¹ MLUME gumsambile Musa, Bino wimona byandimgila Falao; bululi yulu ya uboo wa uoma gwibaha luhusa baligile lwabo, na wa uboo wa uoma gwimchinga mndasii gyage. ² Hanyuma Abetcha gudogomine na Musa, gumsambile, Nene noo YEHOVA; ³ nene nimtobwele Iblahimu, na Isaka, na Yakobo, nahi Abetcha Dambe, bibyo wa china lyanyi lyine YEHOVA nishimanyiye wabali. ⁴ Iyaka namabiya hululu malagano manyi nabo, ma ubaha sii gya Kanaani; sii gya ushama wabo nahi mginyi. ⁵ Wa uhima bibyo, nahulicha ugaba wabo baana ba Isilaeli, wine Bamisili bali hubagicha, na nene naengelecha malagano manyi. ⁶ Biino, ubasambile baana ba Isilaeli, Nene noo Yehova , nene nimmumya hasi ha michigo gya Bamisili, nene nimmumya mnda bucha bwabo, nene nimmogonona wa uboo wa ugolobu, na wa uonona waata. ⁷ nene nimguha m'be batu banyi, nibi Abetcha wenyu; na benywe mwimana ugana nene noo YEHOVA, Abetcha enyu, gummunya muhume hasi ha michigo gya Bamisili. ⁸ Nene nimmila ndaa na giya sii gyine gyandigolwele uboo wanyi, nabahe, Iblahimu, na Isaka, na Yakobo; nabahe gibe buhyana bwenyu; Nene nili YEHOVA. ⁹ Musa gusambie baana ba Isilaeli bibyo binywa; ata bibyo bashimmuliche Musa wa yulu ya usuma wa mitima, na wa yulu ya bucha bugumu abisa. ¹⁰ Mlume gudogomine na Musa, gumsambile, ¹¹ Gingila mnda, udogome na Falao, oolo lya Misili, bululi gabahe luhusa baana ba Isilaeli bahume mnda sii gyage. ¹² Musa gudogomine u meeso ma MLUME, guganine, Loola, babo baana ba Isilaeli bshipulidiche nene; bibyo gugo Falao gwipulicha nene wii, nene nili na milomo gishi gyagigibe kumbi? ¹³ MLUE gumsambile Musa na Haluni, gubasambile bagye uli baaba ba Isilaeli, na Falao, oolo lya Misili, yulu gabahunye babo baana ba Isilaeli mnda sii gya Misili. ¹⁴ Bano noo miswe gya madu ma bamasabo; baana ba Leubeni, bubele bwa Isilaeli; noo Hinoki, na Palu, na Hesloni, na Kalmi, babo noo ibishi ya Leubeni. ¹⁵ Na baana ba Shimo; noo Yemueli, na Yamini, na Ohadi, na Yakini, na Sohali, na Shauli mwaana gwa mmachana gwa uya Kanaani; baba noo ibushi ya Shimo. ¹⁶ Na mano noo machina na baana ba Lawi, ulamana na bibushi byabo; Gelshoni, na Kohathi, na Melali, na myaa gya mwego gwa Lawi gibele myaa sambina maumi matatu na njwii. ¹⁷ Baana ba Gelshoni; noo Libni, na Shimei, ulamana na bibushi byabo. ¹⁸ Na baana ba Kohathi; noo Amlamu, na Ishali, na Hebloni, na Uzieli; na myaa gya gugo Kohathi bibele ii myaa sambi na maumi matatu na gitatu. ¹⁹ Na baana ba Melali; noo Mali, na Mushi, Bino noo bibushi bya Lawi ulamana na ubuswa wabo. ²⁰ Gugo Amlamu gugondile Yokebedi mnage kachi; nage gubitile Haluni, na Musa; na myaa gya mwego gwa Amlamu gibele myaa sambi na maumi matatu na njwii. ²¹ Na baana ba Ishali; noo Kola, na Nefegi, na Zikli. ²² Na baana ba Uzieli; noo Mishaeli, na Elisafani, na Sithli. ²³ Haluni gogondile Elisheba, msiha gwa Aminadabu, kachage Nashoni; nage gum'butile Nadabu, na Abihu, na Eleazali, na Ithamali. ²⁴ Na baana ba Kola; noo Asili, na Elkana, na Abiasafu; bibyo noo milongo gya babo Bakola. ²⁵ Na Eleazali mwaana gwa Haluni gugondile gumwe gwa misiha gya Putieli; nage gum'butile Finehasi. Bano noo miswe gya madu ma bashibana uulu ba Balawi ulamana na ibushi yabo. ²⁶ Bano noo Haluni gee guya, na Musa gee guya, MLUME byelisambile, guganine, Bahunyiwe baana ba Isilaeli bahume mnda sii gya Misili ulamana na bilime pambwa byabo. ²⁷ Noo naya bene babele hudogoma na Falao oolo lya Misiliyulu babahumye baana ba Isilaeli bahume Misili; babo ii Musa gg guya, na Haluni gee guya. ²⁸ Lubele luya lusugu MLUME helidigomine na Musa mnda sii gya Misili, ²⁹ MLUME gumsambile musa, guganine, Nene nili MLUME; msambile Falao oolo lya Misili binywa byose byandiusambile. ³⁰ Musa guganine u mbele wa meeso ma MLUME, Nene nili mtu mine gwina milomo gishigile kumbi, Falao gwupulicha wii?