¹ Inywa ya MLUME injwilile iyaka, ugana, ² Mwana gwa mtu, usambile Yelusalemu uchigilicha wage. ³ ugane, Mlume ABETCHA gwasambia Yelusalemu bino; Abutulilwa obe na ubuswa obe wahuma mnda sii gya Mkanaani; Mmamoli gubele sobe, na mnobe gubele Mmiti. ⁴ Na yulu ya mwano gwa ubuswa obe, luya lusugu lolibushilwe, msugobe gushigechilwe, na ushigogilwe na maadi uhahachiwe; ushibiilwe miinyu ata gucho, na ushibiilwe ata mnda isanjwa. ⁵ Hashi liiso lyine lyumonene keene, yulu ya uugilila ihisho yoyose iyo yulu ya uumonena keene; ata bibyo utelilwe hambuga wilagala, bululi ichuli-chuli yobe ya mwego ioninywe, lusugu luya lolibushilwe. ⁶ Nene handihitile hoka nobe, niumonine ulihulibilingisha mmaashi mobe, niusambile, Inangwa uli mmaashi mobe, ube na mwego, ehe, niusambile inangwa uli mnda maashi mobe ube na mwego. ⁷ Niuitile ube mauki-uki, nahi byunaganywa bya mmabala, ubulile na ugililila uba mmata, ubele hungwe abisa; mabele mobe mameninywe, njuli chobe chimenine; ata bibyo ubele buchi, ushi na ichwalaganywa. ⁸ Biino, handihishile hoka nobe, niulingamine; loola, mengo mobe mabele mengo ma luundo; niganjile alili anyi hegulu hobe, niuwilile buchi bobe; ehe, niulahile, nibiile malagano nobe. Mlume ABETCHA gwagana ube gwanyi. ⁹ Hanyuma niugogile na maadi; ehe, niusuwile abisa maashi mobe, niushinyinye mauta. ¹⁰ niuchwiche isanjwa ya talaza, niuhele mikalabanda gya ibambi ya konda, niuhambile isanjwa ya alili a asoga myaali yobe, niuwilile na alili. ¹¹ Niutogole wa utogolwa nao, niubiile lusuu u maboo mobe; na mkufu mioshi mobe. ¹² Niutogole na uubiya ihindi ya nolo u mmyembe gobe, ma matimbi u matu mobe, na sala lya lidoga u mswe gobe. ¹³ Bibyo utogolwe na nolo na lufeza; na bichwalaganywa byobe bibele bya mnazi gosoga, na alili, na mgilo gwa malenda; ulile busu bwa sinkini, na bui, na mauta; na gogwe ubele hungwe uhina abisa, ubele na bibya na uhyila nahi oolo. ¹⁴ Punda chobe chidagelele hawingi ha mioga wa yulu ya buhungwe bobe; bululi ubele m'bwilile, yulu ya ugengeda wanyi wandiubiile, Mlume ABETCHA gwagana. ¹⁵ Ata bibyo uudagile buhungwe bobe, ugilile bihisho bya lusengu yulu yapunda chobe, ugeshile bihisho byobe bya lusengu uli mtu gegese mine guhitile oli; ubele gwage. ¹⁶ Uguhile bimwe bichwalaganywa byobe, uliitile ihana ya iginyubu, hatogolwe wa mioga giingi gya langi, ugilile bihisho bya lusengu hegulu habyo; bihisho nahi bibyo bishichwa na bishibi ho. ¹⁷ Iyaka uguhile biyundu byobe bya bibenju, bya nolo chanyi na bya lufeza lwanyi, byandiuhele, ulilongeche miishi gya gilumyana, ugilile bihisho bya lusengu hamwechi nagyo. ¹⁸ uguhile bichwalaganywa byobe bya malenda, ugiwilile, ugishinyinye mauta manyi na buswenge bwanyi u mbele wagyo. ¹⁹ Mkati gwanyi gwandiuhele, busu bwa sinkini, na mauta, na bui, byandiulishiche, ubibiile umbela wagyo bibe bushio bwa ubenjiwa; na noo byabibele; Mlume ABETCHA gwagana. ²⁰ Hamwechi nabibyo uguhile baana bobe na misiha gyobe, bene bolibushile, ubatambikile lutangi wagili yulu baliwe. Wi wii! Bihishi bibyo bya lusengu iyitu icho ka, ²¹ ata bibyo ubahagile baana banyi, na ubahaga wa ubahisha waahya u gigyo miishi? ²² Na mnda uchigilicha obe ose, na bihisho byobe bya lusengu, ushiengeleche masugu mobe ma