¹ Na hanyuma ha haho, Musa na Haluni bagile umsambila Falao, baganine, MLUME, Abetcha a Isilaeli, gwagana bino, Ubahe batu banyi luhusa bagye, yulu ya ungitila lusugu lwa saso mlwanaganywa. ² Falao, guganine, MLUME noo nanyi, na nahuliche liidi lyage, na nabahe Baisilae luhusa bagye lwabo? Nene nishimgidi MLUME, na nishibaha Baisilaeli luhusa bagye lwabo. ³ Baganine, Abetcha a Baeblania asambene netu; tulihuusaba, tuhe luhusa tugye lwendo lwa masugu matatu mlwanaganywa, tumtangile lutangi MLUME, Abetcha etu; gashichwe utuhula wa bisumi, na wa ahilu. ⁴ Oolo lya Bamisili gubasambile Benywe Musa na Haluni, yulu yai mwabalecha batu migilo gyabo? Ligilwe lwenyu u michigo gyenyu. ⁵ Hanyuma Falao guganine, Loolwe, batu ba gino sii bali beengi, na benywe mulihubaganina balituche, bashiswale michigo gyabo. ⁶ Na loka luya lusugu Falao gubasambile bagimenyi ba batu, na buulola madu umi babo, guganine, ⁷ Mushibahe iyaka byanyi bya uchelela mabiliki, nahi byamugulile utula haya haala; babe hugya uenga boo bene byaanyi. ⁸ Na lubalo lwa biliki byababele huhula balewe byabe byoka biya, mushihungule ata imwechi, bululi mtulema tuto; yulu ya biyo balihuita mdodo, balihugana, Tuhe luhusa tugye umtangila Abetcha etu lutangi. ⁹ Bahewe babo batu migilo gya gigumu abisa, gibasusule; bululi bashiloole binywa bya lulimi. ¹⁰ Babo bagimaninyi ba batu, na buulola madu umi babo bagiwile, badogomine na batu, baganine, Falao gwagana bino, Nene nishimma byaanyi. ¹¹ Giwe benywe bene uenga byaanyi haya hene hamwibomona; bululi mgilo gwenyu gushihungulwa ata hacho. ¹² Bibyo baya batu bamwagiye mnda sii gyose gya Misili yulu ya uongola lusumbi lose lwa mmabala nahi byaanyi. ¹³ Balochi babo babahele mtima gwa ugila, baganine, Wilichiwe migilo gyenyu, nahi byamusugila masugu mose, nahi mengo maya hamabele byaanyi. ¹⁴ Na bauulu ba madu umi ba Baisilaeli, bene babiilwe na baochi ba Falao hegulu habo, bahulilwe, nabalihusambilwa, Yulu yai musawilicha migilo gyenyu mnakeshi na lino; wa uhula mabiliki nahi biya haala. ¹⁵ Bibyo, bauulu ba madu umi ba Baisilaeli bagile, umlilila Falao, baganine, Yulu yai watugilila bino beswe baacha bobe? ¹⁶ Baacha bobe bashihuhewa iyaka byaanyi, nabo, balihutusambila, Hulwe biliki; na loola, baacha bobe balihuhulwa; na uluba ubo iwa batu bobe boo bene. ¹⁷ Guganine, Benywe muli tulema, tulema, wa yulu ya bibyo mulihugana tuhe luhusa tugye umtangila MLUME lutangi. ¹⁸ Bino, giwe hano, mugile migilo; bululi mushihewa byaanyi, na hamwechi bibyo mubihulusha loka luya lubalo lwa mabiliki. ¹⁹ Bibyo baulu bamadu umi ba Baisilaeli bamonine ugana basili mnda mshaminyi gubi, habasambilwe, Mushihungwilwalubalo lwa mabiliki menyu ata imwechi; bibyo noo byamubi hugila masugu menyu mose. ²⁰ Basambine na Musa na Haluni, babele bagimanyu u ndila, hayahababele huhuma wa Falao. ²¹ Babasambile mwano, MLUME gamlole na ugeda mlandu; bululi mwaita chumba lyetu uba libii u mbele wa Falao, na umbele wa bagichi bage, mwabiya ahilu mmaboo mabo, batuhage. ²² Musa gugiwile uli MLUME, yuluyai wabagilila bisone bano batu? Bululi bwai watuma nene? ²³ Bululi utula handigile wa Falao, udogoma nage wa china lyobe, gwabagila biibe bano batu; na gusabahogonona batu bobe ata hacho.