¹ Iyaka mtima gunginune, gupyiiche ndaa na luubi lwa mchango gwa mlugulu gwa ndu gya MLUME, gubele hulola luubi lwa mlugulu; na loola, ihana ya bugingililo bwa mchango habele batu maumi mopi na batano; na hawingi baho nommonone Yaazania, mwaana gwa Azuli, na Palatia, mwaana gwa Benaya, nabo noo baosobu ba batu. ² Gusambile, Mtu, bano noo batu bene balihutula usona, na uhana mihungo gibii mnda gino mbuga. ³ balihugana, Mengo ma ugubaa ndu mashi hoka; gino mbuga ii lweso na beswe tuli nyama. ⁴ Bino ubuwe yulu yabo, Gogwe mwana mtu, ubuwe. ⁵ Mtima wa MLUME gungwilie, nago gusambile, Dogoma, MLUME gwagana bino; Mwadogoma bino binywa, Gyenywe ndu gya Isilaeli; bululi nene nigidi byine bilihugingila mnda mitima gyenyu. ⁶ Mwabucha batu benyu bene bawile mnda mbuga gyenyu, na benywe mwagilucha masango na ndilamage bene bawile. ⁷ Biino Mlume ABETCHA gwabana bino; Batu benyu bene bahagilwe, bamwalacha mnda mbuga, babo noo nyama chicho, na gino mbuga noo lweso; na benywe mwitobolwa hambuga na mbuga. ⁸ Benywe mulihumona booba ahilu; nene nihyicha ahilu wamli, Mlume ABETCHA gwagana. ⁹ Nene nimtibola hambuga hagyo, na um'biya mnda maboo mabagenyi, nene niita uonona hawingi henyu. ¹⁰ Mwiigwa wa ahilu; nimmonona u lugumba lwa Isilaeli; na benywe mwimana na ugana nene noo MLUME. ¹¹ Gino mbuga gishibi lweso lwenyu, na benywe mushibi nyamamnda mwalo; nimmonona u lugumba lwa Isilaeli; ¹² benywe mwiimana ugana nene noo MLUME; yulu mushihubenja ugyata mnda m'bindo gwanyi, na mushihuwasha uonona wanyi, bululi muliugila bihisho nahi uonona wa mioga gyine gili gimchungulubu. ¹³ Haya, handibuwile, Pelatia, mwaanagwa Benaya, gee nuuwa. Haho nigwile mmachwi, nililile wa liidi lyata, niganine, Ee Mlume ABETCHA, wi wii! wibasungya abisa mihona gya Isilaeli? ¹⁴ Inywa ya MLUME injilile, ugana, ¹⁵ Mwana gwa mtu, bashiwenyu, ehe, bashiwenyu, batu ba mlongo gobe, na ndu gyose gya Isilaeli. nabo bose, noo babo bashami ba Yelusalemu bamsambile, Libagulwe koo na MLUME, gino sii twahewa beswe, gibe bushamo bwetu. ¹⁶ biino dogome, Mlume ABETCHA gwaganabino; Uba nene nababulula, bashame hawingi na mioga ginge, na uba nene nabasala mnda bibaloo bibyo na biya hamwechi na bibyo nibi ha haha wabali wa mengo macho, na mnda biya bibaloo byine byabahyiile. ¹⁷ Biino dogoma, Mlume ABETCHA gwagana bino; Nimsimbicha benywe uhuma mnda mioga gyose gya batu, na umsambanya uhuma biya bibaloo byamusalilwe wa bili, nene nimma sii gya Isilaeli. ¹⁸ Nabo bihiya uya, nabo bihumya bitu byage byose byuchigilicha, na uchigilicha wage ose. ¹⁹ Nenenibaha mtima gumwechi, nene nibiya mtima gwa guhya mnda mwabo; nene nihumya mtima gwa iliwe mnda mibili gyabo, nene nibaha mtima gwa nyama. ²⁰ bululi bagyate mnda alago anyi, na uwasha malagano manyi, na umagila; nabo babi batu banyi, na nene nibi Abetcha abo. ²¹ Nambo boo baya bene bigya wa ulama mitima gya bitu byabo byuchigilicha, na uchigilicha wabo, nichwisha mdila mabo machwe hegulu ha miswe gyabo, Mlume ABETCHA gwagana. ²² Haho maya makelubi maginune bihwa-hwa byabo, nabyo bichigi bibele hoka namo, nao ugengeda wa Abetcha a Isilaeli ubelehegulu hamo. ²³ Ugengeda wa MLUME uselile uhuma hawingi ha mbuga, ugimene hegulu ha loono luubi lwa mlugulu mwa mbuga. ²⁴ Na gugo mtima gunginune, gunguhile u malo ma mtima, wa uoma wa mtima gwa Abetcha, ndaa na u Bakaldayo, u baya batu ba ubululwa. Haho maya malo mandimonine mo nuundecha. ²⁵ Haho noo handisambilebatu ba ubululwa mwano gwa bihisho byose byelimoninye MLUME.