buwamsiha bobe, holibele buchi, ushi na ichwalaganywa, holibele hulibilingisha mnda maashi mobe. ²³ Iyaka, bibi hanyuma ha usona obe ose, ( luhanga luubi lobe! luhanga luubi obe! Mlume ABETCHA Gwagana,) ²⁴ Ulilongecha ihanaya iginyubu, uliitileihana ya iginyubu ha masango nandila. ²⁵ Walilongecha ihana ya iginyubu ha mswe gwa kila ndila, uitile buhungwe bobe uba wa uchigilicha, utanunine magulu mobe uli bahati madila bose bene bahitile hoka nobe, ulibiye bihisho byobe bya lusengu. ²⁶ Iyaka uitile masei na Bamisili, m'binji nobe, maata ba m'bili; ugililile na bihisho byobe bya lusengu, yulu ya unjigilicha. ²⁷ Biino, loola, wa yulu ya bibyo nagolola uboo wanyi hegulu hobe,na nene nahungula iliwa yobe, na uuhunya mnda luundo lwabo bene bali huuonywa, misiha gya Bafilisti, bene baminine bibyo bihisho byobe bya masei. ²⁸ Iyaka wagile bihisho bya lusengu hmwechi na Baashuli, bululi hamo lyobe lishibele huhwa; ehe, wagila ihisho ya lusengu hamwechi nabo, na ushinagyuta. ²⁹ hamwechi na bibyo walibiya bihisho bya lusengu mnda sii gya Kanaani, ndaa na Ubakaldayo, ata bibyo ushihugyuta nabyo. ³⁰ Nahi biya bibele mtima goge gulema, Mlume ABETCHA gwagana; uba wagila bihisho bibyo byose, wa mgilo gwa mmachana gwa lusegu. ³¹ mine gulihubenja uhyilila batu; bululi waligubaila ha ihana ya yaata ha mswe gwa kila ndila, na uita ihana yobeya iginyubu u masango na ndila; ushibele nahi sengu, bululi unenune ugaa alambwe. ³² Mmachi gwa mtu, gwiita masei, Gulihugaa bagenyi hanyuma ha mlumyage! ³³ batu basubaha ba sengu bose mmaso,biino, gogwe ulihubaasa maunjwa bobe bose mmaso, na ubageda milomo yulu bachwe oli ngubi chose, wa yulu ya bihisho byobe bya lusengu. ³⁴ Iyaka, mnda bihisho byobe bya lusengu, gogwe na bange baachana muli halahala, bululihashi mine gulihuulama mnda bihisho byobebya lusengu; iyaka, ulihuhana alambwe na ushihuhewa alambwe; bino, ndila gyobe na madila mabo nali halahala. ³⁵ bululi bwa bibyo, Gogwe sengu, ihuliche ino inywa ya MLUME. ³⁶ Mlume ABETCHA gwagana bino; Bululi itima ibi yobe ya ubaachana yageswa hasi, na buchi bobe bwaununywa, na ndila gya masei mobe hawechi na baunjwa bobe; nayulu ya tuwe lugulu tobe twa uchigilicha ubo; na wa ibalo ya maashi ma baana bobe, molibahele. ³⁷ bino, loola, nibasumbicha baunjwa bobe bose bene bususeelela hamwechi nabo, nabo bose bene bolibendiche, hamwechi na batu bose bene boliunywine; ehe, nibaongola hegulu hobe ngubi chose, na ubaununila buchi bobe, baoshe ubumona buchi bobe bose. ³⁸ Nene niuonona, nahi bisuononywa baya bene bagondilwe balihuita masei, na ugesa maashi, nene niuhamba na maashi ma uchigiliwa wanyi na buwa. ³⁹ Iyaka niubiya mnda maboo mabo,nabo bihagwisha ha ihana yobe ya yaata,na uibele ihana yobe ya iginyubu, nabo biuchula bichwalaganywa byobe, na uguha bitundu byobe bya buhungwe, nabo biushiga buchi, ushi na yuchwala. ⁴⁰ Iyaka bichwisha sumbilo lya batu oli, nabo biuta mawe, na uusosa tuhilu twabo. ⁴¹ Nabo bichigya madu mobe na aahya, na uwilicha uonona yulu yobe u mbele wa baachana beengi, nene niubindila uleya ihisho ya lusengu, na ushihana alambwe iyaka. ⁴² Bibyo noo byandigyusha uchigililwa wanyi yulu yobe, nabuwa bwanyi bwipuma, nene nilibengeseya na nene nishimona iyaka