi, nuutipuka nuutota baana mibamba. ⁷ Habele na lunge loochi lwa lwaata, lwina bihwahwa byata na maso meengi; na loola, mzabibu gugo gugobame michinga gyago uloola uli luya loochi, gutochiche baana bage uloola uli loochi, uhumina u matuta mago maguuninywe; yulu gee gaoshe ugunywisha. ⁸ Gubele guunywe u bitete bisoga, mibamba mwa maadi ma meengi, gwaoshe umena matabi, na uuha biguma, gube mzabibu gusoga. ⁹ Haho, gogwe ubedogoma, Mlume ABETCHA gwagana bino; Wi wii! Gugo gubi na biingi? Gee gushichula michinga gyago na ugeda biguma byage, yulu gugume? Bululi nyaanyi byago byose bya bibisi byine bili hutota bigume, na gushibina uoma wingi, ata batu beengi buguchula na michinga gyago? ¹⁰ Ehe, loola, inangwa unaonywa, wi wii! Wihaama? Ushiguma abisa, mnaga gwa mlugulu hagwiguhula? Ehe, gwiguma hegulu ha matuta maguuninywe. ¹¹ Iyaka inywa ya MLUME injwilile, ugana, ¹² Ubasambile bino ndu gibengile, Mushigidi yulu ya bino bihisho? Basambile, Loola, oolo lya Babeli lihiile Yelusalemu, luguhile oolo lya Yelusalemu, na batugabe gubaguhile hamwechi nage ndaa na sii gya Babeli, ¹³ guaguhile bamwe ba ibushi ya umaoolo; hanyuma guitile malagano nage, gumlahiche; gubahuminye batu ba giye sii benebali nauoma; ¹⁴ bululi buoolo bubo bube bugongohobu gushiginyuwe, biino ugimane wa uwasha malagano mage. ¹⁵ Ata bibyo gubengile wa uhila bahanyi ba mwano uya Misili, bamme falasi na basolokoto beengi. Wi wii! Gwihaama? Gulihugila bibyo bihisho gwihogononywa? Gwibela malagano, hanyuma gwihogononywa? Nahi nene byandi na mwego, Mlume ABETCHA gwagana, chigilweihana iya yeli mshame oolo limmyaninye, mine gunenunine ulaha wage, na ubele malagano mage, bibyo gwiwa hamwechi nage m'bwingi mwa Babeli. ¹⁷ Na ata Falao na basilikoto bage beengi, na ihichi yage ya batu beengi, bashiita itu ubita, habigimiya migumbo, na ugubaa businino, yulu ya uchinga batu beengi. ¹⁸ Bululi gwaunenuna ulaha wa ubela malagano; na loola, gwabiya uboo wage, na hamwechi na bibyo gwagila bihisho bibyo byose; gushihogononywa. ¹⁹ Biino Mlume ABETCHA gwagana bino; Nahi nene byandi na mwego, chigilwe wa ulaha wanyi welinenunine, na malagano manyi melibelile, nibigiwidicha mswe mwage. ²⁰ Nene niganda bwila bwanyi hegulu hage, nage gwiwaswa mnda gochi lyanyi, nene nimmila ndaa na Babeli; nene nigumana nage uya yulu ya usona wage welindubile. ²¹ Na basinyi bage bose ba bilume pambwa byage byose bihagwa wa ahilu, na baya bene bishigala bimwagiya ngubi chose cha ibaloo; na benywe mwimana guana nene noo MLUME, gwagana bibyo. ²² Mlume ABETCHA gwanaga bino; Nene na nene niguha songo gya gilahu gya mti gwa mwelezi, na umitabi gyage gyine gili hegulu niguha himtabi himwechi hyine hili higolobu, nene nihyuna u loono lwa lulahu lwa luginyubu abisa. ²³ hegulu ha loono ha ihana yiginyubu ya Isilaeli nihyiuna; nahyo hyimena matabi, na uhaa biguma, nago gubi mwelezi gusoga; na hasi hago; na hasi ha matabi tunonyi twa mioga gyose gya bihwahwa; hasi ha ichuli-chuli yago twishama. ²⁴ Na miti gyose gya mmabala gyimana ugana nene, MLUME. nagusacha hasi mti gulahu, na uguginuna mti gwa gushihu, na ugugumya mti gwa gubisi, na ugugimiya mti gwa gugumu; nene MLUME, nagana, nene nagila ino ihisho.