¹ Inywa ya MLUME injwilile iyaka, ugana, ² Mwana gwa mtu, gogwe ulimshame hawinti ha madu mamabenge, batu bene bali na meeso maumona, na bashi humona, bali na matu ma uhulicha na bashi huhulicha; bululi imndu gibengile. ³ Biino, mwana gwa mtu, hamba abilo bitundu bya ubululwa, wabuluwe mengo ma mchuba u mbele wa meeso mabo; gogwe wibuluwa uhuma ha ino ihana yobe ndaa na inge ihana u mbele wa meeso mabo; hange bimana, inangwa imndu gya ubenga. ⁴ Gogwe wihunya bitundu byobe, mengo ma mchuba, u mbele wa meeso mabo, nahi ugana ii bitundu bya ubululwa; nagogwe mine wihuma, mengo ma igolo, u mbele wa meeso mabo, nahi batu byabasuhuma uya wababululwa. ⁵ Chibula wibambacha u meeso mabo, waguhe bitundu na ubihishicha haya. ⁶ U mbele wa meeso mabo waliswiye ha ombe lyobe, na ubiguha hambuga mengo ma mdoo; wiwiila yenyi yobe, na ushimone bitete; bululi nuubiya ube bisaga u ndu gya Isilaeli. ⁷ Bibyo nene nigilile byoka biya nahi byandisambilwe; nihuminye bitundu byanyi mengo ma mchuba nahi biya i bitundu bya ubuluwa, na mengo maigolo nichibule imambacha na uboo wanyi; nibitobole ha mdoo, nibiswalile haombe, u mbelewa meeso mabo. ⁸ Lwelo inywa ya MLUME injwiile,ugana, ⁹ Mwana gwa mtu, ndu gya Isilaeli, wi wii! Ndu giyagibengile, bashi usambile, Ulihugila ii gogwe? ¹⁰ Basambile, Mlume ABETCHA gwagana bino; Uununywa uno ulihulola mmata gwa Yelusalemu, na ndu gyose gya Isilaeli bene bali hawingi habo. ¹¹ Ugane, Nene nili bisaga wamli; nahi nene byandigilile, boo nabo bigilwa byoka biya; bibululwa, bigya uhambwa. ¹² Nage mmata mine guluhawingi habo gwiswala ha ombe mnda mdoo; nage gwihuma na ugya lwage; bichibula hundu wibambacha, babihunye bitundu byabo hambuga; gwiwila yenyi yage, bululi gushimona bitete wa meeso mage. ¹³ Iyaka bwila bwanyi nibuganda hegulu hage, nage gwiwaswa na gochi lyanyi; nene nimmila Babeli, ndaa na sii gya Bakaldayo; ata bibyo gushigimona, inangwa gwiiwa ubo. ¹⁴ Nene nibasala ngubi chose bose benebali bamchunguluwe yulu ba m'bwatiliche, na bilume pambwa byage byose; nene nihulula ahilu u nyuma wabo. ¹⁵ Nabo bimanaugana nene noo MLUME; hene handi basala hawingi ha mioga, naubatele-tele mnda sii gyose. ¹⁶ Ata bibyo nibashiga batu bacho hawingi habo na ubahogonona na ahilu, na ndla, na bisumi bululi baalisambe mwano gwa uchigilicha wabo ose, hawingi ha mioga uya wine wabigya; nabi bimana ugana nene noo MLUME. ¹⁷ Iyaka inywa ya MLUME injwilile ugana, ¹⁸ Mwana gwa mtu, uye ililwa yobe wa ludando, unywe maadi mobe wa udanda na wa umabisa abisa; ¹⁹ ubasambile batu ba gino sii, Mlume ABETCHA gwagana bino, yulu ya mwano gwa bene bali bashame Yelusalemu,na mnda sii gya Isilaeli; Biiya iliwa yabo wa uibisa abisa, na binywa maadi mabo wa ugagicha, na sii gyose gibi mauwa, wa uhulwa bibya yose byugigilucha, wa yulu ya busapanyi bwa batu bose bene bali bashame mo. ²⁰ Na mabuga mose mene malimo batu mabi bibunduguchu, nagyo sii gibi mauwa; na benywe mwimana ugana nene noo MLUME. ²¹ Inywa ya MLUME injwilile,ugana, ²² Mwana gwa mtu, mihingu nai gino gyamuli nagyo mnda sii gya Isilaeli, musugana, Masugu mamo mahusinga na malo ma mtima mashihuwilila. ²³ Biino, ubasambile, Mlume ABETCHA gwagana bino; Nisungya gigyo mihingu, bashigite iyaka nahi mihingu mnda Isilaeli; biinoubasambile Masugu mamo masili hoka, na uwilila wa malo ma mtima mose. ²⁴ Bululi hashibi iyaka maloma mtima momose ma bunene, na ubuwa wa ulibenja, mnda ndugya Isilaeli. ²⁵ Bululi nene noo MLUME; nene noo nidogoma, na inywa iya yandidigima yiwilila; na ishisingiwa iyaka; yulu mnda masugu menyu, Gyenywe ndu gya lubengo, niidogoma iyo inywa na uiwilicha, Mlume ABETCHA gwagana. ²⁶ Inywa ya MLUME injwilile iyaka, ugana, ²⁷ Mwana gwa mtu, loola, babo ba ndu gya Isilaeli basugana, Malo ma mtima mesumona ii ma masugu meengi mene michwa, nage gwabuwa mwano gwa mengo menemali koo abisa. ²⁸ Biino ubasambile, Mlume ABETCHA gwagana bino; Binywa nyanyi bishisinga iyaka ata imwechi, biino inywa yandidogoma yiwilila, Mlume ABETCHA gwagana.