sungu. ⁴³ Wa bululiushyengeleche masugu mobe ma buwamsiha bobe, haho, wanjigilicha wa bihisho bibyo byose; bino, loola, nene nilusha ndila gyobe hegulu ha mswe gobe, Mlume ABETCHA gwagana; na ushigila iyala masei uhima uchigilicha obe ose. ⁴⁴ Loola, mtu gegese mine gwiita mihingu gwiita mihingu inyume yobe, gwigana, Nahi bili mna baana, noo bili msiha gwage. ⁴⁵ Gogwe uli msiha gwa mnobe, guli hummonywa mlumyage na baana bage; na gogwe uli kacha gya bachobe, bene baonywine balume babo na baana babo; mnobe gubele Mmiti, na sobe gubele Mmamoli. ⁴⁶ Na kachobe gwa mmosobu ii Samalia, gulimshame ubooobe wa uachi, gee na misiha gyage; na kachage wa mnuna batu, guli mshame uboo wage wa ulume, noo Sodoma na misiha gyage. ⁴⁷ Ata bibyo ushigile mnda madila mabo, na ushigilia ulamana na uchigilicha wabo; ata bibyo iyugana iyo iyihisho icho abisa, ubele mdogu abisa mnda madila mobe mose. ⁴⁸ Nahi nene byandi na mwego, Mlume ABETCHA gwagana; Sodoma, kachobe, gee na misiha gyage, bashigilile nahi byoligilile gogwe, gogwe na misiha gyobe. ⁴⁹ Loola, usona wa kachobe, Sodoma, ubele uno; anene, na ugyuta iliwa, na uba na bitundu, bibyo bibele mnda mwage na misiha gyage; iyaka, gushibiile uoma maboo ma bambuchu na masabi. ⁵⁰ Nabo balinunine, bagilile byuchigilicha u mbele wanyi; wa yulu ya bibyo nibahuminye haho handibimonine. ⁵¹ Samalia nage gushigilile ibaa ya buubi bobe; biino gogwe walibiya uchigilicha obe ubahima boo, gogwe wabaha kiine misiha gyobe wa uchigilicha obe ose uligilile. ⁵² Na gogwe uguhe abule obe gogwe mine, bululi walusha uonona hegulu ha bakachobe gyobe; wa buubi bobe boligilile, chichigiliche uhima chabo, boo bina kiine uuhima gogwe; ehe, udambe mme na gogwe, waguhe abule obe, bululi wabaha bakachobe kiine. ⁵³ Nenenigiwicha batu babo bene bahambilwe; bahambwa ba Sodoma na misiha gyage na bahambwa bobe bene bahambilwe hawingi habo; ⁵⁴ waguhe abule obe gogwe mine, na umona abule, yulu ya bigilanywa byose byoligilile, bului ubele mmungyo wabali. ⁵⁵ Na bakachobe, Sodoma na misiha gyage, bigiwilila mishaminyi byabo gya gitangi, na Samalia na misiha gyage bigiwilila mishaminyi byabo gya gitangi, na gogwe na misiha gyobe mwigiwilila mishaminyi byenyu gya gitangi. ⁵⁶ Bululi kachobe Sodoma, gushilumbulwe mnda anywa obe ha masugu ma anene obe; ⁵⁷ hambele usona obe ushi naununywa, nahi mengo maya habautuwile ba misiha gya Shamu,na baya bose bene bamchunguluwe, misiha gya Bafilisti gyine gili huunenuna ngubi chose. ⁵⁸ Wamonya masei mobe, na uchigilicha obe, MLUME gwagana. ⁵⁹ Bululi Mlume ABETCHA gwagana bino; Niugilabyoka biya byoligilile, byolinenunine ulaha wa ubele malagano. ⁶⁰ Ata bibyo niengelecha malanago manyi mandiitile hamwechi nobe, haya ha masugu ma buwamsiha bobe, nene nigimiya malindi malagano ma milumbu hamwechi nobe. ⁶¹ Haho noo holiengelecha madila mobe, na umona abule, haho holibagaa bakachobe, baya beli baulu bobe na banuna bobe; nene niuha babo babe misiha gyobe, ilaushi wa malagano mobe. ⁶² Nene nibiya malindi malagano manyi na gogwe; hahogogwe wimanaugana nene noo MLUME; ⁶³ waushe uengelecha, na udamba mme, ushigadula anywa obe iyaka, bululi bwa abule obe; haho hene handiuleelela byose byoligilile, Mlume ABETCHA gwagana.